ސްޓޫޑެންޓް އޮފް ދަ އިޔާ 2 އަށް ހަތަރު ވަނަ ދުވަހު ލިބުނު އާމްދަނީ 54 ޕަސެންޓް ދަށަށް!
މި ފިލްމަށް ހަތަރު ވަނަ ދުވަހު އާމްދަނީގެ ގޮތުަގައި ލިބިފައިވަނީ 5.52 ކްރޯޑް ރުޕީސް
ސްޓޫޑެންޓް އޮފް ދަ އިޔާ 2 ގެ ޕޯސްޓަރު
މިދިޔަ ހުކުރު ދުވަހު ރިލީޒްކުރި ފިލްމް "ސްޓޫޑެންޓް އޮފް ދަ އިޔާ 2" އަށް ބޮކްސް އޮފީހުގައި ލިބެމުންދާ އާމްދަނީ ހީކުރިވަރަށް ވުރެން ދަށަށް ގޮސްފައިވާ ކަމަށް ރިޕޯޓްތައް ބުނެފިއެވެ.
ޓްރޭޑް އެނަލިސްޓް ތަރަން އާދަޝް ކޮށްފައިވާ ޓްވީޓްގައި ވަނީ މި ފިލްމް ރިލީޒް ކުރިތާ ހަތަރުވަނަ ދުވަހު ލިބުނު އާމްދަނީ 54.23 ޕަސެންޓް ދަށަށް ގޮސްފައިވާ ކަމަށެވެ.
މި ފިލްމް ރިލީޒްކުރި ހުކުރު ދުވަހު ފިލްމަށް ލިބިފައިވަނީ 12.06 ކްރޯޑް ރުޕީސް އެވެ. ހޮނިހިރު ދުވަހު އާމްދަނީގެ ގޮތުގައި 14.02 ކްރޯޑް ރުޕީސް ލިބިފައިވާއިރު އާދިއްތަ ދުވަހު މި ފިލްމަށް ލިބިފައިވަނީ 12.75 ކްރޯޑް ރުޕީސް އެވެ. އަދި ހޯމަ ދުވަހު އާމްދަނީގެ ގޮތުގައި ލިބިފައިވަނީ 5.52 ކްރޯޑް ރުޕީސް އެވެ.
އެހެންކަމުން މި ފިލްމަށް ބޮކްސް އޮފީހުގައި މިހާތަނަށް ލިބިފައިވާ ޖުމްލަ އާމްދަނީ އަކީ 44.35 ކްރޯޑް ރުޕީސް އެވެ.
"ސްޓޫޑެންޓް އޮފް ދަ އިޔާ 2" އަކީ 2012 ވަނަ އަހަރު ރިލީޒްކުރި ފިލްމް "ސްޓޫޑެންޓް އޮފް ދަ އިޔާ" ގެ ސީކުއެލް އެކެވެ.
މި ފިލްމްގައި ލީޑް ރޯލުން ފެނިގެން ދަނީ ޓައިގާ ޝްރޯފް އާއި ބޮލީވުޑަށް އަލަށް ތަޢާރަފްވާ ދެތަރިން ކަމަށްވާ އަނަންޔާ ޕާންޑޭ އަދި ތާރާ ސުތެއިރިއާ އެވެ.
"ސްޓޫޑެންޓް އޮފް ދަ އިޔާ" ގައި ލީޑް ރޯލުން ފެނިގެން ގޮސްފައިވަނީ އާލިއާ ބަޓް އާއި ސިދާތް މަލޯތްރާ އަދި ވަރުން ދަވަން އެވެ.
