ކާރިޘާއެއްގެ މެދަށް އުފަންވި 'ގަރބަލައިޒަރ' ދިނީ ޢުއްމީދީ މެސެޖެއް

ދަނޑުވެރި ޢާއިލާއަކަށް ނިސްބަތްވާ ޒައިނަބްއާއި ހަނާން އިސްމާޢީލަކީ، ލުބްނާނަށް މިއަދު ކުރިމަތިލާން ޖެހިފައިވާ އިޤްތިޞާދީ ކާރިޘާގެ ސަބަބުން ދަނޑުވެރިންނަށް އުފުލަން ޖެހިފައި ވާ ތަކުލީފުތައް އެންމެ ގާތުން ދެކި، އެކަން ތަޖުރިބާ ކުރަމުން ދާ ދެބެންނެވެ. އެކަމުގެ ނަތީޖާއަކަށް ވީ، އެ އަނދަވަޅުން އަރައިގަތުމަށް، އެ ދެބެންނަށްވެސް ކޮށްދެވެން އޮތް ހާ ކަމެއް ކޮށްދިނުމުގެ ވަރުގަދަ ޢަޒުމުގައި ތެދުވުމެވެ.

އަމަލީ ގޮތުން ދަނޑުވެރިކަމުގެ ދާއިރާއިން މާ ބޮޑު ތަޖުރިބާތަކެއް ލިބިފައި ނެތެއް ކަމަކު، ކޮވިޑް-19ގެ ލޮކްޑައުން ވީ ޒައިނަބްއާއި ހަނާންގެ ދެބެންގެ އަތުގައި ހިފި ނަޞީބަކަށެވެ. ފުރަބަންދުވެގެން ތިބެން ޖެހުނު ވަގުތުތަކުގެ ބޭނުން، އެ ދެބެން ހިފީ، އެކި ކަހަލަ ދިރާސާތައް ކުރުމަށެވެ. ކުރިމަތިވެފައިވާ މައްސަލަތަކަށް ހައްލު ހޯދާނެ ގޮތްތައް ބަލާ، ހޯދާ، ދެނެގަތުމުގައެވެ. އުކާލާ ކުނީގެ ބޭނުން ކޮށްގެން، ދިޔާ ގަސްކާނާ ތައްޔާރު ކުރުމުގެ ޚިޔާލު އުފެދިގެން އައި އެކަމުގެ ތެރެއިންނެވެ.

އުކާލާ ކުނިބުނި ތެރޭގައި އެކުލެވޭ އޯގޭނިކް ކުނި ބޭނުންކޮށްގެން ޒައިނަބްއާއި ހަނާން ތައްޔާރު ކުރާ "ގަރބަލައިޒަރ" އަކީ، ލުބްނާންއަށް އިމްޕޯރޓް ކުރާ ގަސްކާނާއަށް ވުރެ އަގުގެ ގޮތުން ބަލާއިރު ހެޔޮ އުފެއްދުމެކެވެ. އެކި ކަހަލަ ކެމިކަލްތައް ބޭނުންކޮށްގެން ތައްޔާރު ކޮށްފައި ހުންނަ އާންމު ގަސްކާނާއަށްވުރެ، ވެއްޓާވެސް ރައްޓެހި އުފެއްދުމެކެވެ.

މަޝްރޫއަށް 2 އަހަރު ފުރުނުއިރު "ގަރބަލައިޒަރ" ތައްޔާރު ކުރުމުގެ މަސައްކަތުގައި 12 މުވައްޒަފަކު ހަރަކާތްތެރިވެއެވެ. އޭގެ ތެރެއިން 9 މީހުންނަކީ އަންހެނުންނެވެ. މަޤްޞަދަކީ، ވިޔަފާރީގެ މައިދާނުގައި އަންހެނުން ބާރުވެރި ކުރުވުމެވެ. "ގަރބަލައިޒަރ"ގެ އުފެއްދުންތައް، މުޅި ލުބްނާންގެ އެކި ހިސާބުތަކުން 500 އެއްހާ ދަނޑުވެރިންނަށް ވިއްކައެވެ.

"ގަރބަލައިޒަރ" ތައްޔާރު ކުރުމަށްޓަކާ މޭވާއާއި ތަރުކާރީގެ ތެރެއިން އުކާލާ ބައިތައް ކުދިކުދި ކުރެއެވެ. އެއަށްފަހު، އެކި ކަހަލަ ޖަނަވާރުތަކުގެ ބޮޑުކަމުދާތަކެއްޗާ އެ އެއްކޮށް، އެކަމަށް ހާއްސަ މެޝިންތަކެއްގައި ބަހައްޓައެވެ.

"ގަރބަލައިޒަރ"ގެ އޮޕަރޭޝަންސް މެނޭޖަރ، ހުސްނީ އިސްމާއީލް ކިޔައިދިން ގޮތުގައި، އެކި ކަހަލަ ޖަނަވާރުތަކުގެ ބޮޑުކަމުދާ ތަކެތި ބޭނުންކޮށް، ތަފާތު ތަޖުރިބާތައް ކުރަމުންދާ ކަމަށެވެ.

ކޮންމެ އުފެއްދުމެއްވެސް ބާޒާރަށް ނެރުމުގެ ކުރިން، އެމީހުންގެ އަމިއްލަ ދަނޑުތަކުގައި ހައްދާ ގަސްތަކުގައި، އެ ކާނާ ތަހުލީލު ކުރެއެވެ.

އިޤްތިޞާދީ، މާލީ އަދި ސިޔާސީ ހަލަބޮލިކަމާއި ނުތަނަވަސްކަމުގައި އޮތް ލުބްނާނުގެ އާބާދީގެ ބޮޑު ބައެއް މިއަދު ދިރިއުޅެމުން ދަނީ އިންތިހާ ފަޤީރު ކަމުގެ ހާލަތުގައި ކަމަށް ވީ ނަމަވެސް، ކޮންމެ މީހަކުވެސް ދަނީ އެމީހަކަށް ވީ ގޮތަކުން ދިރިއުޅުން ކޮޅަށް ޖެހުމަށް މަސައްކަތް ކުރަމުންނެވެ. އެއީ އިތުރު މީހަކު ކޮށްދޭން ޖެހޭ ކަމެއް ކަމުގައި ނުދި، އަމިއްލަ ފައި މައްޗަށް ތެދުވުމުގައި އަންހެނެއް ފިރިހެނެއް، ޒުވާނެއް މުސްކުޅިއެއް ތަފާތެއް ނެތެވެ.