ފައިސާ ފޮނުވަން އިންނާނީ އައިއޭސީގެ އެކައުންޓް ނަންބަރު، އަމިއްލަ މީހެއްގެ އެކައުންޓް ނަންބަރެއް ނީންނާނެ - އެއް އުއްމަތެކޭ ކެމްޕޭން ޓީމް

ތުރުކީ-ސީރިއާއަށް އައި ބިންހެލުމާއި ގުޅިގެން، އެތައް މިލިއަން މީހުން ހާލުގައި ޖެހިފައިވާތީ، އެފަރާތްތަކަށް އެހީވުމަށް ރާއްޖޭގައި އިންޓަރނޭޝަނަލް އެއިޑް ކެމްޕޭނުން ހުޅުވާފައިވާ އެކައުންޓަށް ފައިސާ ފޮނުވާއިރު އެއީ އެތަނުގެ އެކައުންޓްކަން ޔަގީންކުރުމަށް އެއް އުއްމަތެކޭ ކެމްޕޭން ޓީމުން އެދިއްޖެއެވެ.

އޮންލައިންކޮށް މަކަރާއި ހީލަތުން ފައިސާ ހޯދަމުންދާކަން ފާހަގަކޮށް، އެއް އުއްމަތެކޭ ކެމްޕޭން ޓީމްގައި ގިމެނޭ މަހަލްދީބް ފައުންޑޭޝަންގެ ޗެއަރ ޕާސަން، ޝައިޚް އަބްދުﷲ ރަޝީދު ވިދާޅުވީ ފައިސާ ފޮނުވުމުގައި ވަރަށް ބޮޑަށް ވިސްނަންވާނެ ކަމަށެވެ. މަކަރާއި ހީލަތް އޮންލައިންކޮށް ހަދާ މީހުން އުޅޭނެ ކަމަށާއި، ފުރަތަމަ ކަމަކަށް އެއްވެސް ފަންޑު ފޮއްޓެއްގައި އެކައުންޓް އަމިއްލަ މީހެއްގެ އެކައުންޓް ނަންބަރެއް ނީންނާނެ ކަމަށެވެ. އަދި ފަންޑު ފޮށިތަކުގައި އިންނާނީ އިންޓަރނޭޝަނަލް އެއިޑް ކެމްޕޭން (އައިއެސީ) ގެ އެކައުންޓް ނަންބަރު ކަމަށެވެ. އެހެން ނަންބަރެއް އިނިއްޔާ އެއީ ގޯހެއް ކަމަށް ޝައިޚް ވިދާޅުވިއެވެ.

Advertisement

އިންޓަރނޭޝަނަލް އެއިޑް ކެމްޕޭންގެ ފަރާތުން ޑިރެކްޓަރ އޮފް އިންޓަރނޭޝަނަލް ރިލޭޝަންސް، މުހައްމަދު އަލީ ވިދާޅުވީ އައިއޭސީ އިން ހިންގާ ހަރަކާތުގައި ފަންޑު ބޭނުންކުރެވޭގޮތާއި، ފަންޑުން ކުރަނީ ކީއްކަން ބަލާލަން ބޭނުންވާނަމަ އެކަން ކުރެވެން އިންނާނެ ކަމަށެވެ. މިފަންޑަށް ފައިސާ ޖަމާވަމުން އަންނަ މިންވަރު ހާމަކުރަމުންދާނެކަމަށާއި މިފަންޑުގެ އެހީގައި ތުރުކީ އަދި ސީރިޔާގެ ރައްޔިތުންނަށް ވެދޭ އެހީތެރިކަންވެސް ހާމަކުރަމުންދާނެކަމަށް މުހައްމަދު އަލީ ވިދާޅުވިއެވެ.

ތުރުކީ-ސީރިއާ ރައްޔިތުންނަށް އެހީވުމަށް ކުރިއަށް ގެންދާ ކެމްޕޭން ރާވާފައި ވަނީ އެއް ހަފްތާއަށެވެ. އެހެންނަމަވެސް ހާލަތު ދާގޮތުން ކެމްޕޭންގެ މުއްދަތު އިތުރުވެގެން ހިނގައިދާނެ ކަމަށް ޓީމުން ވަނީ ބުނެފައެވެ.

ތުރުކީ-ސީރިއާ ބިންހެލުމާއި ގުޅިގެން ހުޅުވާލާފައިވާ އިންޓަރނޭޝަން އެއިޑް ކެމްޕޭންގެ ކުއްލި އެހީވުމުގެ ފަންޑުގެ އެކައުންޓް ނަންބަރަކީ 7770000062741، އަމިއްލަ ފަރުދެއްގެ އެކައުންޓް ނަންބަރެއް ނީންނާނެއެވެ. އަދި މިކަމަށް ސަމާލުވުމަށް ކެމްޕޭން ޓީމުން ވަނީ އެދިފައެވެ.