ރާއްޖޭގެ އެކި އަތޮޅުތަކުން ފެނިގެންދަނީ އެއަރޕޯޓްތައް ތަރައްގީކުރެވި ހުޅުވަން މަސައްކަތް ކުރައްވަމުން ގެންދަވާތަން
ނައިބްރައީސް ފައިސަލް ނަސީމް އައިލެންޑް އޭވިއޭޝަން ސަރވިސަސް ލިމިޓެޑްގެ ސްޓާފް ނައިޓްގައި ވާހަކަފުޅުދައްކަވަނީ
ކޮވިޑް-19 ގައި ރާއްޖޭގެ އިގްތިސާދު އިއާދަކޮށް، ކޮޅަށްޖަހާ އެކަން ކާމިޔާބުކުރުމަށްޓަކައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ އެންމެ ރަނގަޅު ނިންމެވުމަކަށް ވެގެންދިޔައީ ބޯޑަރު ހުޅުވާލުން ކަމަށް ނައިބްރައީސް ފައިސަލް ނަސީމް ވިދާޅުވެއްޖެއެވެ.
އައިލެންޑް އޭވިއޭޝަން ސަރވިސަސް ލިމިޓެޑްގެ ސްޓާފް ނައިޓްގައި ހޮނިހިރުދުވަހުގެ ރޭ ވާހަކަފުޅު ދައްކަވަމުން ނައިބުރައީސް ވިދާޅުވީ ބޯޑަރު ހުޅުވާލުމާއެކު އައިލެންޑް އޭވިއޭޝަންގެ މުވައްޒަފުންނަށް އިތުރު މަސައްކަތްތަކެއް، އުނދަގޫގޮތަށް ކުރަން ޖެހުނު ކަމަށެވެ. ވަރަށް ބޮޑެތި ރެސްޓްރިކްޝަންސްތަކާއި، ވަރަށް ގިނަ ފިޔަވަޅުތަކެއް އަޅައިގެން އުނދަގޫ ކަންތައްތަކެއް ކުރައްވަން ޖެހުނު ކަމަށެވެ.
ނައިބްރައީސް ވަނީ އެކަންކަން ފާހަގަކުރައްވާ މިދިޔަ 3 އަހަރު ދުވަހުގެ ތެރޭގައި އައިލެންޑް އޭވިއޭޝަންގައި މަސައްކަތް ކުރި ހުރިހާ ފަރާތްތަކަށް ޝުކުރު އަދާކުރައްވާފައެވެ.
ނައިބްރައީސް ވިދާޅުވީ ރާއްޖޭގެ އެކި އަތޮޅުތަކުން ފެނިގެންދަނީ އެއަރޕޯޓްތައް ތަރައްގީކުރެވި ހުޅުވަން މަސައްކަތް ކުރައްވަމުން ގެންދަވާތަން ކަމަށާއި، މިއާއެކު ފްލީޓް ވެސް އިތުރުވެގެންދާ ކަމަށެވެ.
ނައިބްރައީސް ވިދާޅުވީ ކުރިއަށް އޮތީ މޯލްޑިވިއަންގެ ޕްލޭނާއެއްކޮށް ފްލީޓްތައް ބަދަލުވެގެން ދިއުން ކަމަށެވެ. މިކަމަށް ހިއުމަން ރިސޯސަސް ބޭނުންވާ ކަމަށާއި، ފްލައިން ސްކޫލް ވެގެންދާނީ އެކަމަށް ބޭނުންތެރިތަނަކަށް ކަމަށެވެ. މީގެ އިތުރުން މި މަސައްކަތް ވެގެންދާނީ ކުރިއަށް އޮތްތަނުގައި ރާއްޖެއަށް ބޭރުފައިސާ ވައްދާ ދޮރާށީގެ ގޮތުގައި ކަމަށް ނައިބްރައީސް ވިދާޅުވިއެވެ.
ނައިބްރައީސް ވިދާޅުވީ ގައުމަކަށް އެންމެ މުހިންމުވަނީ ވަރުގަދަ ހިއުމަންރިސޯސްއެއް ކަމަށެވެ. އެކަމަށްޓަކައި ރަނގަޅު ހުނަރުވެރި ޖީލެއް ބިނާކުރަން ޖެހޭ ކަމަށާއި، އެ މަސައްކަތް ކުރައްވަން ޖެހޭ ކަމަށެވެ.
އަޅުގަނޑުމެންނަކީ ތަފާތު މަސައްކަތް ކުރަން ދަސްކުރަން ޖެހޭ ބައެއް ކަމަށާއި، ވޭތުވެދިޔަ ތަނުގައި ފެނިގެންދިޔައީ އެކަން ކުރަންޖެހޭކަން ކަމަށް ނައިބުރައީސް ވިދާޅުވިއެވެ.
