ތުރުކީ އާއި ސީރިއާއަށް އެހީވާން "އެއް އުންމަތެކޭ" ކެމްޕޭނަށް މިލިއަނެއް
18 ފެބުރުއަރީ 2023 | ހޮނިހިރު 11:00ތުރުކީ އާއި ސީރިއާއަށް އެހީވުމަށް ރާއްޖޭގައި ގިނަ ހަރަކާތްތަކެއް ދަނީ ހިންގަމުން
އެއް އުންމަތެކޭ ކެމްޕޭންގައި ބެހެއްޓި ފަންޑު ފޮއްޓެއް --
ތުރުކީ އަދި ސޫރިޔާ އަށް ދިމާވެފައިވާ ބިންހެލުމުގެ ކާރިސާގައި ހާލުގައިޖެހުނު ފަރާތްތަކަށް އެހީވުމަށްޓަކައި ޢިލްމުވެރިންނާއި މަދަނީ ޖަމްއިއްޔާތައް ގުޅިގެން ފެށި "އެއް އުންމަތެކޭ" ޕްރޮގްރާމަށް އެއް މިލިއަނަށްވުރެ ގިނަ ރުފިޔާ ލިބިއްޖެއެވެ.
މި ފަންޑުގައި ޚިދުމަތް ޖަމްއިއްޔާ، ނަސީހާ، އަލް ގަލަމް، ޔުނައިޓެޑް އިސްލާމިކް ސޮސައިޓީ، ދަރުމަ ފައުންޑޭޝަން، ޒާތުލްޚައިރު ފަދަ އެތައް ޖަމްއިއްޔާއެއް ބައިވެރިވެފައިވާ ކަމަށް މިދިޔަ ބުދަ ދުވަހު މި ކެމްޕޭން ލޯންޗުކުރަން ބޭއްވި ރަސްމިއްޔާތުގައި މި ހަރަކާތް އިންތިޒާމުކުރާ ފަރާތުން މައުލޫމާތު ދީފައި ވެއެވެ. ހުކުރު ދުވަހު ފަންޑު ފޮށިތައް މިސްކިތްތަކުގައި ބެހެއްޓިއިރު އެހީ ފޯރުކޮށްދެއްވާނެ ފަރާތްތަކަށް އެ ފުރުސަތު ހުޅުވައިލިއެވެ.
މި ހަރަކާތުގެ ތެރެއިން ލިބުނު ބޮޑު އެހީއާ ގުޅިގެން އިސްލާމިކް އޯގަނައިޒޭޝަން ފޯ ކަލްޗަ އެންޑް ސިވިލައިޒޭޝަން (އައިއޯސީސީ)ގެ ރައީސް ޑރ. މުހައްމަދު ޝަހީމް އަލީ ކުރެއްވި ޓްވީޓެއްގައި ވިދާޅުވީ ތުރުކީ އާއި ސީރިޔާގެ ބިންހެލުމާ ގުޅިގެން ހާލުގައި ޖެހުނު ފަރާތްތަކަށް އެހީވުމަށް ފެށި "އެއް އުންމަތެކޭ ކެމްޕޭނަށް އެއް މިލިއަން ރުފިޔާއަށް ވުރެ ގިނަ ރުފިޔާ ލިބިފައިވާ ކަމަށެވެ. އަދި މި ކެމްޕޭނަކީ މިހާތަނަށް ރާއްޖޭގައި ހިންގި ފަންޑްރައިޒިން ޕްރޮގްރާމުތަކުގެ ތެރެއިން އެންމެ ބޮޑު ތަރުހީބެއް ލިބުު ޕްރޮގްރާމު ކަމަށް އޭނާ ވިދާޅުވިއެވެ.
