އެމެރިކާގެ ވަރޖިނިއާ ސްޓޭޓްގައި އުމުރުން ހަ އަހަރުގެ ކުއްޖަކު ސްކޫލަށް ފިސްތޯލައެއް ގެންދިއުމާ ގުޅިގެން އޭނާގެ މަންމަ ހައްޔަރުކޮށްފިއެވެ. ވަރޖީނިއާގެ ލިޓްލް ކްރީކް އެލިމެންޓަރީ ސްކޫލްގައި، ފާއިތުވި ހަފުތާ ނިމެނިކޮން ހިނގި ހާދިސާގައި އެއްވެސް މީހަކަށްވެސް އަދި ކުއްޖަކަށްވެސް ގެއްލުން ލިބިފައެއް ނުވެއެވެ. ނަމަވެސް އެއް ކުއްޖެއްގެ މަންމަ ބުނެފައިވާގޮތުގައި ބަޑި ގެންދިޔަ ކުއްޖާ ވަނީ އޭނާގެ ދަރިފުޅުގެ ގަޔަށް ބަޑި ޖަހާނެކަމަށް ބުނެ ބިރު ދައްކާފައެވެ. އެކަމާ ގުޅިގެން އެކުއްޖާ ގެޔަށް ގޮސް ކުޅެން އުޅެފައި ހުއްޓުން އަރާފައި އިންކަމަށް މަންމަ ރިޕޯޓްކޮށްފައި ވެއެވެ.
އެމެރިކާގެ އެހެން ސްކޫލެއްގައި މިދިޔަ މަހު ވަނީ ހަމަ އުމުރުން ހަ އަހަރުގެ ކުއްޖަކު ސްކޫލަށް ބަޑި ގެންގޮސް އޭނާގެ ޓީޗަރުގެ ގަޔަށް ޖަހާފައެވެ.
އެންމެ ފަހުން މި ހިނގި ހާދިސާއާ ގުޅިގެން، ސްކޫލަށް ބަޑި ގެންދިޔަ ކުއްޖާގެ މަންމަގެ މައްޗަށް ވަނީ، ކުޑަކުއްޖެއްގެ ސަލާމަތާއި ރައްކާތެރިކަމަށް ދޭންވާ ވަރަށް ސަމާލުކަން ނުދިންކަމުގެ ކުށުގައި ހުކުރު ދުވަހު ކޯޓުގައި ދައުވާ އުފުލާފައެވެ. ފުލްކޮށް ވަޒަން ލައްވާފައިވާ ބަޑިއެއް ކުއްޖާގެ އަތުޖެހޭ ހިސާބުގައި ބާއްވާފައި އޮތުމަކީވެސް އޭނާ ކުށްވެރިވާނެ ކަމެކެވެ.
