ލަމްހާއާއި މާވިންއަށް ކުރާ ދައުވާގެ އަޑުއެހުމެއް މާދަމާ
މާވިންގެ މައްޗަށް ކުރަނީ އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާ
މޭރީގެ މަރުގެ މައްސަލާގައި ދައުލަތުން ދައުވާކުރަނީ މާރވިން އެސް.ވައި ވާރގަސްއާއި، ހަލީމަތު ލަމްހާ އަބްދުއްރަހްމާނުގެ މައްޗަށް
މޭރީ ގްރޭސްގެ މަރުގެ މައްސަލާގައި، އޭނާގެ ފިރިމީހާ މާވިން އެސް.ވައި ވާރގަސްއާއި އޭނާގެ ލޯބިވެރިޔާ ހަލީމަތު ލަމްހާގެ މައްޗަށް ހިންގާ ޝަރީއަތުގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ތާވަލުކޮށްފިއެވެ.
މި އަޑުއެހުން ތާވަލުކޮށްފައިވަނީ އާދިއްތަ ދުވަހުގެ ހެނދުނު 09:00އަށެވެ.
މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 2022 ވަނަ އަހަރުގެ ނޮވެމްބަރު މަހުގެ ތެރޭގައެވެ. އެ ދުވަހުގެ އަޑުއެހުމުގައި 4 ހެތްކެއްގެ ހެކިބަސް ނަގާފައިވެއެވެ. އެއީ އައިޖީއެމްއެޗްގެ އިމަރޖެންސީ މެޑިކަލް އެސިސްޓެންޓަކާއި، ލަމްހާއާއެކު މަސައްކަތްކުރި ނަރުހެއްގެ އިތުރުން، އީ.އާރް.ގައި މަސައްކަތްކުރި ނަރުހަކާއި، މާވިންގެ މަންމަ (މާރިކް) އާއެކު މަސައްކަތްކުރާ ފަރާތެކެވެ.
އެ ދުވަހުގެ އަޑުއެހުމުގައި 5 ވަނަ ހެކިވެރިއަކުވެސް ހާޒިރުކުރިއެވެ. އެގޮތުން ފަސްވަނައަށް ހާޒިރުކުރީ ފިލިޕީންސްގެ ރައްޔިތެކެވެ. އެހެންނަމަވެސް، އިނގިރޭސި ބަސް ތަރުޖަމާކުރުމުގައި ދިމާވި ދަތިތަކެއްގެ ސަބަބުން އެ ހެކިވެރިޔާގެ ހެކިބަސް ނެގިފައިނުވާތީ އެ ދުވަހުގެ އަޑުއެހުން ނިންމާލީއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ.
މޭރީ ގްރޭސްގެ މަރުގެ މައްސަލާގައި ލަމްހާގެ މައްޗަށް އުފުލާފައިވަނީ އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާއާއި، އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދައުވާއާއި، ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ކުށުގެ ދައުވާއެވެ.
އަދި މޭރީގެ ފިރިމީހާ މާވިންގެ މައްޗަށް ކުރަނީ އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާއެވެ.
