ގްރީން ޕާޓީ އާއި އެކު ވެރިކަމަށް ވަޑައިގަންނަވަން މަސައްކަތްކުރައްވާ ބޭފުޅަކާއި އެކު ކޯލިޝަން ހެދުމުގެ ވިސްނުން ގެންގުޅުއްވާ ކަމަށް އެ ޕާޓީ އުފެއްދުވުމުގެ މަސައްކަތް ކުރައްވަމުންދާ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.

ޖާބިރު އެފަދައިން ވިދާޅުވީ ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަދައްކަވަމުންނެވެ. ގްރީން ޕާޓީ އިން ތާއީދުކުރާނީ ރައީސް އިބްރާހިމް މުހައްމަދު ޞާލިހު އަށް ކަމަށް ޖާބިރު ވަނީ ވިދާޅުވެފައެވެ. އަދި މި ވަގުތުގެ ހާލަތަށް ބަލާއިރު ޑިމޮކްރެސީ ހަރުދަނާކުރުން ވަރަށް މުހިންމު ކަމަށް އެނާ ވަނީ ވިދާޅުވެފައެވެ. އެހެންކަމުން ޑިމޮކްރަސީ އަށްޓަކާ ޒުވާނުން ބާރުވެރިކޮށް، ތިމާވެށްޓަށްޓަކާ މަސައްކަތްކުރާ ޕާޓީ އެއް އޮތުން މުހިންމު ކަމަށް ޖާބިރު ވަނީ ވިދާޅުވެފައެވެ. އަދި މާރާމާރީ އާއި ހަމަނުޖެހުމާއި ނުލާ ޚިޔާލު ފާޅުކުރުމުގެ ސިފަ ރާއްޖޭގެ ޑިމޮކްރަސީ އިން ފެންނަން ޖެހޭ ކަމަށް ޖާބިރު ވިދާޅުވިއެވެ. ޖާބިރު ވިދާޅުވީ ގްރީން ޕާޓީ އިން މަސައްކަތްކުރާނީ އެ މަގަށް ކަމަށެވެ.

11000 މެމްބަރުންނާއި އެކު ޕާޓީގެ ފޯމުތައް ހުށަހެޅުމަށް ތައްޔާރުވަމުންދާ ކަމަށް ޖާބިރު ވަނީ ވިދާޅުވެފައެވެ. ގްރީން ޕާޓީގެ އެޖެންޑާ އެއް އެކުލަވާލާ ރާއްޖެ އަށް ޚިދުމަތްކުރުމުގެ ވިސްނުން އެބަހުރި ކަމަށާއި އެ ޕާޓީ އަކީ ގްރީން ޑިމޮކްރަސީ އަކަށް މަގުފަހިކުރާނެ ޕާޓީ އެއް ކަމަށް ޖާބިރު ވިދާޅުވިއެވެ. މީގެ އިތުރުން ގްރީން ޕާޓީ އަކީ ހިންގުންތެރި ޕާޓީ އަކަށް ވާނެ ކަމަށް އޭނާ ވަނީ ވިދާޅުވެފައެވެ.

ޖާބިރު އާ ޕާޓީއެއް އުފެއްދުމަށްޓަކައި ހުށަހެޅުއްވުމުން އިލެކްޝަން ކޮމިޝަނުން ހުއްދަދީފައި ވަނީ މި ހިނގާ ފެބްރުއަރީ މަހުގެ ތެރޭގައެވެ. "ގްރީން ޕާޓީ އޮފް މޯލްޑިވްސް" ގެ ނަމުގައި ހެދުމަށް ހަމަޖެހިފައިވާ އެ ޕާޓީ އުފެއްދުމަށް ހުއްދަ ނެގިއިރު ޖާބިރު ވަނީ ދިވެހި ރައްޔިތުންގެ ޕާޓީ (ޑީއާރުޕީ)ގެ ލީޑަރު ކަމުންނާއި މެންބަރު ކަމުން އިސްތިއުފާ ދެއްވާފައެވެ. ޖާބިރު ވިދާޅުވީ ކުރިން ޑީއާރުޕީ އަށް ވަޑައިގަތީ ވަގުތުން ޕާޓީ އަކަށް ވަޑައިގަތުމުގެ ވިސްނުން އޭރު ހުރުމުން ކަމަށެވެ. އެހެންނަމަވެސް ޑީއާރުޕީ އަކީ އޭގެ އަސްލާއި މެދު ސުވާލު އުފެދޭ ޕާޓީ އެއް ކަމަށާއި ގްރީން ޕާޓީ އަށް އެގޮތް ނުވާނެ ކަމަށް ޖާބިރު ވަނީ ވިދާޅުވެފައެވެ.