ހަރުކަށި ފިކުރުގެ މީހުން ބައިތިއްބާ ހައި ސެކިއުރިޓީ ވިންގު މި އަހަރުގެ މެދުތެރޭގައި ނިމެނޭ - އިމްރާން
މަސައްކަތާއި ހަވާލުވި އިރުގައި އާންމުކޮށް ތަފާތު ކުށްތައް ކުރާ މީހުން ކެޓަގަރައިޒް ކުރުމެއް ނޯވޭ
މާފުށި ޖަލު
މާފުށީ ޖަލުގައި ހަރުކަށި ފިކުރުގެ މީހުން ބައިތިއްބާ ހައިސެކިއުރިޓީ ވިންގު މިއަހަރުގެ މެދުތެރޭގައި ނިމެނޭކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ހޯމް މިނިސްޓަރު ވިދާޅުވީ ޖަލުގައި ހުރި މައްސަލަތައް ރަނގަޅަށް ދެނެގަނެ އެކަމަށް އެޑްރެސް ކުރުމަށް ބައިނަލްއަގުވާމީ މުޖްތަމައުއާއި، ރާއްޖޭގައި ހުރި އެންޖީއޯސްތަކާއި އަދި ދައުލަތުގެ އެހެން މުއައްސަސާތަކާ ގުޅިގެން މައްސަލަތައް ހައްލުކުރުމަށްޓަކައި މަސައްކަތްތަކެއް ކުރެވެމުންދާ ކަމަށެވެ.
މިނިސްޓަރު ވިދާޅުވީ މި ސަރުކާރު ވެރިކަމަށް އައި އިރުގައި އަދި މަސައްކަތާއި ހަވާލުވި އިރުގައި އާންމުކޮށް ތަފާތު ކުށްތައް ކުރާ މީހުން ކެޓަގަރައިޒް ކުރުމެއް ނޯންނަ ކަމަށެވެ. ނަމަވެސް މިހާރު ވަކިން ހާއްސަކޮށް ހަރުކަށި ފިކުރުގެ ފަރާތްތައް އެސެސްކުރާނެ ޓޫލްސްތަކެއް ޑިވަލަޕްކޮށް، އެ ފަރާތްތައް އެސެސްކޮށް އެހެން ގައިދީންނާ ވަކިން ބޭތިއްބެން އޮތް އެންމެ ބޮޑު މިންވަރަކަށް އެކަން ކުރައްވަމުން ގެންދަވާ ކަމަށެވެ.
މިނިސްޓަރު ވިދާޅުވީ އުއްމީދުކުރައްވަނީ އިރާދަކުރެއްވިއްޔާ މިއަހަރުގެ ޖޫން، ޖުލައި ހިސާބުގައި އެ ވިންގު ނިންމާލެވޭނެ ކަމަށެވެ. އަދި އެތަން ޑިޒައިންކޮށްފައިވަނީ ސިންގަޕޫރުފަދަ، މިފަދަ ފަރާތްތައް ގެންގުޅެވޭނެ ތަންތަން ޑިޒައިންކޮށްފައިވާ ގޮތްތައް ބަލައިގެން، ގައުމުތަކުގައި އެކަންކުރާގޮތަށް ބެލުމަށްފަހުގައި ރާއްޖޭގައި ލިބެންހުރި ތަނަވަސްކަމާ އެއްވަރަށް ކަމަށެވެ.
މިނިސްޓަރު ވިދާޅުވީ ރާއްޖޭގެ މާލީ ތަނަވަސްކަން ހުރި މިންވަރަށް ބަލާފައި، ގަބޫލުކުރައްވަނީ މި ފެސިލިޓީ ޑިވަލަޕްކުރުމުން ހަރުކަށި ފިކުރުގެ ފަރާތްތައް ގެންގުޅެން އެކަށީގެންވާ ވަރުގެ ފެސިލިޓީއަކަށް ވެގެންދާނެ ކަމަށެވެ.
