ރާއްޖެއާއި ރާއްޖެއިން ބޭރުން މަތީ ތަޢުލީމާއި ތަމްރީނު ހޯދަން ލޯނު ދިނުމުގެ އުސޫލު އާންމުކޮށްފި

ރާއްޖެއާއި ރާއްޖެއިން ބޭރުން މަތީ ތަޢުލީމާއި ތަމްރީނު ހޯދަން ލޯނު ދިނުމުގެ އުސޫލު އާންމުކޮށްފިޢެވެ.

މި އުސޫލަކީ، ރާއްޖެއާއި ރާއްޖެއިން ބޭރުން މަތީ ތަޢުލީމު ހާސިލުކުރުމާއި ތަމްރީނު ހޯދަން ބޭނުންވާ ދިވެހީންގެ ތެރެއިން އަލަށް ކިޔަވަން ފަށާ ފަރާތްތަކަށާއި، ކިޔަވަމުންދާ ފަރާތްތަކަށް ލޯނުގެ ގޮތުގައި މާލީ އެހީ ދިނުމާއި، ލޯނުގެ ގޮތުގައި މާލީ އެހީ ދޭނެ ފަރާތްތައް ކަނޑައެޅުމުގައި ބޭނުންކުރާނެ މިންގަނޑުތަކާއި، ލޯނު ދޭނެ ކަންތައްތަކާއި، ލޯނުގެ ބޭނުންހިފުމާއި، ލޯނު އަނބުރާ ދެއްކުމާ ގުޅޭ ކަންކަން ބަޔާންކުރުމުގެ ގޮތުން، ޤާނޫނު ނަންބަރު 2021/7 ދިވެހިރާއްޖޭގެ މަތީ ތަޢުލީމާއި ތަމްރީނުގެ ޤާނޫނުގެ ދަށުން އެކުލަވައިލައިފައިވާ އުސޫލެކެވެ.

Advertisement

މި އުސޫލުގެ މަގުސަދަކީ، މަތީ ތަޢުލީމާއި ތަމްރީނުގެ މަރުޙަލާއެއްގައި ކިޔެވުމަށް ޝަރުޠު ހަމަވާ ފަރާތްތަކަށް ލޯނުގެ ގޮތުގައި މާލީ އެހީ ދީގެން ތަމްރީނު ހޯދުމާއި މަތީ ތަޢުލީމު ހާސިލުކުރުމުގެ ފުރުޞަތު ތަނަވަސްކޮށްދިނުމެވެ.

މި އުސޫލުގެ ދަށުން ލޯނު ދިނުމަށް ހަމަޖެހިފައިވަނީ 2 ކެޓަގަރީއަކަށެވެ. އެއީ އަލަށް ކިޔަވަން ފަށާ ފަރާތްތަކުގެ ކެޓަގަރީއާއި މިހާރު ކިޔަވަމުންދާ ފަރާތްތަކުގެ ކެޓަގަރީއެވެ.

އޭގެތެރެއިން އަލަށް ކިޔަވަން ފަށާ ފަރާތްތައް ކަމުގައި ބަލަނީ މި އުސޫލުގައިވާ ގޮތުގެ މަތީން ލޯނު ދިނުމަށް އިޢުލާނު ކުރާ އަހަރުގެ ޖަނަވަރީ މަހުގެ 1 ނުވަތަ އޭގެ ފަހުން ޕްރޮގްރާމެއްގައި ކިޔަވަން ފަށާ ފަރާތްތަކަށެވެ.

މިހާރު ކިޔަވަމުންދާ ފަރާތްތައްކަމުގައި ބަލާނީ މި އުސޫލުގައިވާ ގޮތުގެ މަތީން ލޯނު ދިނުމަށް އިޢުލާނު ކުރާ އަހަރުގެ ޖަނަވަރީ މަހުގެ 1 ގެ ކުރިން ޕްރޮގްރާމެއްގައި ކިޔަވަން ފަށާ ފަރާތްތަކަށެވެ.

މި އުސޫލުގެ ދަށުން ލޯނަށް އެދެވޭނީ ވަކި ޝަރުޠުތައް ހަމަވާ ފަރާތްތަކަށެވެ. އޭގެ ތެރޭގައި އުމުރުން 16 އަހަރު ފުރިފައިވާ، ދިވެހި ރައްޔިތަކަށްވުމާއި ފުލްޓައިމް ދަރިވަރެއްގެ ގޮތުގައި ކިޔަވަން ހުށަހަޅާ ފަރާތަކަށް ވުމާއި އެމް.އެން.ކިއު.އެފް.ގެ ލެވެލް 5 އިން ފެށިގެން ލެވެލް 10 ގެ ނިޔަލަށް ހުރި ޕްރޮގްރާމްތަކުގެ ތެރެއިން ޕްރޮގްރާމެއް ފުރިހަމަކުރަން ނުވަތަ ޕްރޮފެޝަނަލް / ލައިސަންސް ޕްރޮގްރާމެއް ފުރިހަމަކުރަން ހުށަހަޅާ ފަރާތަކަށްވުމާއި، އަދިވެސް އިތުރު ޝަރުތުތައް ހިމެނެއެވެ.

އުސޫލުގައި ބަޔާންކޮށްފައިވާ ގޮތުގައި ލޯނު ނަގައިގެން ތަޢުލީމާއި ތަމްރީނު ހޯދަން، ކޮންމެ ޤައުމަކަށް ވެސް ދެވިދާނެއެވެ. ނަމަވެސް އިޢުލާނުކޮށްފައިވާ ޤައުމުތައް ފިޔަވައި އެހެން ޤައުމެއްގައި ކިޔެވުމަށް ލޯނު ދޭނީ، އިޢުލާނުކޮށްފައިވާ ޤައުމުތަކުގެ ތެރެއިން ލޯނު ނަގާ ފަރާތް އިޚުތިޔާރުކުރާ ޤައުމަކަށް، ކަނޑައަޅައިފައިވާ ރޭޓުންނެވެ.

އޭގެ އިތުރުން، ދިވެހިރާއްޖޭގައި ކިޔެވުމަށް ދޫކޮށްފައިވާ ލޯނެއް އެހެން ޤައުމެއްގައި ކިޔެވުމަށް ބަދަލެއް ނުކުރެވޭނެކަމަށްވެސް އުސޫލުގައި ބުނެއެވެ. އެހެން ނަމަވެސް ލޯނު ނަގާ ފަރާތް ކިޔެވުމަށް އިޚްތިޔާރުކޮށްފައިވާ ޕްރޮގްރާމް ހިންގުން ރާއްޖޭގެ މަރުކަޒުން ހުއްޓައިލައި އެ ޕްރޮގްރާމަކީ ދިވެހިރާއްޖޭގެ އެހެން މަރުކަޒެއްގައި ކިޔަވައިނުދޭ ޕްރޮގްރާމެއްކަމަށް ވެއްޖެނަމަ، ނުވަތަ ދިވެހިރާއްޖޭގެ އެހެން މަރުކަޒެއްގައި ކިޔަވައިދޭ ޕްރޮގްރާމެއްކަމަށް ވިޔަސް އެ ފަރާތަށް އެ މަރުކަޒެއްގައި ކިޔަވަން ފުރުޞަތު ނުލިބޭ ހާލަތެއްގައި، އެހެން ޤައުމެއްގައި ކިޔެވުމުގެ ފުރުޞަތު އެ ފަރާތަށް ދެވޭނެއެވެ.

ބޭރު ޤައުމެއްގައި ކިޔަވަމުންދާ ފަރާތަކަށް ލޯނުގެ ފުރަތަމަ އިންސްޓޯލްމަންޓުގެ ފައިސާ ޖަމާކުރުމަށްފަހު، އެހެން ޤައުމަކަށް ކިޔެވުން ބަދަލުކުރުމަށް އެދިއްޖެނަމަ، އެކަން ކޮށްދޭނީ، ލޯނުގެ ދަށުން ކިޔަވަން ފުރަތަމަ އެދުނު ޤައުމުގައި ކިޔެވުމަށް ފައިސާ ދިނުމަށް ކަނޑައަޅައިފައިވާ ރޭޓުން، ލޯނުގެ ޖުމުލަ އަދަދު އިތުރުކޮށް ނުދެވޭ ގޮތަށެވެ.

ލޯނަށް އެދި ހުށަހަޅާނީ، މިނިސްޓްރީން އިޢުލާނު ކުރުމުން، އެކަމަށް ޓަކައި ތައްޔާރުކޮށްފައިވާ އޮންލައިން ޕޯޓަލް މެދުވެރިކޮށް، އޭގައި ބަޔާންކުރާ ހުރިހައި ލިޔުންތަކާ އެކުގައެވެ.

ލޯނުގެ ފައިސާ ދޫކުރާނީ، އިންސްޓޯލްމަންޓުގެ ގޮތުގައެވެ. އެއީ ކޮންމެ އަހަރު ދެ އިންސްޓޯލްމަންޓެވެ. ފުރަތަމަ އިންސްޓޯލްމަންޓަށްފަހު، ދެން ކޮންމެ ފަހަރަކު ވެސް އިންސްޓޯލްމަންޓަށް އެދެންވާނީ، ލޯނު ނެގި ފަރާތުން ކިޔަވަމުންދާކަން މިނިސްޓްރީއަށް ކަށަވަރު ކުރެވޭ ފަދަ ލިޔުމެއް އެ ދަރިވަރަކު ކިޔަވާ މަރުކަޒު މެދުވެރިކޮށް މިނިސްޓްރީއަށް ފޮނުވުމަށް ފަހުގައެވެ.

ލޯނަށް ހޮވޭ ފަރާތްތަކުގެ ވަގުތީ ނަތީޖާ އާންމު ކުރާނެކަމަށްވެސް އުސޫލުގައި ބުނެއެވެ. އެގޮތުން މި ނަތީޖާއާ ގުޅޭ އެއްވެސް ޝަކުވާއެއް އޮތްނަމަ، ވަގުތީ ނަތީޖާ އިޢުލާނުކުރާ ތާރީޚުން ފެށިގެން ސަރުކާރު ބަންދުނޫން 7 ދުވަހުގެ ތެރޭގައި މިނިސްޓްރީއަށް ލިޔުމުން ހުށަހެޅޭނެއެވެ.