ވީނުވީއެއް ނޭނގި ގެއްލިފައިވާ މީހުން ހޯދުމުގެ މަސައްކަތް ހަރުދަނާކުރަން ގޮވާލާ ހުށަހެޅި މައްސަލަ ބަލައެއް ނުގަތް
15 ފެބުރުއަރީ 2023 | ބުދަ 08:22އެފަދަ ފަރާތްތައް ހޯދުމަށް ކުރެވޭ މަސައްކަތައް އިތުރުކޮށް، ރައްޔިތުންގެ އިތުބާރު ލިބޭ ފަދަ ހަރުދަނާ، ދެފުށް ފެންނަ ގޮތަކަށް ކަންކަން ކުރުމަށް އެ މައްސަލައިގައި ވަނީ ގޮވާލާފައި
ރައްޔިތުންގެ މަޖިލީހުގެ ޖަލްސާގެ ތެރެއިން
ވީނުވީއެއް ނޭނގި ގެއްލިފައިވާ މީހުން ހޯދުމުގެ މަސައްކަތް ހަރުދަނާކުރަން ގޮވަލާ ހުށަހެޅި ކުއްލި މައްސަލަ ބަލައި ނުގަނެ މަޖިލީހުން ބޭރުކޮށްލައިފިއެވެ.
ރައްޔިތުންގެ މަޖިލީހުގެ ގަވާއިދުގެ 170 ވަނަ މާއްދާގެ ދަށުން މަޑުއްވަރި ދާއިރާގެ މެންބަރު އާދަމް ޝަރީފް ހުށަހަޅުއްވާފައިވާ ކުއްލި މައްސަލަ ބަހުސްކުރަން ފެންނަކަަމަށް ވޯޓުދެއްވާފައި ވަނީ 18 މެންބަރުންނެވެ. އެ ކުއްލި މައްސަލަ އަށް ބަހުސްކުރަން ނުފެންނަ ކަމަށް 29 މެންބަރުން ވަނީ ވޯޓު ދެއްވާފައެވެ.
އެ މައްސަލަ ހުށަހަޅުއްވަމުން އޭނާ ވިދާޅުވީ ދިރިހުރުމުގެ ހައްގަކީ އިސްލާމް ދީނާއި ދިވެހިރާއްޖޭގެ ޤާނޫނު އަސާސީން ކޮންމެ ދިވެހި ރައްޔިތަކަށް ލިބޭ ހައްގަކަށް ވާއިރު ވީނުވީއެއް ނޭނގި ގެއްލެމުންދާ ދިވެހިންގެ މައްސަލަތައް ގިނަވެ، އެކަމުގެ ސަބަބުން މުޖުތަމައުގައި ބިވެރުވެރިކަމާއި ކަންބޮޑުވުމާއި ހިތްދަތިކަން އިންތިހާ އަށް އިތުރުވެފައިވާ ކަމަށެވެ. ގެއްލިފައިވާ މީހުން ހޯދުމުގައި ސަރުކާރުން އެންމެ އެދެވޭ ގޮތެއްގައި މަސައްކަތް ކުރަމުން ނުދާ ކަމަށާއި އެ މީހުން ހޯދުމުގައި ސަރުކާރުން ފަރުވާ ކުޑަކުރާ ކަމުގެ ޝަކުވާ އިތުރުވެފައިވާ ކަމަށް ވެސް އޭނާ ވަނީ ވިދާޅުވެފައެވެ.
އެގޮތުން މި މަހުގެ 1 ވަނަ ދުވަހު ގެއްލިފައިވާ އއ.މަތިވެރި ހަސަން އަލީ އާއި މި މަހުގެ 4 ވަނަ ދުވަހު ގެއްލިގެން ހޯދަމުންދާ ސ.މަރަދޫ ގަސްކަރަ މުހައްމަދު އާސިރު އިސްމާއިލް އާއި ބެހޭ އެއްވެސް ޚަބަރެއް ނުވާ ކަަން އެ މައްސަލައިގައި ފާހަގަކުރައްވާފައިވެއެވެ. އޭނާ އެ މައްސަލަ ހުށަހަޅުއްވަމުން އިތުރަށް ވިދާޅުވީ މުހައްމަދު އާސިރު އިސްމާއިލް އެންމެ ފަހުން ފެނުނު ވެލާނާ އިންތަރނޭޝަނަލް އެއާޕޯޓުގެ އެކި ޑިޕާޓްމެންޓްތަކުގެ ސީސީޓީވީ ފުޓޭޖްތައް ހޯދިފައި ނުވާ ކަމަށާއި މިދިޔަ 10 ދުވަސް ތެރޭގައި އޭނާ ހޯދުމަށް އެކަށީގެންވާ މަސައްކަތްތަކެއް ކުރެވިފައިވާ ކަމަށް ގަބޫލު ނުކުރެވޭ ކަމަށެވެ. މިފަދަ މައްސަލަތައް ތަހުގީގުކުރުމުގައި ހާއްސަކޮށް މީހެއްގެ ފުރާނަ ސަލާމަތްކުރުމަށްޓަކައި ލިބެން ހުރި ހުރިހާ ހެއްކާ ގަރީނާ ހޯދުމަށް ސަރުކާރުން އަމަލުކުރަނީ ވަރަށް ޒިންމާދާރުކަން ކުޑަ ގޮތަކަކަށް ކަމަށް ވެސް އެ މައްސަލައިގައި ބުނެފައިވެއެވެ.
އެހެންކަމުން މުހައްމަދު އާސިރު އިސްމާއިލާއި ހަސަން އަލީ ވީނުވީއެއް ނެނގި ގެއްލިފައިވާ މިފަދަ ހުރިހާ ފަރާތްތައް ހޯދުމުގެ މަސައްކަތްތައް އިތުރަށް ހަލުވިކޮށް، އެފަދަ ފަރާތްތައް ހޯދުމަށް ކުރެވޭ މަސައްކަތައް އިތުރުކޮށް، ރައްޔިތުންގެ އިތުބާރު ލިބޭ ފަދަ ހަރުދަނާ، ދެފުށް ފެންނަ ގޮތަކަށް ކަންކަން ކުރުމަށް އެ މައްސަލައިގައި ވަނީ ގޮވާލާފައެވެ.
