އަޓްސޫ ހޯދުމުގެ މަސައްކަތް ކުރިއަށް، މިހާތަނަށް ފެނުނީ ދެ ބޫޓު އެކަނި

ތުރުކީ އާއި ސީރިއާ އަށް އައި ބިންހެލުމުގައި ވެއްޓުނު އިމާރާތެއްގެ ތެރޭގައި ތާށިވެފައި އޮތް ގާނާގެ ފުޓުބޯޅަ ކުޅުންތެރިޔާ ކްރިސްޓިއަން އަޓްސޫ ހޯދުމުގެ މަސައްކަތް އަދިވެސް ދަނީ ކުރިއަށް ކަމަށާއި، މިހާތަނަށް ފެނުނީ އޭނާގެ ދެ ބޫޓު އެކަނި ކަމަށް އަޓްސޫގެ އެޖެންޓް ބުނެފި އެވެ.

އަޓްސޫގެ އެޖެންޓް ބުނީ، ބިންހެލުމަށް މިހާރު ނުވަ ދުވަސްވެފައިވާއިރު، މިހާތަނަށް އަޓްސޫ ފެނިފައި ނުވާ ކަމަށެވެ. އެޖެންޓް ބުނީ އޭނާ ހުރީ ބިންހެލުން އައި ސަރަހައްދުގައި އަޓްސޫގެ އާއިލާ މެމްބަރުންނާ އެކު ކަމަށެވެ. އޭނާ ބުނީ އެތަނުން ފެންނަ މަންޒަރަކީ ކެތްކުރަން ފަސޭހެ މަންޒަރެއް ނޫން ކަމަށާއި، އެހާދިސާގެ އަސަރުކޮށްފައިވާ އެންމެންގެ ހިތާމައިގަ ބައިވެރިވެސް ވާ ކަމަށެވެ. މީގެ އިތުރުން އެ ސަރަހައްދުގައި ތިބެގެން ކުރެވެމުންދާ މަސައްކަތުގެ ތެރެއިން އަޓްސޫ ހުރި ކަމަށް ބެލެވޭ ކޮޓަރި ދެނެގަނެވިފައިވާ ކަމަށާއި، މިހާތަނަށް ފެނުނީ ހަމައެކަނި އޭނާގެ ދެ ބޫޓު ކަމަށެވެ. އެޖެންޓް ބުނީ މިއީ ވަރަށް އުނދަގޫ ވަގުތެއް ކަމަށާއި، ތުރުކީ އާއި އެހެން ޤައުމުތަކުގެ ރެސްކިއު ޓީމަށް އެމީހުން ޝުކުރު އަދާ ކުރަން ބޭނުންވާ ކަމަށެވެ. މީގެ އިތުރުން އާންމު ރައްޔިތުންނާއި، ވޮލެންޓިއާކޮށް މަސައްކަތް ކުރާ ފަރާތްތަކަށް ވެސް ޝުކުރު އަދާ ކުރަން ބޭނުންވާ ކަމަށް އަޓްސޫގެ އެޖެންޓް ބުންޏެވެ. އޭނާ ވަނީ އެތަނުގައި ތިބިއިރު، އިތުރު އެހެން ވަސީލަތްތަކެއް ވެސް ބޭނުންވާ ކަމަށް ބުނެފަ އެވެ.

އިތުރަށް ވާހަކަ ދައްކަމުން އަޓްސޫގެ އެޖެންޓް ބުނީ މިހާރު ބައެއް ކަންކަން ކުރިއަށްދާ މިންވަރު ކުޑަކޮށް ލަސްވެފައިވާ ކަމަށާއި، އަކަމުގެ ސަބަބުން މީހުން ސަލާމަތް ކުރުމަށް ވެސް އުނދަގޫވާ ކަމަށެވެ. އަދި މަސައްކަތް ކުރަން ތިބި މީހުނަށް ބޭނުންވާ ބައެއް ސާމާނު ނުލިބުމުގެ ސަބަބުން އެތައް ފުރާނައެއް ގެއްލެމުންދާ ކަމަށެވެ.

ބިންހެލުމާއި ގުޅިގެން ތުރުކީގައި މިހާރު ވަނީ ކުއްލި ނުރައްކަލުގެ ޙާލަތު ވެސް އިއުލާންކޮށްފަ އެވެ. މީގެ އިތުރުން އެ ޤައުމުގެ ފުޓުބޯޅަ ސީޒަން މެދުކަނޑާލުމަށް ފުޓުބޯޅަ ފެޑެރޭޝަނުން ވަނީ ނިންމައިފަ އެވެ. ޕްރިމިއާ ލީގުގެ ޗެލްސީ އާއި ނިއުކާސަލް އަށް ވެސް ކުޅުނު އަޓްސޫ އައީ މިހާރުގެ ކުލަބް ހަތެޔާސްޕޯ ގައި މޮޅު ކުޅުމެއް ދައްކަމުންނެވެ. ސައުދީ ދޫކޮށް އޭނާ އެ ކުލަބަށް ބަދަލުވީ ވެސް މިދިޔަ އަހަރު އެވެ. އެއް އަހަރު ދުވަހުގެ އެއްބަސްވުމުއްގެ ދަށުން އޭނާ އެ ކުލަބަށް ބަދަލުވީއިރު، އޭނާ ވަނީ ގާނާގެ ޤައުމީ ޓީމަށް ވެސް ކުޅެދީފަ އެވެ. ގާނާގެ ޤައުމީ ޓީމަށް ކުޅެދިން 65 މެޗުގައި އަޓްސޫ ވަނީ ނުވަ ލަނޑު ޖަހައިފަ އެވެ.