ދަތުރުފަތުރާއެކު އެހެނިހެން ހިދުމަތްތައް ގާއިމްވާންޖެހޭ
މަޖިލީހުގެ ޖަލްސާފައި ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވާހަކަދައްކަވަނީ
ފަތުރުވެރިކަމުގެ މައްސަލަތައް ކުރިއަށް އޮތް 2 އަހަރެއްހާ ދުވަހުގެ ތެރޭގައި ހައްލުވެގެންދާނެކަމަށް ޓުއަރިޒަމް މިނިސްޓަރ އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރ މައުސޫމް މިހެން ވިދާޅުވި މިއަދު އޮތް ރައްޔިތުންގެ މަޖިލީހުގެ ޖަލްސާގައި ހޯރަފުށީ ދާއިރާގެ މެންބަރު އަހުމަދު ސަލީމް ކުރެއްވި ސުވާލަށް ޖަވާބު ދެއްވަމުންނެވެ.
މެންބަރު ސަލީމްގެ ސުވާލަށް ޖަވާބުދެއްވަމުން މިނިސްޓަރ މައުސޫމް ވިދާޅުވީ މެންބަރު ދެއްކެވި ވާހަކައަކީ މިވަގުތު ފެންނަ މަންޒަރަށް ބަލާފައި ގަބޫލުކުރަން ރަނގަޅު ވާހަކައެއް ކަމަށެވެ. އެހެންނަމަވެސް ސަރުކާރެއްގެ ފަތުރުވެރިކަމުގެ ސިޔާސަތަކީ އެފަދަ މައްސަލަތައް ހައްލުކުރެވޭ ސިޔާސަތަކަށް ވާންޖެހޭ ކަމަށާއި، ދިވެހިރާއްޖޭގެ ފަތުރުވެރިކަން ރައްޔިތުންނާ ހަމައަށް ގެންދިއުމަށްޓަކައި ކޮމިއުނިޓީ ބޭސްޑް ޓުއަރިޒަމް ކުރިއަށް ގެންދާއިރު އޮތް އެންމެ ބޮޑު ގޮންޖެހުމަކީ ދަތުރުފަތުރު ކަމަށެވެ.
މިނިސްޓަރ ވިދާޅުވީ ކައިރީގައި އޮތް އެންމެ ބޮޑު މާކެޓް އަދި މިއަހަރު ދެވަނަ މާކެޓް އިންޑިއާއާއި އެންމެ ގާތް ރަށް ހއ. ކެލާ އަދި ހަނިމާދޫ ވެސް ދުރެއް ނޫން ކަމަށެވެ. އެހިސާބަށް މަތިންދާބޯޓު އަންނަންފެށީމާ އެ ބޮޑު މާކެޓުން ވަރަށް ބާރަށް ފަތުރުވެރިން އަންނަން ފަށާނެ ކަމަށެވެ. އިންޑިއާ މާކެޓުން މީހުން ދަތުރުކުރަނީ 4 ދުވަހަށް ކަމަށާއި، މާލެ ސަރަހައްދަށް މަތިންދާ ބޯޓެއް އައިސް، އެތެރޭގެ އުދުހުންތައް ހުރިގޮތުން އެތައްގަޑިއިރަކު މަޑުކޮށްފައި ވަރަށް ބޮޑު އަގެއްދީފައި ގެސްޓްހައުސް ހުންނަ އަތޮޅަކަށް ދަތުރުކުރުމަކީ އެއީ އެހާ ރަނގަޅު ހައްލެއް ނޫން ކަމަށެވެ.
މިނިސްޓަރ ވިދާޅުވީ ބޮޑުތިލަދުންމަތީގެ އާރުޓީއެލްގެ ހިދުމަތް ފާހަގަކޮށްލަންޖެހޭ ކަމަށެވެ. ދިވެހިންނެކޭ ބޭރު މަސައްކަތްތެރިންނެކޭ ފަތުރުވެރިންނެކޭ އެއް އަގެއްގައި ދަތުރުކުރެވޭ ކަމަށާއި، ރަށެއް ފަތުރުވެރިކަމަށް ފަހިކުރުމަށްޓަކައި ކުރަންޖެހޭ ކަންތައްތައް އެބަހުރި ކަމަށެވެ. ހަމައެކަނި ހަނިމާދޫ އިންޓަރނޭޝަނަލް އެއަރޕޯޓައް އައުމަކުން ކަމަކު ނުދާނެ ކަމަށާއި، ރަށަަށް އައިސް ފަހިކޮށް ބަނދަރުކޮށްލެވެންޖެހޭނެ ކަމަށެވެ. އެކަންތައް އެދަނީ ކުރިއަށް ކަމަށާއި، ކޮންމެ ރަށެއްގައި ފެނާއި ނަރުދަމާއި ކަރަންޓާއި އިންޓަރނެޓް ރަނގަޅަށް ހުރެ، ފަތުރުވެރިކަމުގެ ދާއިރާގައި މަސައްކަތްކުރާ ކުދިން މަސައްކަތް ކުރަމުން އާއިލާއެކު ދިރިއުޅެވޭކަމަށްވާއިރު، ތައުލީމީ ނިޒާމާއި ސިއްހީ ނިޒާމްވެސް ގާއިމްވާންޖެހޭ ކަމަށެވެ.
އެހުރިހާ ކަމެއްވެސް ދަނީ ހަމަޖެހެމުން ކަމަށާއި، ފަތުރުވެރިކަމުގެ މައްސަލަތައް ދުރުރާސްތާގައި މުޅިން ހައްލުވެގެންދާނެ ކަމަށާއި، އެއީ ކުރިއަށް އޮތް 2 އަހަރުތެރޭގައި އެ މައްސަލަ މުޅިން ހައްލުވެގެންދާނެ ވާހަކަ ކަމަށް މިނިސްޓަރ ވިދާޅުވިއެވެ.
