ރަންތާޖު ޤުރުއާން މުބާރަތުގެ މާލެ ސިޓީގެ އޮޑިޝަން ގައި 100 އާއި ގާތްކުރާ އަދަދަކަށް ބައިވެރިން ރަޖިސްޓްރީވެއްޖެއެވެ.

ތިންލައްކަ ރުފިޔާގެ ފައިސާގެ އިނާމާއެކު ކުރިއަށްގެންދާ، "ރަންތާޖު" ޤުރުއާން މުބާރާތުގެ މާލޭގެ އޮޑިޝަން އޮންނާނީ ފެބްރުއަރީ 15 އަދި 16 ވަނަ ދުވަހުގެ ހެނދުނު 9:00ން ފެށިގެން ކޮންމެ ދުވަހެއްގެ ވެސް ރޭގަނޑު 11:00 އާ ހަމައަށެވެ. އޮޑިޝަން އޮންނާނި މާލޭގެ ސޯޝަލް ސެންޓަރުގައެވެ. މާލެ ސިޓީގެ އޮޑިޝަންގައި މިހާތަނަށް އެސްއެމްއެސް މެދުވެރިކޮށް 94 ބައިވެރިން ވަނީ ރަޖިސްޓްރީވެފައެވެ.

މުބާރާތުގެ މާލޭ އޮޑިޝަންގައި ބައިވެރިވެވަޑައިގަންނަވަން ބޭނުންވާ ފަރާތްތަކުން އެ ދުވަހު އޮޑިޝަން ކުރިއަށްދާއިރު ސޯޝަލް ސެންޓަރުގެ ހޯލަށް ވަޑައިގަތުމުން އޮޑިޝަންގައި ބައިވެރިވެވޭނެއެވެ.

މާލެ ސިޓީ އޮޑިޝަންގައި ޖަޖުންގެ ގޮތުގައި ބައިވެރިވަނީ؛

- އިބްރާހިމް ޝިފާއު

- ނަސްރުﷲ އަލީ

- މުހައްމަދު ވަހީދު

- މުހައްމަދު ތައުފީގް

- އަބްދުލް ވާހިދު

މި މުބާރާތުގެ އޮޑިޝަންގައި 16 އަހަރާއި 45 އަހަރާއި ދެމެދުގެ އުމުރުފުރާގެ ކޮންމެ މީހަކަށް ވެސް ބައިވެރިވެވޭނެއެވެ.

މި މުބާރާތަކީ މިހާތަނަށް ރާއްޖޭގައި އެންމެ ފުޅާ ދާއިރާއެއްގައި ކުރިއަށްގެންދާ ޤުރުއާން މުބާރާތްކަން ފާހަގަކޮށްލެވެއެވެ. މުބާރާތުގެ އޮޑިޝަންތަކުން 20 ބައިވެރިން ހޮވުމަށް ވަނީ ހަމަޖެހިފައެވެ. އަދި މި މުބާރާތުގެ ޖަޖުންގެ ގޮތުގައި ރާއްޖޭގެ ފުންނާބު އުސް 10 ގާރީން ހަރަކާތްތެރިވެވަޑައިގަންނަވައެވެ.