ފާއިތުވި ހަފްތާގައި ރާއްޖެއިން ކޮވިޑް-19ށް ޕޮޒިޓިވްވެފައިވަނީ ދެ މީހުންކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ހާމަކޮށްފިއެވެ.

އެޗްޕީއޭއިން އާންމުކޮށްފައިވާ ތަފާސްހިސާބުތަކަށް ބަލާލާއިރު ފެބްރުއަރީ 5ން 11ށް މާލެ އާއި އަތޮޅުތަކުން އެއްވެސް މީހަކު ކޮވިޑަށް ޕޮޒިޓިވްވެފައެއްނުވެއެވެ. އެހެނިހެން ހިސާބުތަކުން 2 މީހުން ޕޮޒިޓިވްވެފައިވެއެވެ. ފާއިތުވި ހަފްތާ އެއްވެސް މީހަކަށް ހޮސްޕިޓަލްތަކުގައި އެޑްމިޓްކޮށްގެން ފަރުވާދީފައެއްނުވެއެވެ.

އޭގެކުރީ ހަފްތާ ރާއްޖެއިން ކޮވިޑް-19 ޖެހުނީ 6 މީހުންނަށެވެ. އެއީ  މާލެ ސަރަހައްދުން 3 މީހުންނާއި އަތޮޅުތަކުން 3 މީހުންނެވެ.

މިއާއެކު ރާއްޖެއިން ކޮވިޑް-19 ޖެހުނު މީހުންގެ އަދަދު ވަނީ 185،723ށް އަރާފައެވެ. އަދި 311 މީހުން ވަނީ މިބަލީގައި ނިޔާވެފައެވެ.

ވެކްސިންގެ ތަފާސްހިސާބުތަކަށް ބަލާލާއިރު ފެބްރުއަރީ މަހުގެ 11 ވަނަ ދުވަހުގެ ނިޔަލަށް ކޮވިޑް ވެކްސިންގެ ފުރަތަމަ ޑޯޒް 399،178 މީހުން ޖަހާފައިވާއިރު ދެވަނަ ޑޯޒް 385،099 މީހުން ޖަހާފައިވެއެވެ. ބޫސްޓަރ ފުރަތަމަ ޑޯޒް 167،635 މީހުން ޖަހާފައިވާއިރު ދެވަނަ ބޫސްޓަރ ޑޯޒް 1523 މީހުން ޖަހާފައިވެއެވެ.