ސާޅީސް ދެ މެމްބަރުންނަށް ވުރެ ގިނަ މެމްބަރުންގެ ސޮޔާއެކު، ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަ މި ހަފުތާތެރޭގައި ރައްޔިތުންގެ މަޖިލީހަށް ވައްދަން ނިންމާފައިވާކަން ރާއްޖެ އެމްވީއަށް އެނގިއްޖެ އެވެ.

މިކަން އިދިކޮޅު އެއްވެސް ޕާޓީއަކުން ރަސްމީކޮށް ކަށަވަރެއް ނުކޮށްދެ އެވެ.

ކާކުކަން ހާމަނުކުރުމަށް ޝަރުތުކޮށް ރާއްޖެއެމްވީއާ ވާހަކަ ދެއްކެވި ބައެއް ބޭފުޅުން ވިދާޅުވި ގޮތުގައި އިދިކޮޅު ޕާޓީތަކުން ވަނީ މަސީހުގެ އިތުބާރު ނެތްކަމުގެ މައްސަލަ މިހަފުތާގައި ވެއްދުމަށް ނިންމައިފަ އެވެ. 

މިކަމާ ގުޅޭ ގޮތުން އިދިކޮޅު އެންމެ ބޮޑު ޕާޓީ، އެމްޑީޕީގެ ޕާލިމެންޓްރީ ގްރޫޕްގެ ބައްދަލުވުމެއް ވެސް އާދީއްތަ ދުވަހު ހަވީރު ވަނީ ބާއްވައިފަ އެވެ. 

މި ހަފުތާގައި މަސީހުގެ އިތުބާރު ނެތްކަމުގެ މައްސަލަ ވައްދާނެ ކަމަށް އެ ބައްދަލުވުމުގައި ޕީޖީ ގްރޫޕުގެ ލީޑަޝިޕުން ވިދާޅުވި ކަމަށް ރާއްޖެއެމްވީއަށް ވަނީ އެނގިފަ އެވެ. މަސީހު ބޭރު ކުރުމަށް މަޖިލީހަށް ހުށަހަޅަން ޖެހޭ 42 މެންބަރުނގެ ސޮއި ހަމަވެފައިވާ ކަމަށާއި ކޮންމެ ވަގުތެއްގައިވެސް އެމައްސަލަ ވައްދާނެކަން ރަސްމީކޮށް މެންބަރުންނަށް ވަނީ އަންގާފައެވެ. ނަމަވެސް ސޮއި ކުރައްވާފައިވަ މެންބަރުންގެ ނަންތަކެއް ހާމައެއް ނުކުރައްވައެވެ. އެހެންވެ، މާލޭން ބޭރަށް އެއްވެސް މެމްބަރަކު ވަޑައިނުގެން މަޑުކުރުމަށް ވަނީ އެދިފަ އެވެ. 

އިދިކޮޅު ފަރާތްތަކާ ނުލައި ދެން އެއްވެސް ޤާނޫނެއް ފާސް ނުކުރެވޭނެ ކަމަށާއި އެއްވެސް ޤާނޫނަކަށް މަޖިލީހުން ބަދަލު ނުގެނެވެނެކަމުގެ ކަށަވަރުކަންވެސް އެމޑީޕިގެ ޕީޖީ ގްރޫޕްގެ މެމްބަރުންނަށް މިއަދު ލީޑަޝިޕުން ވަނީ ދެއްވާފައެވެ.

ރާއްޖެއެމްވީއާ ވާހަކަ ދެއްކެވި އިދިކޮޅު ޕާޓީއެއްގެ މެމްބަރަކު ވިދާޅުވީ 42 މެމްބަރުންނަށް ވުރެ ގިނަ މެމްބަރުން މިހާރު ސޮއިކުރައްވާފައިވާ ކަމަށެވެ. އަދި އެ މައްސަލަ މަޖިލީހަށް ހުށަހެޅުމާއެކު މަސީހު އިސްތިއުފާ ދެއްވާނެ ކަމަށް ގަބޫލު ކުރައްވާ ކަމަށް ވެސް އޭނާ ވިދާޅުވި އެވެ. 

މަސީހުގެ އިތުބާރު ނެތްކަމުގެ މައްސަލަ ވެއްދުމަށް މަސައްކަތްކުރާއިރު، ޕީޕީއެމްގެ ޕީޖީ ގްރޫޕްގެ ތެރޭގައި ވަނީ ބައިބައިވުން އުފެދިފަ އެވެ.