ރާއްޖެއިން ބޭރަށް ދަތުރުކުރާ ދިވެހިންނާއި ބޭރު ގައުމުތަކުގައި ދިރިއުޅޭ ދިވެހިންގެ ރައްކާތެރިކަން ކަށަވަކުރުމަށް ގޮވާލައި، ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް މަޖިލީހަށް ކުއްލި މައްސަލައެއް ހުށަހަޅުއްވައިފިއެވެ.
ޝިޔާމް ހުށަހެޅުއްވި ކުއްލި މައްސަައިގައި ބުނެފައި ވަނީ ގާނޫނުއަސާސީން ދިވެހީންނަށް ލިބޭ ހިޔާލުފާޅުކުރުމުގެ މިނިވަންކަމުގެ ބޭނުންކޮށްގެން ރާއްޖޭގެ ސިޔާދަތު އޮންނަ ސަރަހައްދެއްގައި ޚިޔާލު ފާޅުކުރުމުން، ބައެއް ގައުމުތަކުން އެ މީހުންނާ މެދު ތައައްސުފީ ގޮތެއްގައި ފިޔަވަޅު އަޅާފައިވާ ކަމަށެވެ.
އެކަމާއި މެދު ޝިޔާމް ވަނީ ކަންބޮޑުވުން ފާޅުކުރައްވާފައެވެ. ޝިޔާމް ވިދާޅުވީ ދިވެހި ފަސްގަނޑުގައި ފާޅުކުރާ ހިޔާލެއްގެ ސަބަބުން ވަކި މީހަކަށް އަމާޒުކޮށްގެން ބޭރުގެ ދައުލަތަކުން އެ ދިވެހިންނަށް އަދަބު ދޭ ނަމަ ޤާނޫނު އަަސާސީން ލިބޭ ހައްގެއް ބޭނުން ކުރުމުގެ ހައްގު ގެއްލުމުގެ ފުރުސަތު އޮތް ކަމަށެވެ. އެކަން އެގޮތަށް ހިނގާ ނަމަ ޤާނޫނު އަސާސީ އިން ލިބޭ ހައްގެއް ބޭނުން ކުރުމުގެ އިހުތިޔާރު ބިނާ ވަނީ އެހެން ދައުލަތެއްގެ ރުހުމާއި ނުރުހުމުގެ މައްޗަށް ކަމަށް ވުމުގެ ފުރުސަތު އޮތް ކަމަށް ވެސް އޭނާ ވިދާޅުވިއެވެ.
މިފަދަ ގަރާރެއް ހުށަހަޅާފައި މިވަނީ އިންޑިއާގެ ބެންގަލޫރުން ދިވެއްސަކު ހައްޔަރުކޮށްފައި ވަނިކޮށެވެ. އޭނާ އަކީ އިންޑިއާ އައުޓް ކެމްޕެއިންގައި އިސްކޮށް އުޅުނު މީހެކެވެ. ނަމަވެސް އޭނާ ހައްޔަރުކޮށްފައިވަނީ ކޮންކަހަލަ މައްސަލައެއްގެ ތުހުމަތުގައި ކަން ކަމާއި ބެހޭ އިދާރާއަކުން ރަސްމީކޮށް ހާމަކޮށްފައެއް ނުވެއެވެ.
