ތިމާވެށީގެ ކޮންސަލްޓަންޓުންގެ ކޯޑް އޮފް ކޮންޑަކްޓަށް އަމަލުކުރަން ފަށައިފިއެވެ.
އެންވަޔަރމަންޓަލް ޕްރޮޓެކްޝަން އޭޖެންސީ (އީޕީއޭ) އިން އެކުލަވާލި މި ކޯޑް އޮފް ކޮންޑަކްޓަކީ "ތިމާވެށްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ހެދުމާބެހޭ ގަވާއިދު" ގެ ދަށުން ރަޖިސްޓަރ ކުރެވޭ ތިމާވެށީގެ ކޮންސަލްޓަންޓުން ޢަމަލު ކުރަންޖެހޭ ކޯޑް އޮފް ކޮންޑަކްޓެއް ކަނޑައެޅުމަށް ޓަކައި ފާސްކޮށްފައިވާ ކޯޑް އޮފް ކޮންޑަކްޓެކެވެ.
މިއީ ތިމާވެށީގެ ކޮންސަލްޓަންޓުންނަކީ މިނިވަންކަމާއި ޒިންމާދާރުކަމާއެކު މަސައްކަތްކުރާ ބައެއް ކަމުގައި ހެދުމަށް ބާރުއެޅުމާއި، ތިމާވެށްޓަށް އަސަރު ފޯރާނެ މިންވަރު ބަޔާންކުރާ ރިޕޯޓުތަކަށް އާންމުން ކުރާ އިތުބާރު ދެމެހެއްޓުމާއި، ތިމާވެށ ގެ ކޮންސަލްޓަންޓުންގެ މިނިވަންކަމާއި ނަޒާހަތްތެރިކަން ކަށަވަރުކުރުމަށް އެކުލަވާލާފައިވާ ކޯޑު އޮފް ކޮންޑަކްޓެކެވެ.
އެގޮތުން ބަލާއިރު، ކޮންމެ ކޮންސަލްޓަންޓަކު ވެސް މަސައްކަތްކުރަންވާނީ ، އެހެން ފަރާތެއްގެ އިރުޝާދަކަށް ނުވަތަ ބާރަކަށް ނުވަތަ ނުފޫޒަކަށް ލެނބުމެއްނެތި ، ތަޢައްޞުބުން އެއްކިބާވެހުރެ، މިނިވަންކަމާއެކުގައި ކަމަށް ވަނީ ބަޔާންކޮށްފައެވެ.
އަދި ކޮންސަލްޓަންޓުން ވާންޖެހޭނީ ސިޔާސީ ނުވަތަ މާލީ ނުވަތަ އެ ނޫން ވެސް ނުފޫޒެއް ނެތި، މިނިވަންކަމާއެކު މަސައްކަތްކުރާ ބަޔަކަށްކަން ވަނީ ބަޔާންކޮށްފައެވެ.
އޭގެ އިތުރުން، ތިމާވެށްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ހެދުމުގައި ދޮގު މަޢުލޫމާތެއްދީ ނުވަތަ މަޢުލޫމާތު އޮޅުވައިލުމަށް އެއްވެސް މަސައްކަތެއް ކޮށްގެން ނުވާނެކަމަށްވެސް ކޯޑް އޮފް ކޮންޑަކްޓުގައި ބަޔާންކޮށްފައިވެއެވެ. އަދި އެއީ ޞައްޙަ މަޢުލޫމާތުކަން ކަށަވަރުކޮށް، ޝައްކު އުފެދޭ މަޢުލޫމާތެއްނަމަ، ކަމާ ގުޅުންހުރި ފަރާތެއްގެ ކިބައިން އެ މަޢުލޫމާތެއްގެ ޞައްޙަކަން ކަށަވަރުކުރުމަށްފަހު މެނުވ ތިމާވެށްޓަށް އަސަރު ފޯރާނެ މިންވަރު ބަޔާންކުރާ ރިޕޯޓުގައި އެ މަޢުލޫމާތު ހިމަނައިގެން ނުވާނެކަަމަށް ބުނެފައިވެއެވެ.
ކޮންސަލްޓަންޓަކު ކުރި ނުވަތަ ނުކޮށް ދޫކޮށްލި ކަމަކީ މި ކޯޑް އޮފް ކޮންޑަކްޓާ ޚިލާފަށް ކޮށްފައިވާ ކަމެއްނަމަ، އެ މައްސަލައަކާ ގުޅިގެން އިޖުރާއަތްތަކާ އެއްގޮތަށް ބަލައި، އަޅަންޖެހޭ ފިޔަވަޅަކާމެދު މިނިސްޓްރީ އަށް ލަފާދިނުމުގެ ބާރު، ތިމާވެށީގެ ކޮންސަލްޓަންޓުންގެ ކަންތައްތައް ބެލުމަށް ޓަކައި އެކުލަވައިލައިފައިވާ ދަފުތަރު ބޯޑަށް ލިބިގެންވެއެވެ.
