ތައުލީމީ ނިޒާމުން ފެނިގެންދަނީ ތަފާތުކުރުން، އެކަމުގެ އަސަރު ހިތިވާނެ: މުސްތަފާ
ދަސްވާރު ޕްރޮގްރާމް ކުރިއަށް ގެންދަނީ އޮޅުވާލައިގެން
ޑރ. މުސްތަފާ ލުތުފީ
ދަރިވަރުންގެ މެދުގައި ތަފާތުކުރުން ގެންގުޅޭ ގޮތަށް އެޑިއުކޭޝަން މިނިސްޓްރީން ޕްރޮގްރާމްތައް ކުރިއަށް ގެންދާ ނަމަ އެކަމުގެ އަސަރު ދަރިވަރުންނަންކޮށް ނަތީޖާ ވަރަށް ހިތި ވާނެ ކަމަށް 2013 ވަނަ އަހަރު ބޭއްވި ރިޔާސީ އިންތިހާބުގައި ރައީސް މުހައްމަދު ނަޝީދުގެ ރަނިންމޭޓް އަދި ގައުމީ ޔުނިވާސިޓީގެ ކުރީގެ ޗާންސިލަރ ޑރ. މުސްތަފާ ލުތުފީ ވިދާޅުވެއްޖެއެވެ.
ހޯމަ ދުވަހުގެ ރޭ ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަ ދައްކަވަމުން ޑރ. މުސްތަފާ ވިދާޅުވީ ރައީސް އަބްދުﷲ ޔާމީންގެ ސަރުކާރުންގެ އެޑިއުކޭޝަން މިނިސްޓްރީން ބައެއް ޕްރޮގްރާތައް ކުރިއަށް ގެންދަނީ ދަރިވަރުންނާއި ބެލެނިވެރިންނަން އޮޅުވާލައިގެން ކަމަށެވެ. ދަސްވާރު ޕްރޮގްރާމް ނަމުގައި އެޑިއުކޭޝަން މިނިސްޓްރީން ކުރިއަށްގެންދާ ޕްރޮގްރާމްގައި ދަރިވަރުންގެ މެދުގައި ތަފާތު ކުރުން ގެންގުޅޭ ކަމަށާއި އެކަމުގެ ނޭދޭވޭ އަސަރު މުސްތަގްބަލްގައި ދަރިވަރުންނަން ކުރާނެ ކަމަށް މުސްތަފާ ވިދާޅުވިއެވެ.
"ސޮސައިޓީގައި ހަމަހަމަކަމާ އިންސާފް ގެއްލޭ ގޮތަށް، މީހުން ބައިބަޔަށް އަޅާ ގޮތަށް ކަންތައްތައް ކުރާ ކަމަށްވާ ނަމަ އޭގެ އަސަރު ނުރަނގަޅު ގޮތަކަށް ނުފެނިއެއް ނުދާނެ. މިއީ ދުނިޔެ ދައްކާފައިވާ ތަޖުރިބާއެއް ފެނިފައިވާ ކަންތައް" ފަލަސުރުހީ ޕްރޮގްރާމްގައި ވާހަކަ ދައްކަވަމުން މުސްތަފާ ވިދާޅުވިއެވެ.
ދަސްވާރު ޕްރޮގްރާމްގައި އެޑިއުކޭޝަން މިނިސްޓްރީން ކަނޑައަޅާފައިވާ އުސޫލުތަކަށް އަލިއަޅުވާލައްވައި ވާހަކަ ދައްކަވަމުން މުސްތަފާ ވިދާޅުވި ގޮތުގައި ގްރޭޑް އަށެއްގައި ތައުލީމް ހާސިލްކުރާ ދަރިވަރުންގެ ނަތީޖާއަށް ބެލުމަށް ފަހު، ނަތީޖާ ރަނގަޅު ނޫން ދަރިވަރުން ސަރުކާރުން ބާކީކޮށްލަނީ ދަސްވާރު ޕްރޮގްރާމްގައި ބައިވެރިކުރުމަށް ކަމަށެވެ. އެއްވެސް ކުއްޖެއް ބާކީ ނުކުރާނެ ކަމަށް ބުނެ އެ ޕްރޮގްރާމްގައި ބައިވެރިވާ ދަރިވަރުން ހަދާ ކޯސް ނިންމުމުންދޭ ސެޓްފިކެޓަކީ ޖީސީ އޯލެވެލްގެ "ސީ" ލެވެލްގެ ތިން ފާސްކަމަށް ނިންމުމަކީ އެޑިއުކޭޝަން ސިސްޓަމާ ހިލާފަށް ކަނޑައަޅާފައިވާ އުސޫލެއް ކަމަށް މުސްތަފާ ވިދާޅުވިއެވެ.
"އުސޫލެއްގެ ގޮތުން އެއްވެސް ކުއްޖެއް ބާކީ ނުކުރާނެ ކަމަށް ބުނީމަ މީހުން ހީކުރާނެ އެއީ ވަރަށް ރަނގަޅުކަމެއް ކަމަށް. ކާކުތޯ ބޭނުންވަނީ ބާކީވާން. ކޮން ބެލެނިވެރިއެއްތޯ ބޭނުންވާނީ އޭނަގެ ދަރިފުޅު ބާކީ ކުރަން. ނުކުރާނެއެއް ނޫންތޯ. އެހެންވީމަ ކިހާ ރަނގަޅު މި ސަރުކާރުން. މިހެންހަދާފައި ގްރޫޑް އަށެއްގެ ކުދިން ދެ ބަޔަކަށް ބަހާލާފައި މި ބުނަނީ ކަލޭ ފާހެއް ނުވާނޭ ޖީސީ އޯލެވެލް އިން. ކަލޭ ހަދާށޭ އެހެން ޕްރޮގްރާމެއް. ދަސްވާރު ކިޔާ ޕްރޮގްރާމެއް. އެހެން ކުދިން ޖީސީއޯ ލެވެލް ހަދަން. އެހެންކިޔާފައި. މި ބައިކޮށްލަނީ،" މުސްތަފާ ވިދާޅުވިއެވެ.
ދަސްވާރު ޕްރޮގްރާމްގެ ދަށުން ކޮންމެ ކަހަލަ ކޯހެއް ހެދިޔަސް ޖީސީއޯ ލެވެލްއިން ތިން މާއްދާއިން "ސީ" ފާހާ އެއްވަރުގެ ސެޓްފިކެޓް ނުދެވޭނެ ކަމަށް މުސްތަފާ ވިދާޅުވިއެވެ. .
އެގޮތަށް އެކަން ކުރަނީ ރާއްޖޭގެ ތައުލީމީ ދާއިރާ ކުރިއަރުވައި ދަރިންގެ މުސްތަގްބަލަށް ވިސްނާފައި ނޫން ކަމަށް ވެސް މުސްތަފާ ވިދާޅުވިއެވެ. ދަސްވާރު ޕްރޮގްރާމްގައި ބައިވެރިކޮށް އެކުދިންނަން ވަޒީފާ ދެނީ އެކުދިންގެ މުސްތަގްބަލައި ދޭތެރޭ ތައުލީމީ ނަޒަރަކުން ވިސްނާފައި ނޫން ކަމަށާއި އެކަން ކުރަނީ މި ސަރުކާރުން ވެފައިވާ 94،000 ވަޒީފާގެ ފުރުސަތު ހޯދައި ދިނުމުގެ ވައުދު ފުއްދުމަށް ކަމަށް މުސްތަފާ ވިދާޅިވިއެވެ.
