ސަރުކާރުން ކުރަނީ އިސްރާފު، އަސަރު ކުރަނީ ރައްޔިތުންގެ ޖީބަށް: ޝިފާޒް
ސަރުކާރުގެ އާމްދަނީ އިތުރެއް ނުވޭ
އެމްޑީޕީގެ ނައިބު ރައީސް މުޙައްމަދު ޝިފާޒް
މި ސަރުކާރު ފެންނަނީ އިންތިހާއަށް އިސްރާފު ބޮޑު ސަރުކާރެއްގެ ގޮތުގައި ކަމަށާއި އޭގެ އަސަރު ރައްޔިތުންގެ ޖީބަށް ކުރަމުންދާ މަންޒަރު ފެންނަމުންދާ ކަމަށް އެމްޑީޕީގެ ނައިބު ރައީސް މުޙައްމަދު ޝިފާޒް ވިދާޅުވެއްޖެ އެވެ.
ރާއްޖެޓީވީގެ ފަލަ ސުރުޚީ ޕްރޮގްރާމުގައި ވާހަކަދައްކަވަމުން ޝިފާޒް ވިދާޅުވީ ރައްޔިތުންނަށް ލިބޭ އާމްދަނީ ބޮޑުނުވެ، މުދަލުގެ އަގު މި ވަނީ އިންތިހާއަށް ބޮޑުވެގެން ގޮސްފައި ކަމަށެވެ. އެކަމުގެ ނަތީޖާއެއްގެ ގޮތުން ރައްޔިތުންގެ ޖީބަށް ލިބެންޖެހޭ މިންވަރަށް ވުރެ ކުރަންޖެހޭ ހަރަދު ބޮޑުވެފައިވާ ކަމަށް އޭނާ ވިދާޅުވި އެވެ.
ޝިފާޒް ވިދާޅުވީ ރައީސް ނަޝީދުގެ ވެރިކަމުގައި އުވާލި ޑައިރެކްޓް ޓެކްސް އަލުން ނަގަން ފަށައި، އޭގެ މައްޗަށް ޖީއެސްޓީ ވެސް މިހާރު ދެގުނަ ނަގަން ފަށާފައި ކަމަށާއި މިފަދަ ކަންކަމުން ރައްޔިތުން މިނިވަން ކުރުމަށް އޮތް ހަމައެކަނި ހައްލަކީ ވެރިކަން ބަދަލުކުރުން ކަމަށެވެ.
ޝިފާޒްގެ ވާހަކައިގައި ފާހަކުރީ ދައުލަތުން ކުރާ ޚަރަދު ރައްޔިތުންނަށް އެނގެންޖެހޭނެ ކަމަށާއި މިފެނިގެންދަނީ ރައްޔިތުން އަތުން ޖޫރިމަނާގެ ގޮތުގައި އިންތިހާއަށް ނަގާ ފައިސާއިން ވެސް ރައްޔިތުންނަށް ރާހަތެއް ނުލިބޭ މަންޒަރު ކަމަށެވެ. އަދި ރައްޔިތުންގެ އަތުން އެކި ނަންނަމުގައި ފާއިސާ ނަގައިގެން އަންނާނެ ތަރައްޤީއެއް ވެސް އަދި ރަނގަޅުވާނެ އިޤްތިޞާދެއް ވެސް ނޯންނާނެ ކަމަށް އޭނާ ވިދާޅުވިއެވެ.
ކޮންމެ ސަރުކާރެއް އޮތް ކަމުގައިވީ ނަމަވެސް އިޤުތިޞާދު ރަނގަޅުވުމުން އިދިކޮޅު ފަރާތްތަކު ވެސް އެކަން ފާހަގަކުރާނެ ކަމަށް ޝިފާޒް ވިދާޅުވި އެވެ.
"ސިޔާސީ ޕާޓީތަކުން އިޤުތިޞާދު ރަނގަޅު ވާހަކަ ނުދައްކާ. ސަރުކާރުގެ އާމްދަނީ އިތުރެއް ނުވޭ. އެކަން ވާނަމަ ބޭރުގެ ފަރާތްތަކުންވެސް އެކަން ފާހަގަކުރީސް" އޭނާ ވިދާޅުވި އެވެ.
އިޤުތިޞާދު ރަނގަޅުވާ ކަމަށް ސަރުކާރުން ބުނި ނަމަވެސް އެކަން ނުފެންނަ ކަމަށާއި އެކަމުގެ އިހުސާސް ރައްޔިތުންނަކަށް ނުކުރާކަން ފާހަގަ ކުރައްވައި، ރައްޔިތުންނަށް މި ސަރުކާރުގެ އިޤުތިޞާދީ ސިޔާސަތުން ފައިދާއެއް ވީ ވާހަކަ ނުދެއްކުމަށް ޝިފާޒް ވަނީ ގޮވާލައްވާލާފައެވެ.
