މެކްސިކޯ ޤައުމީ ފުޓުބޯޅަ ޓީމުގެ ކޯޗަކަށް އާޖެންޓީނާގެ ޑިއޭގޯ ކޮކާ ހަމަޖައްސައިފި އެވެ.
މެކްސިކޯގެ ކޯޗުކަމުގެ މަގާމުގައި އެންމެ ފަހުން ހުރީ ޖެރާޑޯ މާޓިނޯ އެވެ. މެކްސިކޯގެ ފުޓުބޯޅަ ފެޑެރޭޝަނުން އެ ޤައުމުގެ ކޯޗަކަށް ޑިއޭގޯ ހަމަޖެއްސިކަން އިއުލާން ކުރީ ހުކުރު ދުވަހުގެ ވަގުތެއްގަ އެވެ. އެ ޤައުމުގެ ކޯޗުކަމަށް ޑިއޭގޯ ހަމަޖައްސާފައި ވަނީ 2026 ވަނަ އަހަރުގެ ނިޔަލަށެވެ. މެކްސިކޯގެ ކޯޗުކަމަށް ޑިއޭގޯ ހަމަޖެއްސީ އެ އަހަރު އެ ޤައުމުގައި އޮންނަ ފީފާ ވޯލްޑް ކަޕް މުބާރާތަށް ތައްޔާރުވުމަށެވެ. އެ އަހަރުގެ މުބާރާތް ބާއްވަނީ އެމެރިކާ، މެކްސިކޯ އަދި ކެނެޑާ އެކުވެގެންނެވެ.
ޑިއޭގޯ ހަމަޖެއްސުމަށްފަހު ވާހަކަ ދައްކަމުން މެކްސިކޯ ޤައުމީ ޓީމުގެ ޑިރެކްޓަރު ބުނީ އޭނާ އަކީ ވަރަށް ބުރަކޮށް މަސައްކަތް ކުރާ، ފުޓުބޯޅަ ދަންނަ ކޯޗެއް ކަމަށެވެ. އޭނާ ބުނީ ޑިއޭގޯ އަށް މެކްސިކޯގެ ފުޓުބޯޅަ ވަރަށް ރަނގަޅަށް އިނގޭނެ ކަމަށާއި، ޓީމެއް ގޮވައިގެން މަސައްކަތް ކުރާނެ ގޮތްތައް ވެސް އޭނާ އަށް އިނގޭނެ ކަމަށެވެ. އޭނާ ބުނީ ޤައުމީ ޓީމުން މާޗު މަހުން ފެށިގެން މެޗުތައް ކުޅުމަށް ހަމަޖެހިފައިވާ ކަމަށާއި، އުންމީދު ކުރަނީ ރަނގަޅު ނަތީޖާތަކެއް ފެނުން ކަމަށެވެ.
ކޯޗުކަމާ ހަވާލުވުމަށްފަހު ވާހަކަ ދައްކަމުން ޑިއޭގޯ ބުނީ، އޭނާ މެކްސިކޯގެ ކޯޗުކަމާ ހަވާލުވީ ހަމައެކަނި ވަޒީފާއެއް އަދާކުރުމަށް ނޫން ކަމަށެވެ. އޭނާ ބުނީ އެކަމުގެ ސަބަބުން އޭނާ އަށް ވެސް ޕްރޮފެޝަނަލް ކޯޗެއްގެ ގޮތުގައި ލޯ ހުޅުވޭނެ ކަމަށާއި، އޭނާ އަށް ވެސް ކުރިއެރުންތަކެއް ލިބޭނެ ކަމަށެވެ. އޭނާ ބުނީ މެކްސިކޯގެ ޤައުމީ ޓީމު ކުރިއަރުވައި، ޤައުމީ ޓީމަށް ކާމިޔާބު ހޯދައިދިނުމަށް ލިބުނު ފުރުސަތަކީ ދޫކޮށްލެވޭނެ ވަރުގެ ފުރުސަތެއް ނޫން ކަމަށެވެ.
މެކްސިކޯއާއެކު ޑިއޭގޯގެ އެންމެ ފުރަތަމަ މަސައްކަތަކީ ކޮންކާކަފް މުބާރާތަށް ކޮލިފައިވުމެވެ. އެ މުބާރާތުގެ ކޮލިފައިން މެޗުތައް ކުޅުމަށް ހަމަޖެހިފައި ވަނީ ޖޫން މަހު އެވެ.
