މާޒިޔާއިން ސްކޮޑް އެކުލަވާލާ ޕްރެކްޓިސް ފެށިފަހުން, ކްލަބް އީގަލްސްއިން މަޑުމަޑުން ޓީމެއް އެކުލަވާލުމުގެ މަސައްކަތް ފަށައިފިއެވެ.
އީގަލްސް ދޫކޮށް ދިޔަ ކުޅުންތެރިން ނެތްތައް ފޫބައްދާ ޓީމެއް އެކުލަވާލުމަށް ކުރާ މަސައްކަތުގެ ދަށުން އެޓީމުން ވިދާލި އިބްރާހީމް މުބީން (ކުޑަ މުއްކި) ވަނީ އަލުން ޓީމަށް ގެނެސްފައެވެ. އީގަލްސްއިން ތަޢާރަފްވެ, އެކްލަބްގައި މުއްކި މޮޅަށް ކުޅުނެވެ. 2011 ވަނަ އަހަރު އޭނާ އީގަލްސްގައި ކުޅެން ފެށީ ޔޫތް ޓީމަށެވެ. އީގަލްސްގެ ސީނިއަރ ޓީމަށް ކުޅެންފެށީ 2014 ވަނަ އަހަރުއެވެ. މުއްކި އީގަލްސްއަށް ބަދަލުވުމުން މުއްކިއަށް އީގަލްސްއަށް އިރުޝާދުދިން ކޯޗު އިހުސާން އަބުދުލްޣަނީ (ސާންތި) ވަނީ "ވެލްބަކް ބެކް" ކޮމެންޓެއް ކޮށްފައެވެ. މިއީ ސާންތި އީގަލްސްއިން ފެންނާނެކަމުގެ އިޝާރާތެކެވެ. އެކަމަކު އެކަން އީގަލްސްއިންވެސް އަދި ސާންތިވެސް ޔަޤީންކޮށެއް ނުދެއެވެ.
ސާންތިގެ އިރުޝާދުގެ ދަށުން މިދިޔަ ސީޒަންގައި ޔުނައިޓެޑް ވިކްޓްރީއަށް ކުޅުނު 19 އަހަރުން ދަށުގެ ޓީމްގެ ތިން ކުޅުންތެރިއަކުވެސް ވަނީ އީގަލްސްއަށް ސޮއިކޮށްފައެވެ. ފަސް އަހަރުގެ އެއްބަސްވުމެއްގެ ދަށުން އީގަލްސްއަށް ސޮއިކުރީ ލަމާން ޒުހެއިރުއާއި, އައިހަމް ސައީދުއާއި, އަބުދުالله އާމިންއެވެ. ޓީމްގައި ތިބި ސީނިއަރ ކުޅުންތެރިންގެ ތެރެއިން އިމްރާން ނަޝީދުއާއި ސަމީހު މޫސާ ވަނީ އެއްބަސްވުން އާކޮށްފައެވެ.
