ފަނޑިޔާރުން މަސައްކަތް ކުރައްވާ އިރު މަގްސަދަކަށް ހައްދަވަންވީ ޤާނޫނުތަކާއި ޤަވާއިދާއި އެއްގޮތަށް އަމަލުކުރައްވާ، ރައްޔިތުންގެ ސަލާމަތާއި ގައުމުގެ އާއްމު މަސްލަހަތު ހިމާޔަތް ކުރެއްވުން ކަމަށް އުއްތަމަ ފަނޑިޔާރު އަހުމަދު މުއުތަސިމް އަދުނާން ވިދާޅުވެއްޖެ އެވެ.
"ޤަޟާއީ އަހަރު 2023" އިފްތިތާޙްކޮށްދެއްވުމުގެ ރަސްމިއްޔާތުގައި ރޭ ވާހަކަފުޅު ދައްކަަމުން އެމަނިކުފާނު ވިދާޅުވީ ފަނޑިޔާރުން މަސައްކަތް ކުރައްވަނީ ޤާނޫނާއި ޤަވާއިދުތަކާއި، ޤާނޫނު އަސާސީ އާއި އެއްގޮތަށް ކަމަށާއި އެއާއި ޚިލާފަށް ޝަރުއީ ދާއިރާއިން އަމަލު ނުކުރާނެ ކަމުގެ ޔަގީންކަން ދެއްވާ ކަަމަށެވެ. އަދި ޝަރުއީ ދާއިރާ އިން އަބަދުވެސް މަސައްކަތް ކުރާނީ ގާނޫނުގެ ވެރިކަން ނަގަހައްޓާ، ހިމާޔަތްކޮށް ކުރިއެރުވުމަށް ކަމަށް ވެސް އެމަނިކުފާނު ވިދާޅުވިއެވެ. މީގެ އިތުރުން ރައްޔިތުންގެ ސަލާމަތާއި ރައްޔިތުންގެ މަންފާއަށް މި ރާއްޖޭގެ އާންމު މަސްލަހަތު ދިފާއު ކުރަން ފަނޑިޔާރުން އިސްކަން ދެއްވަން ޖެހޭ ކަމަށް އެމަނިކުފާނު ވަނީ ވިދާޅުވެފައެވެ. އުއްތަމަ ފަނޑިޔާރުގެ ވާހަކަފުޅުގައި ޝަރުޢީ ދާއިރާގައި ހަރަކާތްތެރިވާ ފަރާތްތަކުން ކުރާ ބުރަ މަސައްކަތް ފާހަގަކުރަައްވާ އެކަމަށްޓަކާ އެ ފަރާތްތަކަށް ޝުކުރު އަދާކުރައްވާފައިވެއެވެ.
އުއްތަމަ ފަނޑިޔާރު އިތުރަށް ވިދާޅުވީ، 47 އަހަރަށްފަހު ހެތްކާބެހޭ ގާނޫނު އުވި، ހެތްކާބެހޭ އާ ޤާނޫނަކާއެކު މަސައްކަތް ކުރުމަކީ ޝަރުޢީ ދާއިރާއަށް ލިބުނު ވަރަށް ބޮޑު ކުރިއެރުމެއް ކަމަށް ޤަބޫލުކުރައްވާ ކަަމަށެވެ. ފާއިތުވި އަހަރަކީވެސް ރާއްޖޭގެ މަދަނީ އިޖުރާތުގެ ނިޒާމަށް އިންޤިލާބީ ބަދަލުތަކެއް ގެނެސްދިން އަހަރެއް ކަމަށް އެމަނިކުފާނު ވިދާޅުވިއެވެ. އެގޮތުން ކޯޓުތަކަށް މައްސަލަތައް ހުށަހެޅުމާއި، މައްސަަލަތައް ކުރިއަށް ގެންދާ ގޮތާއި، މަދަނީ މައްސަލަތަކުގައި ކޯޓުތަކުން އިއްވާ ޙުކުމްތައް ތަންފީޒުކުރުމުގައި ބޮޑެތި ބަދަލުތަކެއް އައިސްފައިވާކަަމަށް ވިދާޅުވިއެވެ.
އިތުރަށް ވާހަކަދައްކަވަމުން އެމަނިކުފާނު ވިދާޅުވީ މި އަހަރަކީ ޝަރުޢީ ދާއިރާގެ ނިޒާމީ ބޮޑު ބަދަލަކަށް މިޞްރާބު ޖަހާފައިވާ އަހަރެއް ކަމަށެވެ. އެގޮތުން މިއަހަރުގެ ތެރޭގައި ޖުޑީޝަލް ސަރވިސް ކޮމިޝަން އެކުލެވިގެންވާ ގޮތް ބަދަލުކުރުމުގެ މަސައްކަތް ކުރިއަށްދާނެކަަން ފާހަގަކުރެއްވިއެވެ. އެ މަސައްކަތަކީ މުހިންމު މަސައްކަތެއް ކަމަށް ފާހަގަކުރައްވާ އުއްތަމަ ފަނޑިޔާރު ވަނީ އެ މަސައްކަތަކަށްޓަކައި ރައީސަށް މަރުޙަބާ ދަންނަވާފައެވެ. ރިޔާސީ ބަޔާނުގައި ރައީސް ވިދާޅުވެފައިވާފަދައިން، ޖުޑީޝަލް ސަރވިސް ކޮމިޝަނަށް އިޞްލާޙު ގެނައުމާއި ޤާނޫނު އަސާސީއާ ގުޅުންހުރި ޤާނޫނުތަކަށް އިޞްލާޙު ގެނައުމާއެކު، އެކަމުގެ ސަބަބުން މުޅި ޝަރުޢީ ދާއިރާއަށް ބޮޑެތި ބަދަލުތަކެއް އަންނާނެކަން އެމަނިކުފާނު ވަނީ ފާހަގަކުރައްވާފައެވެ.
އުއްތަމަ ފަނޑިޔާރު ވިދާޅުވީ، ރާއްޖޭގެ ޤާނޫނީ ނިޒާމު ތަރައްޤީވެ ކުރިއަރަމުން ދިއުމާއެކު، އެނިޒާމުގެ ޙަޤީޤީ މަޤްޞަދު ޙާޞިލްކުރެވޭނީ ޤާނޫނު ރަނގަޅަށް ތަންފީޒުވެގެން ކަމަށެވެ. އެހެންކަމުން ޤާނޫނުތައް ތަންފީޒުކުރަން ތިބި ފަރާތްތައް ޤާނޫނުތަކަށް އަހުލުވެރިވުން މުހިންމުކަމަށް އެމަނިކުފާނު ވަނީ ވިދާޅުވެފައެވެ.
