ނަފްސުގެ މުއްސަނދިކަމާއި ފުދުންތެރިކަން ހާސިލްވާނީ ދުނިޔެއަށް ދަހިވެތިވުން މެދުމިންގަނޑެއްގައި ހިފަހައްޓައިގެން: ޚުތުބާ

ނަފްސުގެ މުއްސަނދިކަމާއި، ނަފްސުގެ ފުދުންތެރިކަން ހާސިލް ކުރެވޭނީ ދުނިޔެއަށް ދަހިވެތިވުން މެދުމިންގަނޑެއްގައި ހިފަހައްޓައިގެން ކަމަށް ހުކުރު ޚުތުބާގައި ބުނެފިއެވެ.

މި ހަފްތާގެ ހުކުރު ޚުތުބާ ހާއްސަ ކޮށްފައިވަނީ ނަފްސުގެ މުއްސަނދިކަމުގެ މައްޗަށެވެ. އެގޮތުން، ތަބީއީގޮތުން އިންސާނާ، މުދާދެކެ ލޯބިވާ ކަމަށާއި އޭގެ ސަބަބުން ދުންޔަވީ އަރާމުގެ ސާމާނު އެއްކޮށް، ގިނަ ކުރަން އިންސާނާ އެދޭއިރު މިކަންކަމުގެ ސަބަބުން އޭނާ ޙައްގު މަގުން ކައްސާލައިގެން ދާތަން ފެންނަ ކަމަށް ޚުތުބާގައި ވަނީ ފާހަގަކޮށްފައެވެ.

ދުނިޔަވީ އަރާމު ހޯދުމަށް މާތްﷲ ހަރާމް ކުރައްވާފައިވާ މަގުތަކުންނާއި ވަސީލަތްތަކުން މުއްސަނދިކަން އިތުރުކުރަން އިންސާނާ މަސައްކަތް ކުރާކަން ފާހަގަކޮށް ޚުތުބާގައި ބުނީ މީގެ ސަބަބުން އިންސާނާއަށް އޭނާ ހެއްދެވި މަގުސަދު އޮޅި، ހުރިހާވެސް ބޭނުމަކީ ދުނިޔެ ހޮދުން ކަމުގައި ހަދާ ކަމަށެވެ. ނަމަވެސް އިސްލާމީ ޝަރީއަތް އައިސްފައިވަނީ ދެ ދުނިޔޭގެ ހަޔާތް ބާއްޖަވެރިކުރާނެ ގޮތް ބަޔާންކޮށްދެމުން ކަމަށައި އެހެންވެ، އިންސާނާ އެންމެ ކަންބޮޑުވާކަމަކީ ދުނިޔެ ހޯދުން އެކަނި ކަމުގައި ހަދައި، އާޚިރަތް ނަގައިނުލުމަށް އިސްލާމްދީން ގޮވާލާކަން ވެސް ޚުތުބާގައި ވަނީ ފާހަގަކޮށްފައެވެ.

ކީރިތި ރަސޫލާގެ ހަދީސެއްގައި މުއްސަނދިކަމަކީ މުދާ ގިނަވުމެއް ނޫން ކަމަށާއި މުއްސަނދިކަމަކީ ނަފްސުގެ މުއްސަނދިކަން ކަމަށް ވާކަން ފާހަގަކޮށް ޚުތުބާގައި ބުނީ މި ބަސްފުޅުން އިންސާނާ ދުނިޔޭގައި އަމާޒުހިފަންވީ މިސްރާބު ވަރަށް ރަނގަޅަށް އެނގޭ ކަމަށެވެ.

ޚުތުބާގައި ބުނިގޮތުގައި ރަސޫލާގެ ބަސްފުޅުން އެނގޭގޮތުގައި ހަގީގީ މުއްސަނދިކަމަކީ މުދަލާ ފައިސާ ގިނަވުމެއް ނޫނެވެ. އެގޮތުން، އެ މީހެއްގެ އަތުގައި ފުދި އިތުރުވާ މިންވަރަށް ހުރިހާ އެއްޗެއް ހުއްޓސް ދުނިޔެވީ އެދުންތަކަށް ނިމުމެއް ނާންނާނެ ކަމަށާއި އަބަދުވެސް އިތުރަށް އެދޭނެ ކަމަށް ވަނީ ބުނެފައެވެ. އެހެންކަމުން އެ މީހާއަކީ ފަގީރެއް ކަމަށް ވެސް ޚުތުބާގައި ވަނީ ސިފަކޮށްފައެވެ.

ނަފްސުގެ ފުދުންތެރިކަން ލިބިފައިވާ މީހާ އެދޭނީ މާތްﷲ ގެ ހަޒުރަތުގައިވާ އެއްޗަކަށްކަން ފާހަގަކޮށް ޚުތުބާގައި ބުނީ އެތަކެއްޗަކީ ފަނާވެގެންދާނެ ތަކެތި ނޫން ކަމަށެވެ.

މުއްސަނދިކަމަކީ މުދާ ގިނަވުން ނޫންކަމަށާއި އެއީ ނަފްސުގެ މުއްސަނދިކަން ކަމުގައި ރަސޫލާ ހަދީސް ކުރައްވާފައިވާ ބަސްފުޅަށް ހުރިހާ ޒަމާނެއްގައި މީސްތަކުން ތަބާވާންޖެހޭ މަތިވެރި އުސޫލެއް ކަމަށް ޚުތުބާގައި ވަނީ ބުނެފައެވެ. އަދި އެއީ ބޭރުފުށުގެ އޮފުދާރު ކަމަށް މީސްތަކުން ހެއްލިފައިވާ މި ޒަމާނަށް ހިކުމަތްތެރި ގަވާއިދެއް ކަމަށް ވެސް ވަނީ ބުނެފައެވެ.