ކުޑަގިރި ޕިކްނިކް އައިލެންޑް - ޕްރައިވެޓް އިވެންޓްތަކަށްވެސް ތަން ދޫކުރާނެ
9 ފެބުރުއަރީ 2023 | ބުރާސްފަތި 13:44ކުޑަގިރިއަށް މާލެއިންނާއި ހުޅުމާލެއިން ދިއުމުގެ އިންތިޒާމް ހަމަޖެހިފައިވާއިރު، 15 މިނެޓުން އެރަށަށް ދެވޭނެ
ކ. ކުޑަގިރި
ކުޑަގިރި ޕިކްނިކް އައިލެންޑް އާއްމުންނަށް ހުޅުވާލުމާއެކު އެރަށުން ޕްރައިވެޓް އިވެންޓްތަކަށްވެސް ތަންތަން ދޫކުރާނެކަމަށް ހައުސިންގ ޑިވެލޮޕްމެންޓް ކޯޕަރޭޝަން އެޗްޑީސީން ބުނެފިއެވެ.
އެޗްޑީސީން އެފަދައިން ބުނެފައިވާއިރު ކުޑަގިރި އާއްމުންނަށް ހުޅުވާލަން ނިންމާފައިވަނީ އަންނަ ހޮނިހިރު ދުވަހުއެވެ. އެގޮތުން ހޮނިހިރު ދުވަހު ކުޑަގިރިއަށް ދިއުމަށްޓަކައި ރަޖިސްޓްރީވުން ބުރާސްފަތި ދުވަހު ހަވީރު 04:00ގައި ހުޅުވާލުމާއެކު، ކުޑަ ވަގުތުކޮޅެއްގެ ތެރޭގައި ވަނީ ބުކިންގ ފުލްވެފައެވެ. ހޮނިހިރު ދުވަހު ކުޑަގިރިއަށް ދިއުމަށް ފުރުސަތު ހުޅުވާލީ ޖުމުލަ 300 މީހުންނަށެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެޗްޑީސީގެ ޑިރެކްޓަރ މާކެޓިންގ އެންޑް ސޭލްސް، ނިއުޝާދު ޝަރީފް ވިދާޅުވީ، ކުޑަގިރިން ޕްރައިވެޓް އިވެންޓްތަކަށް ތަންތަން ދޫކުރާނީ އެ ރަށަށް ދާ އާއްމުންނަށް އުނދަނގޫ ނުވާގޮތަށް ކަމަށެވެ. އަދި އެ ފުރުސަތު ދިނުމުގައި ބަލާނީ އާއްމުންނަށް ދަތި ނުވާނެ ގޮތަކަށް އިންތިޒާމްތައް ހަމަޖައްސާނެ ކަމަށްވެސް އޭނާ ވިދާޅުވިއެވެ. ނައުޝާދު އިތުރަށް ވިދާޅުވީ ހަފްތާ ބަންދު ދުވަސްތަކާއި ސަރުކާރު ބަންދު ދުވަސްތަކުގައި ކުޑަގިރިއަށް ދިއުމަށް އެއްވެސް ފީއެއް ނުނަގާނެ ކަމަށެވެ.
އެހެންނަމަވެސް ކުޑަގިރިއަށް އެ ދާން ބޭނުންވާ ފަރާތްތަކުން ދުރާލައި ބުކިން ހައްދަން ޖެހޭނެކަން އޭނާ ފާހަގަކުރެއްވިއެވެ. މީގެ އިތުރުން ބުކްކުރާއިރު އައިޑީކާޑު ނަމްބަރު ކަށަވަރުކުރުމަށް އޭނާ ވަނީ އެދިވަޑައިގެންފައެވެ. ބުކިންގ ހައްދާއިރު ކޮންމެ މީހަކަށްވެސް ބުކިން ހެއްދޭނީ 7 މީހުންނަށްކަން ނިއުޝާދު ފާހަގަކުރެއްވިއެވެ.
ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އެސިސްޓެންޓް މެނޭޖަރު ޕީއާރް އަހްމަދު މިމްރާހު ވަނީ، ކުޑަގިރިއަށް ދާއިރު ސަމާލުކަން ދޭންޖެހޭ ކަންކަމަށް އަލިއަޅުއްވާލައްވާފައެވެ. އެގޮތުން ތޫނު އެއްޗެއްސާއި އަދި ބާބަކިއު ހެދުމަށް ބޭނުންކުރާ އެއްޗެހިވެސް ގެންދިއުމަކީ މަނާކަމެއްކަމަށް ވިދާޅުވިއެވެ.
ކުޑަގިރިއަށް ދިއުމަށް ފެރީއަށް ދައްކަންޖެހޭނީ ކޮޅަކަށް 25 ރުފިޔާއެވެ. އަދި އެންޓްރެންސް ފީގެ ގޮތުގައި ދައްކަން ޖެހެނީ 50 ރުފިޔާއެވެ. އަދި 12 އަހަރުން ދަށުގެ ކުދިން ނަގާނީ މި އަގުތަކުގެ ދެބައިކޮށްފައި އެއްބައެވެ. އެ ފީ ވެސް ނަގަނީ ސަރުކާރު ބަންދު ދުވަސްތައް ނޫން އެހެން ދުވަސްތަކުގައި ކުޑަގިރިއަށް ދާ ނަަމައެވެ.
ކުޑަގިރިއަށް މާލެއިންނާއި ހުޅުމާލެއިން ފުރައިގެން ދިއުމުގެ އިންތިޒާމްތައް ހަމަޖެހިފައިވާއިރު، 15 މިނެޓުން ކުޑަގިރިއަށް ދެވޭނެއެވެ. ކުޑަގިރީގައި ފާޚާނާބަރި، ޗޭންޖިންގ ރޫމާއި ނަރސިންގ ރޫމްވެސް ގާއިމުކޮށްފައިވެއެވެ. އެ ނަރސިންގ ރޫމްގައި ކުޑަކުދިންގެ ނެޕީ ބަދަލުކޮށް، ތުއްތުކުދިންނަށް ގާތުން ދިނުންފަދަ ކަންކަން ފަސޭހައިން ކުރެވޭނެފަދަ އިންތިޒާމުތައް ހަމަޖައްސާފައިވެއެވެ. އަދި މިސްކިތަކާއި، ކްލިނިކަކާއި، ކޮންވީނިއެންސް ސްޓޯރަކާއި ރީޓެއިލް ސްޓޯރެއްގެ އިތުރުން، މިރަށުގައި ކެފޭއެއްވެސް ވަނީ ގާއިމުކުރެވިފައެވެ. އަދި ފެނަކަ ކޯޕަރޭޝަންގެ ފަރާތުން މިރަށުގެ ފެނާއި ކަރަންޓުގެ ޚިދުމަތް ވަނީ ފޯރުކޮށްދީފައެވެ.
