ފަނޑިޔާރުންނަށް އަމާޒުކޮށް ކުރިއަށްގެންދާ ތަމްރީން ޕްރޮގްރާމް: ދެވަނަ ބެޗްގެ ބައިވެރިން ހޮނިހިރު ދުވަހު ފުރަނީ
މިއީ ދިވެހި ފަނޑިޔާރުންނަށް އަމާޒުކޮށް އެ އެކަޑަމީން ތަމްރީނު ފޯރުކޮށްދޭ ދެވަނަ ފަހަރު
ތަމްރީނުގެ ދެވަނަ ބެޗުގައި ބައިވެރިވެވަޑައިގަންނަވާ ފަނޑިޔާރުންނާ ޖޭއެސްސީން ބައްދަލުކުރުން
އިންޑިއާގެ ބޯޕާލްގައި ހުންނަ ނޭޝަނަލް ޖުޑީޝަލް އެކެޑަމީ އޮފް އިންޑިއާގައި ކުރިއަށްގެންދާ ތަމްރީން ޕްރޮގްރާމްގެ ދެވަނަ ބެޗް ހޮނިހިރު ދުވަހު ފުރާނެކަމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ބުނެފިއެވެ.
އިންޑިއާގެ ބޯޕާލްގައި ހުންނަ ނޭޝަނަލް ޖުޑީޝަލް އެކެޑަމީ އޮފް އިންޑިއާގައި ކުރިއަށްގެންދާ މި ތަމްރީން ޕްރޮގްރާމަކީ ދިވެހިރާއްޖޭގެ ޖުޑިޝަރީގެ ޤާބިލްކަން އިތުރު ކުރުމަށްޓަކައި ބޭނުންވާ ތަމްރީން ޕްރޮގްރާމްތައް ހިންގުމަށާއި، ދާއިރާގެ ޢިލްމާއި ތަޖުރިބާ ބަދަލު ކުރުމަށް ހިންގާ ޕްރޮގްރާމެކެވެ.
މި ތަމްރީނުގެ ދެވަނަ ބެޗުގައި ބައިވެރިވެވަޑައިގަންނަވާ ފަނޑިޔާރުންނާ ޖޭއެސްސީން ވަނީ ބައްދަލުކޮށްފައެވެ. މި ބައްދަލުކުރެއްވުމުގައި އިންޑިއާ ހައިކޮމިޝަނުގެ ބައެއް ފަރާތްތަކާއި، އުއްތަމަ ފަނޑިޔާރު ޑރ.މުއުތަސިމް އަދުނާނާއި، ޖޭއެސްސީގެ އިސްވެރިން ބައިވެރިވެވަޑައިގެންނެވިއެވެ.
ޖޭއެސްސީން މައުލޫމާތު ދޭ ގޮތުގައި މިފަހަރުގެ ތަމްރީނު ޕްރޮގްރާމްގައި 50 ފަނޑިޔާރުން ބައިވެރިވެވަޑައިގަންނަވައެވެ. ދެވަނަ ބެޗުގެ ބައިވެރިން ފުރާވަޑައިގަންނަވާނީ ހޮނިހިރު ދުވަހުއެވެ.
ޖޭއެސްސީން މައުލޫމާތު ދޭ ގޮތުގައި މި ތަމްރީނު މެދުވެރިކޮށް ޖުޑީޝަރީއާ ބެހޭ މައުލޫމާތުގެ އިތުރުން، ފަނޑިޔާރުންގެ ހުނަރުތައް ކުރިއެރުވުމާއި، ކޯޓު މެނޭޖްމަންޓާއި، ކޭސް މެނޭޖްމަންޓާއި، އައިސީޓީ މެދުވެރިކޮށް ޖުޑީޝަލް ޕްރޮސެސްތައް ކުރިއަށްދާ ގޮތާއި ގުޅޭ ތަމްރީނުތައް ފޯރުކޮށްދެވިގެންދާނެއެވެ.
މިއީ ދާއިރާއާއި ގުޅޭ ދިރާސާތައް އެކުގައި ކުރުމަށް މަގުފަހި ކުރުމުގެ މަޤްޞަދުގައި، ޖުޑީޝަލް ސާރވިސް ކޮމިޝަނާއި ނެޝަނަލް ޖުޑީޝަލް އިންސްޓިޓިއުޓް އޮފް އިންޑިއާ އާ ދެމެދު 2020 ވަނަ އަހަރު ސޮއިކޮށްފައިވާ މެމޮރެންޑަމް އޮފް އަންޑަސްޓޭންޑިންގެ ދަށުން ކުރިއަށް ގެންދެވޭ ދެވަނަ ތަމްރީން ޕްރޮގްރާމެވެ.
އިންޑިއާގެ ނޭޝަނަލް ޖުޑީޝަލް އެކަޑަމީއާއި އެ ކޮމިޝަނާމެދު 2020 ވަނަ އަހަރު ވެފައިވާ އެމްއޯޔޫއެއްގެ ދަށުން، މީގެ ކުރިންވެސް 49 ފަނޑިޔާރަކު އިންޑިއާގެ ބޯޕާލްއަށް ވަޑައިގެންފައިވެއެވެ.
އިންޑިއާގެ ނޭޝަނަލް ޖުޑީޝަލް އެކަޑަމީއަކީ 1993 ވަނަ އަހަރު ޤާއިމުކޮށްފައިވާ އެކަޑަމީއެކެވެ. އެގޮތުން ފާއިތުވި އަހަރުތަކުގައިވެސް އެ އެކަޑަމީން އިންޑިއާގެ އިތުރުން، އަވައްޓެރި ޤައުމުތަކުގެ ފަނޑިޔާރުން ތަމްރީނު ކުރަމުން ގޮސްފައިވެއެވެ. އޭގެ ތެރޭގައި ބަންގްލަދޭޝް އަދި މިޔަންމާ ފަދަ ޤައުމުތައް ހިމެނޭކަމަށް ޖޭއެސްސީން މައުލޫމާތު ދެއެވެ.
