މޯލްޑިވްސް ކަސްޓަމްސް ސަރވިސްގައި އިންޓެގްރިޓީ ސެކްޝަން އުފެދުނު ފަހުން އެ ސަރވިސްގެ އެއްވެސް މުވައްޒަފަކާމެދު ބޭއިންސާފުން ފިޔަވަޅެއް އަޅާފައި ނުވާނެކަމަށް ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފް ވިދާޅުވެއްޖެއެވެ.

ބުރާސްފަތި ދުވަހު ރާއްޖެޓީވީގެ ފަށާއިރު ޕްރޮގްރާމްގައި ބައިވެރިވެވަޑައިގެން ވާހަކަ ދައްކަވަމުން ޝަރީފް ވިދާޅުވީ ކަސްޓަމްސްގެ ކޮމިޝަނަރ ޖެނެރަލްގެ މަގާމަށް ވަޑައިގެންނެވިފަހުން، އެންމެ އިސްކަމެއްދެއްވި ކަމަކީ ކަސްޓަމްސްގެ ތެރޭގައި އިންޓެގްރިޓީ ރަނގަޅުކުރުމަށް ކުރެވޭނީ ކޮންކަމެއްތޯ ބެއްލެވުން ކަމަށެވެ. އެގޮތުން އިންޓްގްރިޓީ އެންޑް ޕްރޮފެޝަނަލްސްގެ ނަމުގައި ސެކްޝަނެއް ހަދާފައިވާ ކަމަށާއި، އެ ސެކްޝަންގެ މަސައްކަތަކީ ކަސްޓަމްސްގެ މުވައްޒަފުންނަށް އިންޓެގްރިޓީ އެވެއަރނަސްދީ އަދި ވޯލްޑް ކަސްޓަމްސް އޮގަނައިޒޭޝަންގެ ގައިޑްލައިންތަކާ އެއްގޮތަށް އޭސީސީއާއި ނެޝަނަލް އިންޓެގްރިޓީ ކޮމިޝަނާ ގުޅިގެން މަސައްކަތް ކުރުން ކަމަށެވެ. މީގެ އިތުރުން ކަސްޓަމްސްއިން މިއަހަރު އިންޓެގްރިޓީ އެކްޝަން ޕްލޭނެއް ހަދާފައިވާނެކަމަށް ޝަރީފް ވިދާޅުވިއެވެ.

އޭނާ ވިދާޅުވީ އެ ޕްލޭނާ އެއްގޮތަށް ކަސްޓަމްސް ތެރޭގައި ދިމާވެފައި ހުރި މައްސަލަތައް ބަލާ ތަހުގީގުކުރުމަށްފަހުގައި އެކަށީގެންވާ ފިޔަވަޅު އަޅާފައިވާނެ ކަމަށެވެ. އޭގެ އިތުރަށް މުވައްޒަފަކަށް ފިޔަވަޅު އަޅައިފިނަމަ އެހެން މުވައްޒަފުންނަށް ވެސް އެކަން އެނގެން ހުންނާނެ ކަމަށެވެ.

ޝަރީފް ވިދާޅުވި ބައެއް މައްސަލަތަކުގައި މުވައްޒަފުން ވަޒީފާއިންވަކިކޮށްފައި ވެސް އެބަހުރި ކަމަށެވެ. އަދި ކޮންމެ މައްސަލައެއްގައި ވެސް މުވައްޒަފަކު ބޭނުންވާ ވަރަކަށް ޖަވާބުދާރީވާން އެ މުވައްޒަފަށް ފުރުސަތު ދެވިގެންދާނެ ކަމަށެވެ. އެގޮތަށް ކަންތައް ކުރާތީ ބައެއް ކަންކަން ބަލާ ނިންމުމަށް ވަރަށް ދިގު މުއްދަތެއްވެސް ނަގާ ކަމަށެވެ.

ޝަރީފް ވިދާޅުވީ ކަމެއް ދިމާވެއްޖެއްޔާ އެކަމަށް އަމަލުކުރާނެ ރަނގަޅު އުސޫލުތަކެއް ހެދިގެން މަައްސަލަތައް ބެލޭނެ ކަމަށެވެ. އަދި އެއްވެސް މުވައްޒަފަކަށް ބޭއިންސާފުން ކަމެއް ނުކުރާނެ ކަމަށާއި، ފިޔަވަޅެއް ނާޅާނެކަމުގެ ޔަގީންކަން ދެއްވާ ކަމަށެވެ. އަދި ކަމެއް ތަހުގީގުން ސާބިތުވުމުން ޖަވާބުދާރީވާން ފުރުސަތު ދެވިގެން ތަހުގީގުކުރެވިގެން ފިޔަވަޅު އަޅާނެ ކަމަށެވެ.