ކޫމަން ގަބޫލުކުރާ ގޮތުގައި ގަކްޕޯ ލިވަޕޫލާ ގުޅުނީ މާ އަވަހަށް
ހަ މެޗުން ގަކްޕޯއަށް އަދި ގޯލެއް ނުޖެހޭ
ކޯޑީ ގަކްޕޯ ޗެލްސީއާ ދެކޮޅަށް ކުޅެނީ
ވަރލްޑްކަޕްގައި ވިދާލި ނެދަލެންޑްސްގެ ފޯވާޑް ކޯދީ ގަކްޕޯ ލިވަޕޫލާ ގުޅުނީ މާ އަވަހަށްކަމަށް, ނެދަލެންޑްސްގެ ގައުމީ ކޯޗު ރޮނާލްޑް ކޫމަން ބުނެފިއެވެ.
ވަރލްޑްކަޕަށްފަހު ނެދަލެންޑްސް ކޯޗުކަމާ އަލުން ހަވާލުވި ކޫމަން ބުނީ އޭނާއަށް ގަބޫލުކުރެވޭ ގޮތުގައި ގަކްޕޯ ލިވަޕޫލާ ގުޅުނީ އެންމެ ރަނގަޅު ވަގުތުގައި ނޫންކަމަށެވެ. އަދި އޭނާއަށް ވިސްނޭ ގޮތުގައި 23 އަހަރުގެ ފޯވާޑް ލިވަޕޫލާ ގުޅުން އަވަސްކަމަށް ކޫމަންއާ ހަވާލާދީ ރިޕޯރޓްކޮށްފައިވެއެވެ. ގަކްޕޯ ލިވަޕޫލާ ގުޅުނީ ޖެނުއަރީ ޓްރާންސްފާގައެވެ. މިހާތަނަށް ކުޅުނު ހަ މެޗުން ގޯލެއް ނުޖެހެއެވެ. ލީގުގައި ތިން މެޗު އެފްއޭކަޕްގައި ތިން މެޗު ވަނީ ކުޅެފައެވެ. ލިވަޕޫލްވެސް އޮތީ ރަނގަޅު ހާލަތެއްގައެއް ނޫނެވެ. ލީގުގައި ލިވަޕޫލް އޮތީ 29 ޕޮއިންޓާއެކު 10 ވަނައިގައެވެ.
ކޫމަން ފާހަގަކުރީ ރަނގަޅު ހާލަތެއްގައި ލިވަޕޫލް ނެތީސް އެޓީމާ ގަކްޕޯ ގުޅުމެވެ. ގައުމީ ކޯޗު ބުނީ ލަނޑު ނުޖެހޭނަމަ ކުޅުންތެރިޔާގެ މުހިއްމުކަމެއް ނެތްކަމަށާއި, އެހާލަތުގައި ޓީމް މޮޅުވެސް ނުވާނެކަމަށެވެ. އެފަދަ ހާލަތަކީ ޚާއްޞަކޮށް ޒުވާން ކުޅުންތެރިންނަށް އުނދަގޫ ހާލަތެއްކަން ކޫމަން ފާހަގަކުރިއެވެ. އޭނާ ބުނީ ތަޖުރިބާއާއެކު ހުރި 28 ހަކަށް އަހަރުގެ ކުޅުންތެރިއްގެ ހާލަތު ތަފާތުވާނެކަމަށެވެ.
ގަކްޕޯ ލިވަޕޫލަށް ބަދަލުވީ ރަނގަޅު ފޯމެއްގައި ހުރެއެވެ. ވަރލްޑްކަޕްގައި ހަ މެޗުން ތިން ގޯލް ގައުމީ ޓީމަށް ޖެހިއެވެ. ނެދަލެންޑްސް ލީގުގައި ޕީއެސްޖީ އަށް ކުޅުނު 14 މެޗުން ނުވަ ގޯލް ޖަހާ 12 ގޯލް ޖަހަން ފުރުޞަތު ތަނަވަސްކޮށްދިނެވެ.
