މަސީހުގެ އިތުބާރު ނެތްކަމުގެ ވޯޓް ނަގަނީ ސިޔާސީ ހަސަދަވެރިކަމާއި ރުޅިވެރިކަން އޮތުމުން:ރައީސް
1 ޖުލައި 2017 | ހޮނިހިރު 15:42މަސީހުގެ އިތުބާރު ނެތްކަމުގެ ވޯޓުނެގުމަކީ ގައުމީ މަސްލަހަތު އެކުލެވޭ ކަމެއް ނޫން
ރައީސުލްޖުމްހޫރީއްޔާ އަބްދުﷲ ޔާމީން އަބްދުލް ގައްޔޫމް
ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތްކަމުގެ ވޯޓް ނަގަނީ ސިޔާސީ ހަސަދަވެރި ކަމާއި ރުޅިވެރިކަން އޮތުމުން ކަމަށް ރައީސުލްޖުމްހޫރީއްޔާ އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެއެވެ.
ރާއްޖެއެމްވީ އަށް ސްކްރީންޝޮޓެއް ލިބިފައިވާ ޕީޕީއެމްގެ ވައިބާ ގްރޫޕްގައި ރައީސް ޔާމީން ވިދާޅުވެފައި ވަނީ މަޖިލީހުގެ ރައީސް މަސީހުގެ އިތުބާރު ނެތްކަމުގެ ވޯޓެއް ނެގުމަށް މަސައްކަތް ކުރަނީ އަސްލެއް ނެތް ކަންތައްތަކެއްގެ މައްޗަށް ބިނާކޮށް ކަމަށެވެ.
މަޖިލީހުގެ ރައީސް ކަމުގެ މަގާމުން މަސީހު ދުރުކުރުމަށް ފަހު އެ މަގާމަށް ގެންނަން އުޅެނީ ވަރަށް ސާފްތާހިރު މީހެއްތޯ ވިދާޅުވެ ރައީސް ޔާމީން ވަނީ ސުވާލު އުފައްދަވާފައެވެ.
އެމަނިކުފާން ވިދާޅުވީ ރައްޔިތުންގެ މަޖިލީހުގެ ރައީސްގެ މަގާމުން މަސީހު ދުރުކުރުމަށް ވޯޓް ނެގުމަކީ ގައުމީ މަސްލަހަތު އެކުލެވޭ ކަމެއް ނޫން ކަމަށާއި މަސީހުގެ އިތުބާރު ނެތް ކަމުގެ ވޯޓެއް ނެގުމަށް މަސައްކަތް ކުރަނީ ގާނޫނުން ރެކެން ކަމަށް ރައީސް ޔާމީން ވިދާޅުވެފައިވެއެވެ.
