ޚުދުމުޚުތާރު ކަމަށް ދުނިޔެއިން ސިފަ ކުރި ޖެނެރަލް މުޝައްރަފަށް ޕާކިސްތާނުން ތަފާތު ސިފަ ކުރުމެއް

1999 ވަނަ އަހަރު ބަޣާވާތަކުން ޕާކިސްތާނުގެ ލީޑަރުކަން ހޯއްދަވާ، ގާތްގަނޑަކަށް 10 ވަރަކަށް އަހަރު ވަންދެން އެ ޤައުމުގައި ވެރިކަން ކުރެއްވި '4 ތަރި އެރި' އަސްކަރީ ޖެނެރަލް، ޕަރްވޭޒް މުޝައްރަފު، ގިނަ ދުވަސްތަކެއް ވަންދެން އާލާސްކަންފުޅާ އުޅުއްވުމަށްފަހު އަވަހާރަވިކަން ޕާކިސްތާނުގެ މީޑިއާއިން އިޢުލާން ކުރީ ފެބުރުއަރީ 5 ވަނަ ދުވަހުއެވެ. ޢުމުރުފުޅުން 79 އަހަރުގައި އަވަހާރަވީއިރު މުޝައްރަފު ވަނީ އަމިއްލަފުޅަށް އަރުވާލެވިގެން ޤައުމުން ބޭރުގައި ގިނަ އަހަރުތަކެއް ހޭދަ ކުރައްވާފައެވެ. ވެރިކަމުގެ ޝާނާއި ޝައުކަތު އޭގެ އެންމެ ބޮންތީގައި އޮތް ދުވަސްވަރު، އަލް-ޤައިދާއާއި އެނޫންވެސް ހަތިޔާރުއެޅި ޖަމާޢަތްތަކުން ވަނީ މުޝައްރަފު އަވަހާރަކޮށްލުމަށް 3 ފަހަރެއްގެ މަތިން މަސައްކަތްވެސް ކޮށްފައެވެ.

ނަމަވެސް އަސްކަރިއްޔާގެ ފުރިހަމަ ބާރާއި ތާޢީދު ނަންގަވައިގެން ހުންނެވުމާއެކު، މުޝައްރަފު ވަނީ އޭނާއާ ދެކޮޅަށް ތެދުވާ ކޮންމެ ބަޔަކު ބަލި ކުރައްވާފައެވެ. ދުނިޔޭގެ އެންމެ ވަރުގަދަ ނުފޫޒުގެ ގޮތުގައި އޮތް އެމެރިކާގެ ތާޢީދުވެސް އޮތް މުޝައްރަފުގެ ވެރިކަން ވެއްޓުމުގައި އަލްޤައިދާއާއި އަފްޣާން ޠާލިބާނުންނާ ދެކޮޅަށް އެމެރިކާއިން ކުރި ހަނގުރާމައިގެ ދައުރު ބޮޑުކަން ހަނދާން ނައްތާލެވޭކަށް ނެތެވެ.

ކޮންމެ ގޮތަށް އެ ދުވަސްވަރު ކަން ހިނގާފައި އޮތް ކަމުގައި ވީ ނަމަވެސް، މުޝައްރަފު އަވަހާރަވުމާ ގުޅިގެން ފެބުރުއަރީ 5 ވަނަ ދުވަހު ރޮއިޓަރޒްއިން ވާހަކަ ދެއްކި ޕާކިސްތާނުގެ އާންމުން ބުނީ ތަފާތު ވާހަކައެކެވެ. ޚުދުމުޚުތާރު އަސްކަރީ ލީޑަރެއްގެ ގޮތުގައި ދުނިޔެއިން ސިފަ ކުރަމުން ދިޔަ ޖެނެރަލް ޕަރްވޭޒް މުޝައްރަފާ ބެހޭ ގޮތުން ޕާކިސްތާނުގެ ރައްޔިތުންގެ ފަރާތުން އިވުނީ ތަފާތު ވާހަކައެކެވެ.

މުޝައްރަފުގެ ވެރިކަމުގެ ދުވަސްވަރަކީ ބޭރުގެ ފަރާތްތަކުން ޕާކިސްތާނުގައި އިންވެސްޓް ކުރުން މެކުހަށް ޖަހާފައި އޮތް ދުވަސްވަރެކެވެ. އަހަރުން އަހަރަށް އިޤްތިޞާދު ކުރިއަރާދާ މިންވަރުވެސް ދިޔައީ އިތުރު ވަމުންނެވެ. އަހަރުން އަހަރަށް އިޤްތިޞާދު ކުރިއެރި މިންވަރު، 7.5 ޕަސެންޓަށްވެސް އެރި މަންޒަރު ފެނުނެވެ. ވޯލްޑް ބޭންކުގެ ތަފާސް ހިސާބުތަކަށް ބަލާއިރު، 30 އަހަރުގެ މާޒީގެ ރެކޯޑެކެވެ.

މުޝައްރަފު އަވަހާރަވުމާއެކު ޕާކިސްތާނުގެ ވިޔަފާރި އާބާދުން ވަނީ، އެއީ ހިތާމައިގެ ދުވަހެއް ކަމުގައި ކަނޑައަޅާފައެވެ.

މުޝައްރަފުގެ ވެރިކަމުގެ ފަހު ދުވަސްތައް ވެގެން ދިޔައީ އޭނާގެ ޚުދުމުޚުތާރުވެރިކަމުގެ ވާހަކަތައް ގިނަ ބަޔަކު ދެއްކި ދުވަސްވަރަކަށެވެ. 2001 ވަނަ އަހަރުން ފެށިގެން 2008 ވަނަ އަހަރުގެ ނިޔަލަށް ޕާކިސްތާނުގެ ރައީސްކަން ކުރެއްވި މުޝައްރަފަކީ ޕާކިސްތާނުގެ ލީޑަރެއްގެ ގޮތުގައި އެގައުމަށް އެންމެ ގިނަ ދުވަހު ޚިދުމަތް ކުރެއްވި އެއް ލީޑަރުވެސްމެއެވެ.