ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަލް ނަޞްރަށް ބަދަލުވި ފަހުން ކަންކަން ވަރަށް އުނދަގޫވެފައިވާ ކަމަށް އެ ކުލަބަށް ކުޅެމުން އަންނަ ބްރެޒިލްގެ ޑިފެންސިވް މިޑްފީލްޑަރު ލުއިޒް ގުސްޓާވޯ ބުނެފި އެވެ.

މެންޗެސްޓަރ ޔުނައިޓެޑު ދޫކޮށް ރޮނާލްޑޯ އަލް ނަޞްރަށް ބަދަލުވީ މިދިޔަ އަހަރުގެ ފަހު ކޮޅު އެވެ. އެއީ އެ ކުލަބުގެ ވެރިންނާ ރޮނާލްޑޯއާ ޖެހުނު މައްސަލައެއްގަ އެވެ. ބޮޑު މުސާރައަކަށް ރޮނާލްޑޯ އަލް ނަޞްރަށް ބަދަލުވީއިރު، އޭނާ އަކީ މިހާރު އެ ޓީމުގެ ކެޕްޓަން އެވެ. ސައުދީ ޕްރޯ ލީގުގައި އަލް ނަޞްރަށް ރޮނާލްޑޯ ވަނީ މިހާތަނަށް ތިން މެޗު ކުޅެދީ، އެއް ލަނޑު ޖަހައިފަ އެވެ. ގުސްޓާވޯ ބުނީ ރޮނާލްޑޯ ޓީމާ ގުޅުނު ފަހުން އޭނާ އާއި ކުލަބުގެ ބައެއް އެހެން ކުޅުންތެރިންނަށް ވެސް އުނދަގޫތަކެއް ކުރިމަތިވާ ކަމަށެވެ. މީގެ އިތުރުން އޭނާ ބުނީ ރޮނާލްޑޯ އަލް ނަޞްރުގައި ހުރުމުގެ ސަބަބުން، އިދިކޮޅު ޓީމުތަކުން އެ ކުލަބަށް މާ ބޮޑަށް ޓާގެޓު ކުރަމުން އަންނަ ކަމަށެވެ. އަދި ރޮނާލްޑޯ އެހެން އެންމެނަށް އިތުރު ހިތްވަރެއް ދޭ ކަމަށް ވެސް ގުސްޓާވޯ ބުންޏެވެ.

ރޮނާލްޑޯ އަލް ނަޞްރަށް ސޮއި ކުރީ ދެ އަހަރުގެ އެއްބަސްވުމެއްގަ އެވެ. އޭނާގެ އެއްބަސްވުމުގެ އަގު 213 މިލިއަން ޑޮރަލަށް އަރާކަމަށް ރިޕޯޓުތައް ބުނެއެވެ. ރޮނާލްޑޯ އަކީ ސައޫދީ ލީގުގައި ކުޅޭނެ އެންމެ ޓޮޕް އެތުލީޓެވެ. އަލް ނަސްރުން ދެކެނީ ރޮނާލްޑޯ އެކްލަބަށް ސޮއިކުރުމަކީ ފުޓްބޯޅަ ތާރީޚު ބަދަލުކޮށްލުން ކަމަށެވެ. އަދި އެއީ އެކުލަބާއި, އެގައުމާއި, އެގައުމުގެ އަންނަން އޮތް ޖީލުތަކަށްވެސް ނަމޫނާއެއްކަމަށް އެ ކުލަބުން ބުނެފައިވެ އެވެ.