އިމާދުއްދީން ބަލިކޮށް ފައިނަލްގެ ފަހު ޖާގަ ރެހެންދި އަށް

އިންޓަ ސްކޫލް 17 އަހަރުން ދަށުގެ ފުޓުބޯޅަ މުބާރާތުގެ ސެމީ ފައިނަލްގައި އިމާދުއްދީން ސްކޫލް ބަލިކޮށް ރެހެންދި ސްކޫލް އިން ފައިނަލްގެ ފަހު ޖާގަ ހޯދައިފި އެވެ.

ހޯމަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ރެހެންދިން ކާމިޔާބު ކުރީ 4-1 އިންނެވެ. މެޗުގެ ހުރިހާ ލަނޑެއް ވެސް ފެނުނީ ފުރަތަމަ ވަނަ ހާފުގަ އެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ރެހެންދިންނެވެ. މެޗުގެ ހަތަރު ވަނަ މިނެޓުގައި އެ ޓީމަށް ލީޑު ނަގައިދިނީ އަޙުމަދު ޝަނާން އިބްރާހީމް އެވެ. ނަމަވެސް އޭގެ ހަތަރު މިނެޓު ފަހުން އިމާދުއްދީންގެ އަޙުމަދު މިކްޔާލް މުއީން ވަނީ ލަނޑެއް ޖަހައި އެ ޓީމަށް މެޗުގެ ނަތީޖާ ހަމަހަމަކޮށްދީފަ އެވެ. މެޗުގައި ރެހެންދި އަށް ދެ ވަނަ ފަހަރަށް ލީޑު ނަގައިދިނީ ޢަބްދުއް އައްވަލު މައުރޫފް އެވެ. އޭގެ ފަހުން މެޗުގެ 32 ވަނަ މިނެޓުގައި ރެހެންދިގެ ތިން ވަނަ ލަނޑު ޖެހީ ޝާއިން އިބްރާހީމް ރަމީޒް އެވެ. ރެހެންދިގެ ހަތަރު ވަނަ ލަނޑު ފުރަތަމަ ހާފުގެ އިތުރު ވަގުތުގައި ޖެހީ އަޙުމަދު އަކްމަލް ނިޒާމް އެވެ.

މެޗުން މޮޅުވެ ރެހެންދި ފައިނަލަށް ދަތުރުކުރިއިރު، ފައިނަލްގައި މި މަހުގެ ނުވަ ވަނަ ދުވަހުގެ ރޭ އެ ޓީމު ނުކުންނާނީ ކަލާފާނު ސްކޫލާ ދެކޮޅަށެވެ.