ގުރައިދޫ ބަލިކޮށް ކަލާފާނު ފައިނަލަށް، މެޗަށް ފަހު ބޮޑު ހަމަނުޖެހުމެއް

އިންޓަ ސްކޫލް 17 އަހަތުން ދަށުގެ ފުޓުބޯޅަ މުބާރާތުގެ ސެމީ ފައިނަލްގައި ގުރައިދޫ ސްކޫލް ބަލިކޮށް، ކަލާފާނު ސްކޫލް މުބާރާތުގެ ފައިނަލުން ޖާގަ ހޯދައިފި އެވެ.

ގަލޮޅު ރަސްމީ ދަނޑުގައި ހޯމަ ދުވަހުގެ ހަވީރު ކުޅުނު މެޗު ކަލާފާނުން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ކުރި ހޯދީ ވެސް ކަލާފާނު ސްކޫލް އިންނެވެ. އެއީ މެޗުގެ 33 ވަނަ މިނެޓުގައި ގުރައިދޫގެ އަޙުމަދު ޖަޒްލާންގެ އަތުން ބައިކޮޅަށް ވަތް ލަނޑުންނެވެ. ނަމަވެސް ދެ ވަނަ ހާފުގައި ގުރައިދޫން ވަނީ ލަނޑެއް ޖަހައި ނަތީޖާ ހަމަހަމަކޮށްފަ އެވެ. އެ ޓީމަށް ނަތީޖާ ހަމަހަމަކޮށްދިނީ އިސްމާއީލް އީގަން އާދަމް އެވެ. މެޗުން ކަލާފާނު މޮޅުވި ލަނޑު ޖަހައިދިނީ އިބްރާހީމް އަލޫފް ޝިފާން އެވެ. މެޗަށް ފަހު ވަނީ ދަނޑު މަތީގައި ބޮޑު ހަމަނުޖެހުންތަކެއް ވެސް ހިނގައިފަ އެވެ.

މެޗަށް ފަހު ގުރައިދޫ ސްކޫލްގެ ބެލެނިވެރިންނާއި އޮފިޝަލުން އަދި ދަރިވަރުން ވަނީ މެޗުގެ ރެފްރީ އަށް ހަމަލާ ދިނުމަށް މަސައްކަތްކޮށްފަ އެވެ. އެ ޓީމުގެ ބެލެނިވެރިންނާއި އޮފިޝަލުން ވަނީ ރެފްރީ ފަހަތުން ދުވެ، ހަމަނުޖެހުން ހިންގައިފަ އެވެ. އެކަމުގެ މަންޒަރުތައް ފެންނަ ވީޑިއޯތައް އަންނަނީ ސޯޝަލް މީޑިއާގައި ދައުރުވަމުންނެވެ.

މި އަހަރުގެ އިންޓަ ސްކޫލް މުބާރާތުގެ ފައިނަލް ކުޅުމަށް ހަމަޖެހިފައި ވަނީ މި މަހުގެ ނުވަ ވަނަ ދުވަހު އެވެ.