އަދީބު ޖަލުގައި މަރާލަން ދޫކޮށްލުމަކީ މާދަމާ އެހެން މީހުން ޖަލުގައި މެރުމަށް ދޫކޮށްލުން: އާޒިމް
1 ޖުލައި 2017 | ހޮނިހިރު 11:15އާޒިމް ވިދާޅުވީ ޖަލުގައި ތިބޭ ބައެއް ގައިދީންގެ ހައްގުތައް ކަރެކްޝަނުން ހިފަހައްޓާކަމަށް
ކުރީގެ ޑިފެންސް މިނިސްޓަރު ކާނަލް ނާޒިމް އާއި ނާޒިމްގެ ކޮއްކޮ އާދަމް އާޒިމް
ކުރީގެ ނައިބު ރައީސް އަހުމަދު އަދީބު ބޭސްފަރުވާއިން މަހުރޫމްކޮށް، ޖަލުގައި މަރުވާން ދޫކޮށްލުމަކީ ކުރިއަށް އޮތްތާނގައި އެހެން މީހުން ޖަލުގައި މަރުވާން ދޫކޮށްލުން ކަމަށް ކުރީގެ ޑިފެންސް މިނިސްޓަރު ކާނަމް މުހައްމަދު ނާޒިމްގެ ކޮއްކޮ އާދަމް އާޒިމް ވިދާޅުވެއްޖެ އެވެ.
މޯލްޑިވްސް ކަރެކްޝަނަލް ސާރވިސްގެ ބެލުމުގެ ދަށުން ހިންގަމުން އަންނަ މާލޭ ޖަލުގެ ކުރިމަތީ ހުންނަވާ ހޮނިހިރު ދުވަހު ނޫސްވެރިންނަށް މައުލޫމާތު ދެއްވަމުން އާޒިމް ވިދާޅުވީ އަދީބުގެ ބޭސްފަރުވާގެ ކަންކަން ދައުލަތުން ފޯރުކޮށްދޭންޖެހޭ ކަމަށާއި އެކަން ކުރެވެން އޮތް ގޮތަކަށް ހަމަޖެހެންޖެހޭ ކަމަށެވެ.
އަދީބުގެ ބޭސްފަރުވާގެ ކަންކަން ރާއްޖޭން ބޭރުން ކުރުމަށް ޑޮކްޓަރުން ލަފާދެއްވާފައިވާއިރު ކަރެކްޝަންސް އިން އެކަން ހަމަނުޖައްސައި އަދީބު ޖަލުގައި މަރުވުމަށް ދޫކޮށްލުމަކީ މާދަމާ އެފަދަ އެގޮތެއް އެހެން ރައްޔިތަކަށްވެސް ދިމާވުން ވަރަށް ކައިރިކަމަކަށ ްވާއިރު، ރައްޔިތުން އަދީބުގެ ބޭސްފަރުވާގެ ކަންކަން ހަމަޖެއްސުމަށް ތެދުވާންޖެހޭ ކަމަށް އާޒިމް ވިދާޅުވި އެވެ.
އަދީބު ބޭސްފަރުވާއަށް ފޮނުވުމަކީ މަޖިލީހުގެ ތެރެއިން ވެސް ކުރެވިދާނެ ކަމެއް ކަމަށް އޭނާ ވިދާޅުވި އެވެ.
އަދީބުގެ ބޭސްފަރުވާގެ ކަންކަން ކުރުމަށް އާޒިމް ދައުލަތުގެ ކަމާބެހޭ އިދާރާތަކަށް ގޮވާލައްވާފައިވާއިރު، އަދީބު ވަނީ އާޒިމްގެ ބޭބެ ކާނަލް ނާޒިމްގެ މައްޗަށް ކޯޓްތަކުން ސާބިތުވާ ކަމަށް ނިންމައި، 11 އަހަރަށް ނާޒިމް ޖަލަށްލުމަށް ކޮށްފައިވާ ހުކުމަކީ އޭގައި އެއްވެސް އަސްލެއް ނެތް ދައުވާއެއް ކަމަށާއި އެ ފިސްތޯލައާ ނާޒިމާ އެއްވެސް ގުޅުމެއް ނެތް ކަމަށް ވިދާޅުވެ، ސުޕްރީމް ކޯޓަށް ސިޓީއެއް ފޮނުއްވައިފަ އެވެ.
