ރައީސް ސާލިހުގެ 5 ވަނަ ރިޔާސީ ބަޔާން - ފާހަގަކޮށްލެވޭ އުސްއަލިތައް
މޭ މަހުގެ 1ން ފެށިގެން ސިއްހީ ދާއިރާގެ މުވައްޒަފުންގެ މުސާރަ ބޮޑުވާނެ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ފަސްވަނަ ރިޔާސީ ބަޔާން މިވަނީ ހޯމަ ދުވަހު އިއްވަވާފައެވެ. ރައީސް ސާލިހުގެ ސަރުކާރަށް 4 އަހަރު ފުރި 5 ވަނަ އަހަރު ގުނަމުންދާއިރު، ރިޔާސީ ބަޔާނުގައި ރައީސް ވަނީ އެމަނިކުފާނު ވެރިކަމާ ހަވާލުވެވަޑައިގަތް ދުވަހުން ފެށިގެން މިހާތަނަށް ކުރައްވާފައިވާ ކަންކަމާއި އެކަންކަމުގެ ނަތީޖާ ހިއްސާކުރައްވާފައެވެ. ކުރަމުން އަންނަ ކަންކަމާއި، ނިމިފައިވާ ކަންކަމާއި، 10 އަހަރު ވާއިރު ރާއްޖެ އޮންނާނެ ގޮތުގެ މަންޒަރެއް ކުރައްސަވާފައެވެ. ފާއިތުވި 4 އަހަރަކީ އޭގެ ކުރިން ހިނގައިދިޔަ އަހަރުތަކަށްވުރެ ހަމަޖެހުމާއި އާންމު މަސްލަހަތަށް އިސްކަން ދެއްވި ހަތަރު އަހަރު ކަމަށް ވިދާޅުވެ ރައީސް ވިދާޅުވީ، ކުރިޔަށް އޮތް ތަނުގައިވެސް އެންމެ ބޮޑު އިސްކަމެއް ދެއްވާނީ އާންމު މަސްލަހަތު ދެމެހެއްޓެވުމަށްކަމަށެވެ.
"ސަރުކާރަށް ހައްތަހާވެސް ތިބޭނީ ހަމަހަމަ ދިވެހި ރައްޔިތުން"ކަމަށް ވިދާޅުވާ ވިދާޅުވުން ތަކުރާރުކުރައްވައި، ރައްޔިތުންނަށްޓަކައި ކޮށްދެއްވި ކަންކަން ރައީސް ފާހަގަކުރެއްވިއެވެ. ރައީސް ވިދާޅުވީ ރާއްޖެއަށް ގެންނަން ވައުދުވެވަޑައިގަތީ ބޮޑު ބަދަލެއްކަމަށާއި، އެއީ ވަކި ތަރުތީބަކުން ގެނެވި އިންތިޒާމްކޮށްގެން ނޫނީ ޒަމާންތަކަށް ދެމިނޯންނާނެ ފަދަ ބަދަލެއްކަމަށެވެ. އެ ބަދަލުގެ ފަހަތުގައި ވަނީ ރައްޔިތުންގެ އުފާފާގަތި ދިރިއުޅުމާއި ބާއްޖަވެރިކަން ކަމަށާއި، ތަނަވަސްކަމާއި ފުދުންތެރިކަމާއި ތިޔާގިކަން ކަމަށެވެ. އެކަމަށްޓަކައި ސަރުކާރުން ހިންގާ ސިޔާސަތުތަކުގައި ތަފާތެއް އޮވެގެން ނުވާނެކަމަށް ވިދާޅުވެ، ރައީސް ވިދާޅުވީ އަމާޒެއް އޮންނަންވާނެ ކަމަށެވެ.
