ރިސޯޓްތަކާއި ސިނާއީ ތަންތަނުގައި މަދުވެގެން 30 މީހުން ރީ-ރަޖިސްޓަރީ ކޮށްފިނަމަ އެތަނެއްގައި ވޯޓުފޮށި ބަހައްޓާނެ
6 ފެބުރުއަރީ 2023 | ހޯމަ 08:28ރާއްޖޭގެ އެމްބަސީ އަދި ކޮންސިއުލޭޓެއް ހުންނަނަމަ، އެ ޤައުމެއްގައި ވޯޓު ފޮށި ބަހައްޓާނެ
އިލެކްޝަންސް ކޮމިޝަން
ރިސޯޓްތަކާއި ސިނާއީ މަސައްކަތްކުރާ ތަންތަނުގައި މަދުވެގެން 30 މީހުން ރީ-ރަޖިސްޓަރީ ކޮށްފިނަމަ، ރިޔާސީ އިންތިހާބުގައި، އެތަނެއްގައި ވޯޓުލާ މަރުކަޒެއް ޤާއިމުކުރާ ގޮތަށް އިލެކްޝަންސް ކޮމިޝަން (އީސީ) އިން ނިންމައިފިއެވެ.
އެކަން ހާމަކުރައްވާފައިވަނީ އެ ކޮމިޝަނުގެ މެމްބަރު އިސްމާއިލް ހަބީބް ކުރެއްވި ޓްވީޓެއްގައެވެ. އެގޮތުން ރިސޯޓްތަކާއި ސިނާއީ މަސައްކަތްކުރާ ތަންތަނުގައި މަދުވެގެން 30 މީހުން ރީ-ރަޖިސްޓަރީ ކޮށްފިނަމަ، ރިޔާސީ އިންތިހާބުގައި އެތަނެއްގައި ވޯޓުލާ މަރުކަޒެއް ގާއިމްކުރާގޮތަށް އެ ކޮމިޝަނުން ނިންމާފައިވާއިރު، ރާއްޖެއިން ބޭރުގައި ވޯޓު ފޮށި ބަހައްޓަނީ 150 މީހުން ރީ ރަޖިސްޓަރ ކޮށްފައިވާނަމައެވެ.
ނުވަތަ ރާއްޖޭގެ އެމްބަސީ އަދި ކޮންސިއުލޭޓެއް ހުންނަނަމަ، އެ ޤައުމެއްގައި ވޯޓު ފޮށި ބަހައްޓާނެކަމަށް އިލެކްޝަންސް ކޮމިޝަނުން ބުނެއެވެ.
މި އަހަރުގެ ރިޔާސީ އިންތިހާބު ބާއްވާނެ ތާރީހެެއްގެ ގޮތުގައި އީސީއިން ކަނޑައަޅާފައި ވަނީ އަންނަ ސެޕްޓެމްބަރު މަހުގެ 9 ވަނަ ދުވަހުއެވެ. އަދި ދެވަނަ ބުރަކަށް ގޮސްފި ނަމަ ބާއްވާނެ ތާރީހެއްގެ ގޮތުގައި ކަނޑައަޅާފައިވަނީ އެ މަހުގެ 30 ވަނަ ދުވަހެވެ. އިންތިހާބުގައި ކެނޑިޑޭޓުންނަށް ވާދަކުރުމުގެ ފުރުސަތު ހުޅުވާލުމަށް ހަމަޖެހިފައިވަނީ ޖުލައި 23 އިން އޮގަސްޓު މަހުގެ ތިންވަނަ ދުވަހާއި ހަމައަށެވެ.
