ސެޕްޓެމްބަރ މަހުގެ 30 ވަނަ ދުވަހު އޮންނަ ރިޔާސީ އިންތިޚާބުގެ ދެވަނަ ބުރުގައި ވޯޓުލުމަށް ރީރަޖިސްޓްރޭޝަނަށް ހުށަހެޅި 47،000 ފޯމުގެ ތެރެއިން ހޯމަ ދުވަހުގެ ރޭ 8 ޖެހުމާ ހަމައަށް ރަޖިސްޓްރީ ނުކުރެވި ބާކީ ހުރީ ގާތްގަނޑަކަށް 16،000 ފޯމުކަމަށް އިލެކްޝަންސް ކޮމިޝަން (އީސީ)ގެ ނައިބު ރައީސް އިސްމާއީލު ހަބީބު ވިދާޅުވެއްޖެއެވެ.

ހަބީބު ވިދާޅުވީ މަސައްކަތްކުރަމުންދަނީ ބާކީ ހުރި ފޯމުތައް އަންގާރަ ދުވަހުގެ ނިޔަލަށް ރަޖިސްޓަރކޮށް ނިންމުމަށް ކަމަށެވެ. ސެޕްޓެމްބަރު 9 ވަނަ ދުވަހު ބޭއްވި، ރިޔާސީ އިންތިހާބުގެ ފުރަތަމަ ބުރުގައި 42867 ފޯމު ހުށަހެޅިއިރު، ދެވަނަބުރުގައި ގާތްގަނޑަކަށް 47،000 ފޯމު ހުށަހެޅުމުން، ދެބުރުގެ ފޯމުތަކުގެ ޖުމްލަ މިވަނީ ގާތްގަނޑަކަށް 90،000 ފޯމު ހުށަހަޅާފައިވާކަމަށް ހަބީބު ވިދާޅުވިއެވެ.

19،000ށް ވުރެ ގިނަ ފޯމު ވަނީ އާދިއްތަ ދުވަހުގެ ނިޔަލަށް، ރަޖިސްޓަރީ ކޮށްދެވިފައިކަމަށް އީސީން ވަނީ މީގެކުރިން ބުނެފައެވެ.

ފޯމުތަކުގެ ސައްހަކަން ކަށަވަރުވިހާ އަވަހަކަށް ރީ-ރަޖިސްޓަރީ ކުރި އެންމެންގެ ލިސްޓު އިލެކްޝަންސް ކޮމިޝަނުން ޝަކުވާއަށް ހުޅުވާލާނެކަމަށްވެސް އީސީން ބުނެފައިވެއެވެ.

އަދި އެ ލިސްޓު ސަރުކާރުގެ ގެޒެޓްގައި ޝާއިއުކޮށް، އިލެކްޝަންސް ކޮމިޝަންގެ ވެބްސައިޓުގައި ޢާންމުކުރުމުގެ އިތުރުން، ކެންޑިޑޭޓުންނާއި، ކެންޑިޑޭޓުން ނިސްބަތްވާ ޕާޓީތަކާ ޙިއްޞާ ކުރާނެކަމަށްވެސް އީސީން މައުލޫމާތު ދެއެވެ.

އިލެކްޝަންސް ކޮމިޝަނުން ބުނެފައިވާ ގޮތުގައި ރީ-ރަޖިސްޓަރީ ކުރަން އެންމެ ގިނަ ފޯމު ހުށަހަޅާފައިވަނީ، ދެ ކެންޑިޑޭޓުން ނިސްބަތްވާ ދެ ޕާޓީންނެވެ. އެއީ އެމްޑީޕީގެ ކެންޑިޑޭޓު އިބްރާހީމް މުޙައްމަދު ސާލިޙާއި، ޕީއެންސީގެ ކެންޑިޑޭޓު ޑރ މުޙައްމަދު މުއިއްޒެވެ.

އޭގެ އިތުރުން، އޮންލައިންކޮށް ރީ-ރަޖިސްޓްރީ ކުރަން ހުށަހަޅާފައިވާ ބައެއް ފަރާތްތަކުން، ހުށަހެޅި ފޯމު ޕެންޑިންގގައި އިންނާތީ، އަލުން ފިޒިކަލް ފޯމު ލާފައިވާކަންވެސް އީސީން ވަނީ ފާހަގަކޮށްފައެވެ.