ތުރުކީއާއި ސީރިއާ ސަރަޙައްދަށް ބާރުގަދަ ބިންހެލުމެއް އަތުވެއްޖެއެވެ.

މި ބިންހެލުމުގައި މިހާތަނަށް 200ށް ވުރެ ގިނަ މީހުން މަރުވެފައިވާކަމަށް ރޮއިޓަރސްއިން ވަނީ ރިޕޯޓުކޮށްފައެވެ.

ހޯމަ ދުވަހު މި ބިންހެލުން އައިސްފައިވަނީ މެދުތެރޭ ތުރުކީއަށާއި ސީރިއާގެ ހުޅަނގު އުތުރު ސަރަޙައްދަށެވެ. 7.9 މެގްނިޓިއުޑްގެ ބާރުގަދަ މި ބިންހެލުމުގެ އަސަރު ކައިރި އެކި ޤައުމުތަކަށް ވެސް ކޮށްފައިވާކަމަށް ރޮއިޓަރސްގައި ރިޕޯޓުކޮށްފައިވެއެވެ. އެގޮތުން ސައިޕްރަސްއާއި ލުބުނާނަށް ވެސް މި ބިންހެލުމުގެ އަސަރު ކޮށްފަައިވެއެވެ. ބައެެއް އާންމުން ވަނީ ފާއިތުވި 40 ހަކަށް އަހަރުގެ ތެރޭގައި ވެސް މިފަދަ ބާރުގަދަ ބިންހެލުމެއް ތަޖުރިބާ ކޮށްފައިނުވާކަމަށް ރޮއިޓަރސްއަށް މައުލޫމާތު ދީފައެވެ.

ތުރުކީން ވެސް މަރުވި މީހުންގެ އަދަދު 100ން މަތިވެފައިވާއިރު، އަނިޔާވި މީހުންގެ އަދަދު ވަނީ 400ން މައްޗަށް ގޮސްފައެވެ. އެތައް އިމާރާތެއް ވެސް ބިމާ ހަމަވެފައިވާއިރު، އެ ޤައުމުގެ ކާރިސާއާބެހޭ އިދާރާއިން ވަނީ ލެވެލް 4 ގެ އިންޒާރު ވެސް ނެރެފައެވެ. އެގޮތުން އެ އިންޒާރަކީ ބައިނަލްއަޤުވާމީ ޤައުމުތަކުގެ އެހީއަށް އެދޭ ޙާލަތުގައި އޮންނައިރު ނެރޭ އިންޒާރެކެވެ.

ތުރުކީގެ ރައީސް ރަޖަބް ތައްޔިބު އުރުދުޣާން ވަނީ މި ބިންހެލުމުގައި އެންމެ ބޮޑަށް ގެއްލުން ލިބުނު ޕްރޮވިންސްތަކުގެ ގަވަރުނަރުންނާ ފޯނުން ގުޅުއްވައި ޙާލަތު އޮޅުންފިލުއްވާފައެވެ.

ސީރިއާއިން ވެސް މަރުވި މީހުންގެ އަދަދު 100ން މައްޗަށް ގޮސްފައިވާއިރު، އެ ދެ ޤައުމުން ވެސް ބިމާހަމަވެފައިވާ އިމާރަތްތަކުން މީހުން ހޯދުމުގެ މަސައްކަތް މިހާރު ދަނީ ކުރަމުންނެވެ.

ތުރުކީއާއި ސީރިއާގެ ޙާލަތު ގާތުން ބަލަމުންދާނެކަމަށް އެމެރިކާއިން ވެސް ވަނީ ބުނެފައެވެ. އެގޮތުން ވައިޓްހައުސްގެ ނޭޝަނަލް ސެކިއުރިޓީ އެޑްވައިސަރ ޖޭކް ސަލިވަން ވަނީ އެ ދެ ޤައުމުގެ ޙާލަތު ގާތުން މޮނީޓަރު ކުރައްވާނެ ކަމަށާއި، އެހީތެރިކަން ފޯރުކޮށްދެއްވާނެ ކަމަށް ވިދާޅުވެފައެވެ.