ސްޕެނިޝް ލީގުގައި މަޔޯކާއާ ދެކޮޅަށް ކުޅުނު މެޗު ހީ ކުރި ވަރަށް އުނދަގޫވި ކަމަށް ރެއާލް މެޑްރިޑުގެ ކޯޗު ކާލޯ އަންޗެލޮޓީ ބުނެފި އެވެ.
އަންޗެލޮޓީ މިހެން ބުނީ މަޔޯކާ އަތުން ބަލިވެ، އެއް ވަނައިގައި އޮތް ބާސެލޯނާއާ ދެމެދު ހުރި ފަރަގު ކުޑަކުރަން ލިބުނު ފުރުސަތު ގެއްލުނު މެޗަށްފަހު ވާހަކަ ދައްކަމުންނެވެ. މެޗަށްފަހު އޭނާ ބުނީ މަޔޯކާ މެޗު ވަރަށް އުނދަގޫވި ކަމަށެވެ. އަންޗެލޮޓީ ބުނީ މެޗުގައި ރެއާލް އިން ކުޅުނު ކުޅުމަށް ބަލާއިރު ވެސް އެކަން ފާހަގަވާނެ ކަމަށާއި، ކުރިން ވެސް އޭނާ ބުނި ގޮތަށް މަޔޯކާ އަކީ އިދިކޮޅަށް ކުޅެން އުނދަގޫ ޓީމެއް ކަމަށެވެ. އަދި ރެއާލަަށް މެޗުގައި ކޮންޓްރޯލް ނަގައިގެން ކުރިއަށް ދެވޭނެ ނަސީބު ނެތް ކަމަށެވެ. އޭނާ ބުނީ މެޗުގައި ރެއާލުން ލަނޑު ޖެހުމަށް ކުރި އެތައް މަސައްކަތެއް މަޔޯކާ އިން ހުއްޓުވީ ކަމަށާއި، ބޯޅައާއެކު ވެސް ރެއާލަށް ގޯސްތަކެއް ހެދުނު ކަމަށެވެ. މީގެއިތުރުން މެޗުގައި ރަނގަޅު ފުރުސަތު ތަކެއް ލިބުނު ނަމަވެސް، އޭގެ ބޭނުން ނުހިފުނު ކަމަށެވެ. އޭނާ ބުނީ ރެއާލްގެ ކުޅުންތެރިން ވަރަށް ރަނގަޅަށް މަސައްކަތް ކުރި ނަމަވެސް، އެކަން އެންމެ ރަނގަޅަށް ނުދިޔައީ ކަމަށެވެ.
މެޗު އަހަރަމެން ހީކުރި ވަރަށް އުނދަގޫވި. ވަރަށް ޓަފް މެޗެއް. އަހަރަމެންނަށް މެޗު ކޮންޓްރޯލް ކުރުމުގެ ނަސީބު ވެސް ނެތީ. އަހަރަމެން މަސައްކަތް ކުރި ނަމަވެސް، އެތައް ފަހަރަކު މަޔޯކާ އިން ހުއްޓުވި.ކާލޯ އަންޗެލޮޓީ / ރެއާލް މެޑްރިޑުގެ ކޯޗު
މީގެ އިތުރުން އަންޗެލޮޓީ ބުނީ ގާތް ގާތުގައި މެޗު ކުޅެން ޖެހުމުން ކުޅުންތެރިންނަށް ވެސް ވަރުބަލިކަން އިހުސާސްވި ކަމަށެވެ. މެޗުގެ ކުރިން ވެސް އޭނާ ވަނީ އަރާމު ކުރުމަށް އެންމެ އެކަށީގެންވާ ވަގުތު ނުލިބުމުން އެކަމުގެ ކަންބޮޑުވުން ފާޅުކޮށްފަ އެވެ. އަންޗެލޮޓީ ބުނީ މަޔޯކާ މެޗު ނިމުނީ ކަމަށާއި، ދެން ފޯކަސް ބަހައްޓާނީ ކުރިއަށް އޮތް މެޗަށް ކަމަށެވެ. އަދި އަނިޔާގެ މައްސަލަތަކެއް އުޅުނު ނަމަވެސް، ރެއާލްގެ ސްކޮޑާމެދު ވަރަށް ބޮޑަށް ހިތްހަމަޖެހޭ ކަމަށެވެ. އޭނާ ބުނީ ރެއާލްގެ ކުޅުންތެރިންނަށް އިތުބާރު އޮންނަ ކަމަށާއި، ކާމިޔާބަށް ވާސިލްވެވޭނެ ކަމުގެ އުންމީދު ވެސް އޮތް ކަމަށެވެ.
ރެއާލަށް ކުރިއަށް ދެން އޮތީ ފީފާ ކުލަބް ވޯލްޑް ކަޕްގެ ސެމީ ފައިނަލް މެޗެވެ. މި މަހުގެ ނުވަ ވަނަ ދުވަހު އެ ޓީމު ނުކުންނާނީ އަލް އަހްލީއާ ދެކޮޅަށެވެ.
