މެސީގެ ލަނޑާއެކު ޓޫލަސް ބަލިކޮށް ޕީއެސްޖީ އެއް ވަނައިގައި ހަމަޖެހިލައިފި

ފްރާންސް ލީގުގައި ޓޫލަސްއާ ދެކޮޅަށް ކުޅުނު މެޗުން މޮޅުވެ ޕެރިސް ސެއިންޓް ޖާމަން (ޕީއެސްޖީ) އިން އެއް ވަނައިގައި ހަމަޖެހިލައިފި އެވެ.

ހޮނިހިރު ދުވަހުގެ ރޭ ޕީއެސްޖީގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބުކުރީ 2-1 އިންނެވެ. މެޗަށް ޕީއެސްޖީ ކުރިމަތިލީ އެ ޓީމަށް ކުޅެމުން އަންނަ ފްރާންސްގެ ޒުވާން ކުޅުންތެރިޔާ ކީލިއަން އެމްބާާޕޭ ނުލަ އެވެ. އަނިޔާގެ ސަބަބުން އެމްބާޕޭ އަށް ވަނީ ކުޅުމާ ދުރުގައި ހުންނަން ޖެހިފަ އެވެ. މީގެ އިތުރުން އެ ޓީމަށް ކުޅެމުން އަންނަ ބްރެޒިލްގެ ނޭމާ ޖޫނިއާ އާއި ޑިފެންޑަރު ސާޖިއޯ ރާމޯސް ވެސް އަނިޔާގެ ސަބަބުން މެޗުގައި ކުޅެފައެއް ނުވެ އެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ޓޫލަސް އިންނެވެ. މެޗުގެ 20 ވަނަ މިނެޓުގައި އެ ޓީމަށް ލީޑު ނަގައިދިނީ ބްރަންކޯ ވެން ޑެން ބޫމަން އެވެ. ނަމަވެސް ޕީއެސްޖީން ވަނީ ލަނޑު ޖަހައި ނަތީޖާ ހަމަހަމަކޮށްފަ އެެވެ. މެޗުގެ 38 ވަނަ މިނެޓުގައި ޕީއެސްޖީ އަށް މެޗުގެ ނަތީޖާ ހަމަހަމަކޮށްދިނީ މޮރޮކޯގެ ޑިފެންޑަރު އަޝްރަފް ހަކީމީ އެވެ. އެއީ ކާލޮސް ސޮލާގެ އެހީތެރިކަމާއެކު ހަކީމީ ޖެހި ލަނޑެކެވެ. މެޗުގައި ޕީއެސްޖީ އަށް ފުރަތަމަ ފަހަރަށް ލީޑު ނަގައިދިނީ ދެ ވަނަ ހާފުގައި އާޖެންޓީނާގެ ކެޕްޓަން ލިއޮނަލް މެސީ އެވެ. އެއީ ދެ ވަނަ ހާފުގެ 58 ވަނަ މިނެޓުގައި ހަކީމީ ތަނަވަސްކޮށްދިން ފުރުސަތެއްގައި މެސީ ޖެހި ލަނޑެކެވެ.

މެޗުން މޮޅުވެ ޕީއެސްޖީ އެއް ވަނައިގައި އޮތީ ކުޅުނު 22 މެޗުން 54 ޕޮއިންޓާއެކު އެވެ. ދެ ވަނައިގައި ވާދަވެރި މާސޭ އޮތީ ޕީއެސްޖީ އަށް ވުރެ މެޗެއް މަދުން ކުޅެގެން 46 ޕޮއިންޓާއެކު އެވެ.