ކަންސޭލޯ ހޯދުމަށް ލިބުނު ފުރުސަތު ރެއާލުން ދޫކޮށްލީ

މެންޗެސްޓަރ ސިޓީ އަށް ކުޅެމުން އައި ޕޯޗުގަލްގެ ޑިފެންޑަރު ޔާއޯ ކަންސޭލޯ ހޯދުމުގެ ފުރުސަތު ލިބުނު ނަމަވެސް، ސްޕެއިންގެ ރެއާލް މެޑްރިޑުން އެ ފުރުސަތު ދޫކޮށްލީ ކަމަށް މީޑިއާ ރިޕޯޓުތައް ބުނެފި އެވެ.

ރިޕޯޓުތައް ބުނާ ގޮތުން ރެއާލްގެ ޑިފެންސްގައި ހިމެނޭ ބައެއް ކުޅުންތެރިން އަނިޔާވުމާ ގުޅިގެން، އެކަމުގެ ބަދަލެއްގެ ގޮތުގައި ކަންސޭލޯ ހޯދުމުގެ ފުރުސަތު އެ ކުލަބަށް ލިބުނެވެ. ރެއާލްގެ ފަހަތަށް ކުޅެމުން އަންނަ ޑޭވިޑް އަލަބާ ވަނީ މަސްދުވަސް ވަންދެން ކުޅުމާ ދުރުގައި ހުންނަން ޖެހިފަ އެވެ. ދާދި ފަހުން ފާލަންޑް މެންޑީ އަށް ވެސް ވަނީ އަނިޔާވެ ކުޅުމާ ދުރަށް ދާން ޖެހިފަ އެވެ. އޭނާ ގާތްގަނޑަކަށް ދެ މަސް ދުވަހަށް ކުޅުމާ ދުރުގައި ހުންނަން ޖެހޭނެ ކަމަށް ރިޕޯޓުތައް ބުނެ އެވެ. މީގެ އިތުރުން އެންމެ ފަހުން ރެއާލުން ވެލެންސިއާއާ ދެކޮޅަށް ކުޅުނު މެޗުގައި އެޑާ މިލިޓާއޯ އަށް ވެސް ވަނީ މަސްގަނޑުގެ އަނިޔާއެއްވެފަ އެވެ.

މީޑިއާ ރިޕޯޓުތަކުގައިވާ ގޮތުން ރެއާލުން ކަންސޭލޯގެ ސޮއި ހޯދުމަށް ލިބުނު ފުރުސަތު ދޫކޮށްލީ އެވެ. ސަބަބަކީ ރެއާލްގެ ކޯޗު ކާލޯ އަންޗެލޮޓޯ އާއި ކުލަބުގެ ވެރިން ވެސް އެ ޓީމުގައި މިހާރު އޮތް ސްކޮޑާމެދު ހިތްހަމަޖެހޭތީ ކަމަށް ރިޕޯޓުތަކުގައިވެ އެވެ. މީގެ އިތުރުން އެ ޓީމުގައި ތިބި ޒުވާން ކުޅުންތެރިންނާމެދު ކޯޗުގެ އިތުބާރު އޮތުމާއި، އެ ކުޅުންތެރިންނާއެކު ރެއާލަށް ކާމިޔާބަށް ވާސިލްވެވޭނެ ކަމަށް ޤަބޫލު ކުރެވޭތީ ކަމަށް ވެސް ރިޕޯޓުތައް ބުނެ އެވެ. މީގެ ކުރިން ރެއާލްގެ ކޯޗު އަންޗެލޮޓީ ވަނީ ޖަނަވަރީ ޓްރާންސްފާގައި ރެއާލް އިން އެއްވެސް ކުޅުންތެރިޔަކު ނުހޯދާނެ ކަމަށް ވެސް އެތައް ފަހަރަކު ބުނެފަ އެވެ.

ސިޓީ ދޫކޮށް ކަންސޭލޯ ބަޔާން މިއުނިކަށް ބަދަލުވީ ލޯނު އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވުމުން އޭނާ އެނބުރި ސިޓީ އަށް ދާނެ އެވެ.