ބާގަނޑެއްގެ ތެރެއިން ސަލާމަތްވުމަށް މާތް ﷲ އަހަރެންނަށް މަގުތަނަވަސްކޮށްދެއްވި: ޢަބްދުއްރަހްމާން

އެއީ ޖެނުއަރީ 30 ވީ ހޯމަ ދުވަހެވެ. ދުވަސްތަކެއްގެ ހިމޭން ކަމަށް ފަހު ޕާކިސްތާނުގެ ޕެޝާވަރު ގުޑުވާލީ މިސްކިތަކަށް ދިން ބޮމުގެ ވަރުގަދަ ހަމަލާގެ އަޑުފަށްގަނޑަށެވެ. 100 މީހެއްގެ ފުރާނަ ގެއްލިދޔަ އެ ހާދިޘާއިން ޒަޚަމްތަކަކާއެކު ފުރާނަ ސަލާމަތްވި 2 މީހަކު ވަނީ، ހޮސްޕިޓަލުގެ އެނދުގައި އޮވެގެން، އެ ދުވަހުގެ ތަޖުރިބާތައް، ބައިނަލްއަޤުވާމީ މީޑިއާއާ ހިއްސާކޮށްފައެވެ.

އެ ބިރުވެރި ހާދިޘާއިން ސަލާމަތްވުމަށް، މާތް ﷲގެ ޙަޟްރަތުން ވާތްގަށް އެދެމުން އޭނާ ކުރަމުން ދިޔަ ހިތްވަރުގަދަ ދަތުރުގެ ވާހަކަ ޢަބްދުއްރަޙްމާން އިތުރަށް ތަފްސީލު ކޮށްދިނެވެ.

އަފްޣާނިސްތާނާ ޕާކިސްތާނު ހިއްސާ ކުރާ ބޯޑަރާއި ދާދި ކައިރީގައި އޮންނަ ޕޮލީސް ލައިންސް ޑިސްޓްރިކްޓްގައި ދިން ބޮމުގެ ހަމަލާއަކީ، މިދިޔަ 10 ވަރަކަށް އަހަރު ދުވަހުގެ ތެރޭގައި އެ ސަރަޙައްދުގައި ދިން އެފަދަ އެންމެ ވަރުގަދަ ހަމަލާއެވެ. މި ދަނޑިވަޅަކީ، ޕާކިސްތާނުގައި އެ ޤައުމުގެ ފުލުހުންނަށް އަމާޒުކޮށް ހަމަލާތައް ދެމުންދާ މިންވަރު، އިތުރު ވެފައި ވާ ދަނޑިވަޅެއްކަން ފާހަގަ ކުރަން ޖެހެއެވެ.

އެތައް ސަތޭކަ ބަޔަކު މެންދުރު ނަމާދަށް ތިބި އެ މިސްކިތުގެ މަތީ ފަންގިފިލާ މުޅިން ސުންނާފަތިކޮށް، ބިމާ  ހަމަކޮށްލި އެ ވަރުގަދަ ބޮމުގެ ހަމަލާގައި ޒަޚަމްވީ މީހުންގެ ޢަދަދު 170 އަށް އަރައެވެ. އެފަދަ އެކަކީ، ޕޮލީސް ކޮންސްޓަބަލް ރަބް ނަވާޒްއެވެ.

ޤާނޫނު ހަދާ މަޖިލީހުގައި ވާހަކަދައްކަވަމުން ޕާކިސްތާނުގެ ދާޚިލީ ވަޒީރު ރަނާ ސަނާއުއްލާ ވިދާޅުވި ގޮތުގައި، މަރުވި 100 މީހުންގެ ތެރެއިން 97 މީހުންނަކީ ފުލުސް އޮފިޝަލުންނެވެ.

ޕާކިސްތާނުގެ ކަމާ ބެހޭ ފަރާތްތަކުން ބުނީ ފުލުހުންނާއި އަސްކަރިއްޔާއިން ވަރުގަދަ ޗެކްޕޮއިންޓްތަކެއް އަޅާފައިވާ ޕޮލީސް ލައިންސް ޑިސްޓްރިކްޓަށް، ބޮން ގޮއްވާލި މީހާ ކާމިޔާބު ކަމާއެކީ ވަނީ ކިހިނެއް ކަން ބުނަން ނޭނގޭ ކަމަށެވެ. ބޮން ގޮއްވާލި ސަރަޙައްދަކީ ޕާކިސްތާނުގެ ފުލުހުންގެ ތެރެއިން ދަށް އަދި މެދު ފަންތީގެ ފުލުހުންނާއި އެމީހުންގެ އާޢިލާތަކުން ވަޒަންވެރިވެގެން ދިރިއުޅެމުންދާ ސަރަޙައްދެކެވެ.

ޕެޝާވަރުގެ ސަލާމަތީ ހާލަތަށް ރިޢާޔަތް ކޮށް، މިސްކިތްތައް އަޅާފައި ހުންނަނީ ނަމާދު ކުރުމަށްޓަކާ، ފުލުހުން އެ ސަރަޙައްދު ދޫކޮށް ދާން ނުޖެހޭ ގޮތަށެވެ.

ޕާކިސްތާނުގެ ދިފާޢީ ވަޒީރު ޚަވާޖާ އާސިފް ވިދާޅުވީ، ބޮން ގޮއްވާލި މީހާ އެ ޖަރީމާ ހިންގީ ނަމާދު ޖަމާޢަތުގެ އެންމެ ފުރަތަމަ ސަފުގައި ހުރެގެން ކަމަށެވެ.

ހަމަލާ ޒިންމާ، ރަސްމީ ސިފައެއްގައި އެއްވެސް ފަރާތަކުން އުފުލި ކަމުގެ ކަށަވަރު މަޢުލޫމާތެއް އަދި ނުލިބެއެވެ. ނަމަވެސް ތަހްރީކީ ޠާލިބާން ޕާކިސްތާނުން ކަފިވި ގޮތްޕެއް ކަމަށްވާ ޚޫރަސާނީއިން އެ ހަމަލާގެ ޒިންމާ އުފުލާފައި ވާ ކަމަށް ސަނާއުއްލާ ވިދާޅުވި ކަމަށް ރޮއިޓަރޒްއިން ވަނީ ރިޕޯޓް ކޮށްފައެވެ.