އެސްޓީއޯ ނިޕޯން އަދި މަކިޓާ ރަމަޟާން ބާޒާރު ފަށައިފި

އެސްޓީއޯ ނިޕޯން ރަމަޟާން ބާޒާރާއި މަކިޓާ ޝޯރޫމުގެ ރަމަޟާން ބާޒާރު ފަށައިފިއެވެ.

ބުދަ ދުވަހު މަކިޓަރ ޝޯރޫމުގައި ބޭއްވި ރަސްމިއްޔާތެއްގައި މި ޕްރޮމޯޝަން ފައްޓަވައިދެއްވީ އެސްޓީއޯގެ ޖެނެރަލް މެނޭޖަރ، އެނަރޖީ އެންޑް ކޮންސްޓްރަކްޝަން ސޮލިއުޝަންސް، މުހައްމަދު އީމާންއެވެ.

މި ޕްރޮމޯޝަންއާއި ގުޅޭގޮތުން ވާހަކަދައްކަވަމުން އެސްޓީއޯގެ ޕަބްލިކް ރިލޭޝަންސް މެނޭޖަރ އަބްދުﷲ މުޙައްމަދު ވިދާޅުވީ، ނިޕޯން ރަމަޟާން ބާޒާރާއި މަކިޓާ ޝޯރޫމްގައި ރަމަޟާން ބާޒާރު ކުރިޔަށްދާނީ 1 ފެބްރުއަރީ އިން 29 އެޕްރީލްގެ ނިޔަލަށްކަމަށެވެ.

މި ބާޒާރުގައި މަކިޓާ ޝޯރޫމްއާއި އަދި ނިޕޯންގެ އުފެއްދުންތައް ގަނެގެން އަގުހުރި އިނާމުތަކެއް ލިބުމުގެ ފުރުސަތު ވަނީ ހުޅުވާލާފައެވެ. އެގޮތުން އެސްޓީއޯ ޕީޕަލްސް ޗޮއިސްއާއި، އެސްޓީއޯ މަކިޓާ ޝޯރޫމް އަދި ނިޕޯން ޝޯރޫމްއިން ކުރާ ކޮންމެ 500 ރުފިޔާގެ ވިޔަފާރިއަކަށް ކޫޕަނެއް ލިބޭނެއެވެ.

އެސްޓީއޯ މަކިޓާ ޝޯރޫމްގެ ރަމަޟާން ބާޒާރުން ހޮވޭ ނަސީބުވެރި ފަރާތައް އެސްޓީއޯ ޕީޕަލްސް ޗޮއިސްއިން 20،000 ރުފިޔާގެ އަގުހުރި މުދާ ދިނުމަށް ވަނީ ނިންމާފައެވެ. އަދި ނިޕޯން ރަމަޟާން ބާޒާރުން ހޮވޭ ނަސީބުވެރިއަކަށް އެސްޓީއޯ ޕީޕަލްސް ޗޮއިސްއިން 20،000 ރުފިޔާގެ އަގުހުރި މުދާ ވަނީ ހުށަހަޅައިފައެވެ.

އެސްޓީއޯ ޕީޕަލްސް ޗޮއިސްގައި ރަމަޟާން ބާޒާރު ފަށާފައިވަނީ 23 ޖެނުއަރީގައެވެ.