ކަންސޭލޯ ބަޔާނަށް ސޮއިކޮށްފި

މެންޗެސްޓަރ ސިޓީ އަށް ކުޅެމުން އައި ޕޯޗުގަލްގެ ޔާއޯ ކަންސޭލޯ ޖަރުމަނު ލީގުގެ ބަޔާން މިއުނިކަށް ބަދަލުވެއްޖެ އެވެ.

އުމުރުން 28 އަހަރުގެ ޑިފެންޑަރު ބަޔާނަށް ބަދަލުވީ ލޯނު އެއްބަސްވުމެއްގެ ދަށުންނެވެ. ބަޔާންގެ އެއްބަސްވުމުގައި ކަންސޭލޯ ސޮއިކުރުމާއެކު، ބަޔާންގެ ކުޅުންތެރިޔެއްގެ ގޮތުގައި އޭނާ ވަނީ ރަސްމީކޮށް އިއުލާން ވެސް ކޮށްފަ އެވެ. ކަންސޭލޯ ބަޔާނަށް ގެންދިޔުމަށް އެ ކުލަބުން 70 މިލިއަން ޔޫރޯ ޚަރަދަކުރާނެ އެވެ. ލޯނު އެއްބަސްވުމުގެ މުއްދަތު ހަމަވުމުން ދާއިމީ އެއްބަސްވުމެއް އެކުލަވާލެވޭ މާއްދާ ވަނީ އެއްބަސްވުމުގައި ނުހިމަނާން ނިންމައިފަ އެވެ. އެއްބަސްވުމުގައި ސޮއި ކުރުމަށް ފަހު ކަންސޭލޯ މިހާރު ވަނީ ބަޔާންގެ ފަރިތަކުރުންތަކުގައި ބައިވެރިވާން ފަށައިފަ އެވެ.

ބަޔާނަށް ބަދަލުވުމަށްފަހު ކަންސޭލޯ ބުނީ ބަޔާނަކީ ވަރަށް ބޮޑު، މޮޅު ކުލަބެއް ކަމަށެވެ. އޭނާ ބުނީ ބަޔާންގައި ތިބީ ވެސް ވަރަށް މޮޅެތި ކުޅުންތެރިން ކަމަށާއި، ދުނިޔޭގެ ނިސްބަތުން ވެސް އެއީ ފާހަގަކޮށްލެވޭނެ ކުޅުންތެރިން ކަމަށެވެ. އެހެންކަމުން އެ ކުޅުންތެރިންނާ އެއް ޓީމަކަށް ކުޅުމަކީ އޭނާ އަށް ލިބޭނެ ވަރަށް ބޮޑު އުފަލެއް ކަމަށް ވެސް ކަންސޭލޯ ބުންޏެވެ. އިތުރަށް އޭނާ ބުނީ ބަޔާންގެ އަމާޒަކީ ކޮންމެ އަހަރަކު ވެސް ތަށިތަކެއް ކާމިޔާބުކުރުންކަން އޭނާ އަށް އިނގޭ ކަމަށާއި، އޭނާ ވެސް ހުރީ ބަޔާނާއެކު ކާމިޔާބީ ހޯދަން ކެތްމަދުވެފައި ކަމަށެވެ.

ޔުވެންޓަސް ދޫކޮށް ކަންސޭލޯ މެންޗެސްޓަރ ސިޓީ އަށް ބަދަލުވީ 2019 ވަނަ އަހަރު އެވެ. އޭގެ ފަހުން އޭނާ ވަނީ އެ ޓީމުގައި މޮޅު ކުޅުމެއް ވެސް ދައްކައިފަ އެވެ. ސިޓީ އަށް މިހާތަނަށް ކުޅެދިން 154 މެޗުގައި ކަންސޭލޯ ވަނީ 10 ލަނޑު ވެސް ޖަހައިފަ އެވެ. ނަމަވެސް މި ސީޒަނުގައި އޭނާ އަށް ފުރުސަތު ލިބެނީ މަދު މެޗުތަކެއްގަ އެވެ. ސިޓީއާއެކު ކަންސޭލޯ ވަނީ ތިން ތައްޓެއް ކާމިޔާބުކޮށްފަ އެވެ. އެއީ ދެ ޕްރިމިއާ ލީގާއި އެއް ކަރަބޯ ކަޕެވެ.