އީޕީއޭއިން އައްޑޫ ސިޓީ ކައުންސިލް 30 މިލިއަން ރުފިޔާއިން ޖޫރިމަނާކޮށްފި
މި ފައިސާ 30 ދުވަހުގެ ތެރޭގައި ދައްކަން ވަނީ އަންގާފައި
ސިޓީ ސްކޮޔަރ-އައްޑޫސިޓީ ހިތަދޫ
އައްޑޫ ސިޓީގެ ރުއްޖެހެރެ ސަރަހައްދުގެ ހޭޅިފަށުން ގަވާއިދާ ޚިލާފަށް ގިނަ އަދަދެއްގެ ރުއްގަސް ކެނޑުމުގެ ސަބަބުން އައްޑޫ ސިޓީ ކައުންސިލް ޖޫރިމަނާކޮށްފިއެވެ.
އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ)އިން ބުނީ، އައްޑޫސިޓީ ހިތަދޫ ކުނިކޮށީގެ ދެކުނުން އޮންނަ ރުއްޖެހެރެ ސަރަހައްދުގެ ހޭޅިފަށުން ގިނަ އަދަދެއްގެ ރުއްގަސް ކަނޑާލައި، އެ ސަރަހައްދުގައި ފެންގަނޑެއް ކޮނުމާއި، އަދި ގޮނޑުދޮށަށް ވެލި އެޅުމާގުޅޭގޮތުން ހުށަހެޅިފައިވާ ޝަކުވާއަކާ ގުޅިގެން، އެ އެޖެންސީން މައްސަލަ ބަލާފައިވާ ކަމަށެވެ. އެގޮތުން ގަވާއިދާ ޚިލާފަށް ރުއްޖެހެރެ ސަރަހައްދުގެ 17818.09 އަކަމީޓަރުގެ ސަރަހައްދަކުން ބިން ސާފުކޮށްފައިވާކަމާއި، އެ ސަރަހައްދުން 1712.26 ކޮޑިމީޓަރު ވެލި ނަގައި، ހިތުގެ ބައްޓަމަށް ފެންގަނޑެއް ކޮނެފައިވާކަން ދެނެގަނެވިފައިވާ ކަމަށް އީޕީއޭއިން ވަނީ ބުނެފައެވެ.
އެ އެޖެންސީން ބުނީ މި މައްސަލައާ ގުޅިގެން، ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހަދާފައިވާ "ތިމާވެއްޓަށް އަސަރުފޯރާ މިންވަރު ބަޔާންކުރާ ރިޕޯޓު ހެދުމާބެހޭ ގަވާއިދު 2012" އަދި "ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދު"ގެ ދަށުން އައްޑޫ ސިޓީ ކައުންސިލް ޖުމްލަ 30,897,955.00 (ތިރީސް މިލިއަން އަށްލައްކަ ނުވަދިހަ ހަތްހާސް ނުވަސަތޭކަ ފަންސާސް ފަހެއް) ދިވެހި ރުފިޔާއިން ޖޫރިމަނާ ކޮށްފައިވާ ކަމަށެވެ.
މި ފައިސާ ދެއްކުމަށް އީޕީއޭއިން އައްޑޫ ސިޓީ ކައުންސިލަށް ދީފައިވަނީ، ސަރުކާރު ބަންދު ދުވަސްތައް ހިމަނައިގެން 30 ދުވަހުގެ މުއްދަތެކެވެ. ފައިސާ ދެއްކުމަށް އައްޑޫ ސިޓީ ކައުންސިލަށް އެންގީ މި މަހުގެ 30ގައެވެ.
ޕާކެއް ތަރައްގީކުރުމަށްކަމަށް ބުނެ އީ.ޕީ.އޭގެ ހުއްދަ ހޯދުމަކާނުލައި އައްޑޫ ސިޓީގެ ހިތަދޫ ކުނިކޮށީގެ ދެކުނުން އޮތް ސަރަޙައްދުގައި ތިމާވެއްޓަށް ގެއްލުންވާނެހެން މަސައްކަތްތަކެއްކުރި މައްސަލަ ފެންމަތިވީ މިދިޔަ އަހަރުގެ އޭޕްރީލްމަހުގެ ތެރޭގައެވެ.
ރާއްޖޭގެ އެއްވެސް ސަރަހައްދެއްގައި ތިމާވެއްޓަށް ބަދަލު އަންނަފަދަ ގޮތަކަށް ކުރާ ޢުމްރާނީ ތަރައްގީގެ އެއްވެސް މަސައްކަތެއް ކުރިއަށްގެންދިޔުމުގެ ކުރިން، އެކަމުގެ ސަބަބުން ނުކުމެދާނެ ތިމާވެށީގެ މައްސަލަތައް ދެނެގަތުމަށް ހަދާ އެންވަޔަރަންމަންޓް އިމްޕެކްޓް އެސެސްމަންޓް (އީއައިއޭ) ހެދުމަށްފަހު އީޕީއޭގެ ހުއްދަ ހޯދަންޖެހެއެވެ. އެހެންނަމަވެސް އައްޑޫސިޓީ ކައުންސިލުން މި މަސައްކަތް ކުރިއަށްގެންދިޔުމުގެ ކުރިން އީޕީއޭގެ ހުއްދަ ހޯދާފައި ނުވާކަމަށް އެ އެޖެންސީން ވަނީ ބުނެފައެވެ.
