އަތޮޅުތަކުގައި ސަރުކާރުން އަލަށް ތަރައްޤީކުރުމަށް ނިންމާފައިވާ ހަތަރު އެއަރޕޯޓަށް ބޭނުންވާ ބިން ހިއްކުމަށް ހުޅުވާލި ފުރުޞަތުގައި، ތިން ރަށެއްގެ އެއަރޕޯޓު އެޅުމަށް ބިން ހިއްކުމަށް މިހާތަނަށް ބީލަން ލިބިފައިވާކަމަށް މިނިސްޓްރީ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން ބުނެފިއެވެ.
ސަރުކާރުން އެއަރޕޯޓު ތަރައްގީ ކުރުމަށް ބިން ހިއްކުމަށް ބިޑު ހުށަހެޅުމުގެ ފުރުސަތު ހުޅުވާލީ ހދ. މަކުނުދޫއާއި، ށ. ބިލެއްފައްސާއި، ބ. ތުޅާދޫ އަދި ތ. ވިލުފުށީގެއެވެ.
އެ މިނިސްޓްރީން ބުނީ ލިބިފައިވާ ބީލަންތައް ބަލާ، އެކަށީގެންވާ ކުންފުންޏެއް ހޮވުމަށް ކުރިއަށްގެންދާ އިވަލުއޭޝަންގެ މަސައްކަތް ފިނޭންސް މިނިސްޓްރީ އަދި ޕްލޭނިންގ މިނިސްޓްރީއާއި ގުޅިގެން ކުރިއަށްގެންދާ ކަމަށެވެ.
ރެސްޓްރިކްޓެޑް ޓެންޑަރިންއަށް ކުރިއަށްގެންދިޔަ މި ބީލަމުގައި، ބީލަން ހުށައެޅޭނީ ކަނޑައެޅޭ ވަކި މިންގަނޑަކަށް ވަކި އަދަދެއްގެ ކުންފުންޏަކަށެވެ.
ބީލަމަށް ހުޅުވާލާފައިވާ މި 4 އެއަރޕޯޓާއެކު ޖުމްލަ 8 އެއަރޕޯޓް މުޅިން އަލަށް ސަރުކާރުން އަންނަނީ ތަރައްޤީކުރަމުންނެވެ. މީގެ ތެރޭގައި ގދ. ފަރެސްމާތޮޑާ އެއަރޕޯޓާއި މ. މުލީ އެއަރޕޯޓާއި ފ. މަގޫދޫ އެއަރޕޯޓާއި ރ. އަލިފުށީ އެއަރޕޯޓު ހިމެނެއެވެ.
ފަރެސްމާތޮޑާ އެއަރޕޯޓުގެ މަސައްކަތް ނިމުމަކާ ގާތްވެފައިވާއިރު މުލީގެ އެއަރޕޯޓުގެ މަސައްކަތް ދަނީ ކުރިއަށެވެ. އަދި މަގުދޫ އެއަރޕޯޓާއި އަލިފުށީ އެއަރޕޯޓު ތަރައްގީ ކުރުމަށް މިހާރު ވަނީ އެމްޓީސީސީއާ ހަވާލުކޮށްފައެވެ.
