2022 ވަނަ އަހަރުގެ ހަތަރުވަނަ ކުއާޓަރުގައި ފަތުރުވެރިކަން އަދި ހޯލްސޭލް، ރީޓެއިލް ވިޔަފާރީގެ ދާއިރާގައި ހިމެނޭ ވިޔަފާރިތަކުން ވިޔަފާރިކުރި މިންވަރު މަތިވެފައިވާކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ބުނެފިއެވެ.

އެމްއެމްއޭއިން ވަނީ 25 ޑިސެމްބަރު 2022 އިން 11 ޖެނުއަރީ 2023 ގެ ނިޔަލަށް ހަތަރުވަނަ ކުއާޓަރުގެ ބިޒްނަސް ސާވޭ ކުރިއަށް ގެންގޮސްފައެވެ. އެގޮތުން، ފަތުރުވެރިކަން، އިމާރާތްކުރުން، ދަތުރުފަތުރާއި މުވާސަލާތީ ޚިދުމަތްތައް އަދި ހޯލްސޭލް އަދި ރީޓެއިލް ވިޔަފާރީގެ ދާއިރާ ހިމެނޭ ގޮތަށް ހަތަރު ދާއިރާއަކުން ޖުމުލަ 132 ކުންފުންޏަކުން މި ސާވޭގައި ބައިވެރިވެފައިވެއެވެ. 

ބިޒްނަސް ސާވޭގެ ނަތީޖާއަށް ބަލާއިރު ޖުމުލަ ގޮތެއްގައި ފަތުރުވެރިކަން އަދި ހޯލްސޭލް އަދި ރީޓެއިލް ވިޔަފާރީގެ ދާއިރާގައި ހިމެނޭ ވިޔަފާރިތަކުން ވިޔަފާރިކުރި މިންވަރު 2022 ވަނަ އަހަރުގެ ތިންވަނަ ކުއާޓަރާ އަޅާބަލާއިރު މަތިވެފައިވާކަމަށް އެމްއެމްއޭއިން ބުނެފައިވެއެވެ. ނަމަވެސް މިމުއްދަތުގައި އިމާރާތްކުރުން އަދި ދަތުރުފަތުރާއި މުވާސަލާތީ ޚިދުމަތުގެ ދާއިރާގައި ހިމެނޭ ވިޔަފާރިތައް ކުރިއަރަމުންދާ މިންވަރު މަޑުޖެހިފައިވާކަމަށް ރިޕޯޓްކޮށްފައިވެއެވެ.

2022 ވަނަ އަހަރުގެ ހަތަރުވަނަ ކުއާޓަރުގައި ޖުމުލަ ގޮތެއްގައި ސާވޭކުރެވުނު ހުރިހާ ދާއިރާއެއްގައިވެސް މަސައްކަތް ކުރަމުންދާ މުވައްޒަފުންގެ އަދަދުތައް ކުރިއަރަމުންދާ މިންވަރު ވަނީ މަތިވެފައެވެ. މިގޮތުން، މަސައްކަތް ކުރަމުންދާ މުވައްޒަފުންގެ އަދަދުތައް އެންމެ ބޮޑަށް އިތުރުވެފައިވަނީ ނިމިގެން ދިޔަ 2 ކުއާޓަރުގައިވެސް ފަތުރުވެރިކަމުގެ ދައިރާގައި ހިމެނޭ ވިޔަފާރިތަކުން ކަމަށް އެމްއެމްއޭއިން ބުނެފައިވެއެވެ.

އެހެން އަހަރުތަކެކޭވެސް އެއްފަދައިން 2023 ވަނަ އަހަރުގެ ފުރަތަމަ ކުއާޓަރުގައި ވެސް ދިވެހިރާއްޖޭގެ ފަތުރުވެރިކަމުގެ "ޕީކް ސީޒަން" ދެމިގެން ދާނެކަމަށް ބެލެވޭތީ، ކުރިމަގުގައި މިދާއިރާގެ ވިޔަފާރި ކުރިއަރާ މިންވަރު ފަހިވެގެންދާނެކަމަށް ސާވޭގައި ބައިވެރިވި ވިޔަފާރިތަކުން ލަފާކޮށްފައިވީނަމަވެސް، ވިޔަފާރި ކުރިއަރާނެ މިންވަރު ފާއިތުވި ކުއާޓަރާ އަޅާބަލާއިރު މަޑުޖެހިގެންދާނެކަމަށް އެމްއެމްއޭއިން އަންދާޒާކޮށްފައިވެއެވެ. މީގެ އިތުރުން، ހޯލްސޭލް އަދި ރީޓެއިލް، އިމާރާތްކުރުން އަދި ދަތުރުފަތުރާއި މުވާސަލާތީ ޚިދުމަތުގެ ދާއިރާގައި ހިމެނޭ ވިޔަފާރިތައްވެސް ލަފާކުރަނީ ކުރިއަށް އޮތް ކުއާޓަރުގައި ވިޔަފާރިކުރާ މިންވަރު އިތުރުވާނެކަމަށެވެ.

2022 ވަނަ އަހަރުގެ ތިންވަނަ ކުއާޓަރާ އަޅާބަލާއިރު، 2022 ވަނަ އަހަރުގެ ހަތަރުވަނަ ކުއާޓަރުގައި ވިޔަފާރި ހިންގުމަށް ގަންނަ ތަކެތީގެ އަގުތަކާއި ވިއްކާ ތަކެއްޗާއި ޚިދުމަތުގެ އަގުތައް މަތިވެފައިވާކަމަށް ސާވޭގައި ހިމެނޭ ހުރިހާ ދާއިރާއެއްގެ ވިޔަފާރިތަކުންވެސް ރިޕޯޓުކޮށްފައިވެއެވެ. މިއާއެކު، ވިޔަފާރި ހިންގުމަށް ގަންނަ ތަކެތީގެ އަގުތައް އެންމެ ބޮޑަށް މަތިވެފައިވަނީ ހޯލްސޭލް އަދި ރީޓެއިލް ދާއިރާގައި ހިމެނޭ ވިޔަފާރިތަކުން ކަމަށް ރިޕޯޓުކޮށްފައިވެއެވެ. އަދި ވިއްކާ ތަކެއްޗާއި ޚިދުމަތުގެ އަގުތައް އެންމެ ބޮޑަށް އިތުރުވެފައިވަނީ ފަތުރުވެރިކަމުގެ ދާއިރާގައި ހިމެނޭ ވިޔަފާރިތަކުން ކަމަށް ރިޕޯޓުކޮށްފައިވެއެވެ. ކުރިމަގަށް ބަލާއިރު، 2023 ވަނަ އަހަރުގެ ފުރަތަމަ ކުއާޓަރުގައި ފަތުރުވެރިކަމުގެ ދާއިރާއަށް އޮންނަ ޑިމާންޑް މަޑުޖެހިގެންދާނެކަމަށް ލަފާކުރެވޭތީ އެދާއިރާގައި ހިމެނޭ ވިޔަފާރި ހިންގުމަށް ގަންނަ ތަކެތީގެ އަގުތައް އަދި އެވްރެޖް ރޫމް ރޭޓް ކުރިއަރާ މިންވަރު މަޑުޖެހިގެންދާނެކަމަށް އަންދާޒާކޮށްފައިވެއެވެ.

އެމްއެމްއޭއިން ބުނީ 2022 ވަނަ އަހަރުގެ ހަތަރުވަނަ ކުއާޓަރުގައި އިމާރާތްކުރުމުގެ ދާއިރާ ފިޔަވައި ސާވޭގައި ހިމެނޭ ހުރިހާ ދާއިރާއެއްގެ ވިޔަފާރިތަކުގެ މާލީ ހާލަތު 2022 ވަނަ އަހަރުގެ ތިންވަނަ ކުއާޓަރާ އަޅާބަލާއިރު ރަނގަޅުވެފައިވާ ކަމަށް ރިޕޯޓްކޮށްފައިވާކަމަށެވެ. ކުރިމަގަށް ބަލާއިރު، 2023 ވަނަ އަހަރުގެ ފުރަތަމަ ކުއާޓަރުގައި، ސާވޭގައި ހިމެނޭ ހުރިހާ ދާއިރާއެއްގެ ވިޔަފާރިތަކުގެ މާލީ ހާލަތުވެސް ޖުމްލަގޮތެއްގައި ރަނގަޅުވާނެކަމަށް ލަފާކުރެއެވެ.

2022 ވަނަ އަހަރުގެ ހަތަރުވަނަ ކުއާޓަރުގައިވެސް ސާވޭގައި ހިމެނޭ ހުރިހާ ދާއިރާއެއްގެ ވިޔަފާރިތަކަށްވެސް ކްރެޑިޓްގެ ގޮތުގައި ފައިސާ ހޯދުމަށް ދަތިވެފައިވާކަން ފާހަގަކޮށްފައިވެއެވެ. އަދި ކުރިމަގަށް ބަލާއިރު، އިމާރާތްކުރުން އަދި ހޯލްސޭލް އަދި ރީޓެއިލް އަދި އިމާރާތްކުރުމުގެ ދާއިރާގައި ހަރަކާތްތެރިވާ ވިޔަފާރިތަކުން 2023 ވަނަ އަހަރުގެ ފުރަތަމަ ކުއާޓަރުގައި ކްރެޑިޓްގެ ގޮތުގައި ފައިސާ ހޯދުމަށް އިތުރަށް ދަތިވެގެންދާނެކަމަށް އެމްއެމްއޭއިން އަންދާޒާކުރެއެވެ.

2013 ވަނަ އަހަރުން ފެށިގެން ކޮންމެ އަހަރަކު ހަތަރު ފަހަރު އެމްއެމްއޭއިން ހިންގަމުންގެންދާ ބިޒްނަސް ސާވޭ އަކީ، ކުރު މުއްދަތުގެ ތެރޭގައި ވިޔަފާރިތަކުގެ މުހިންމު މިންތަކަށް އައިސްފައިވާ ބަދަލުތަކާ އަދި ކުރިއަށް އޮތް ކުއާޓަރުގައި އަތުވެދާނެކަމަށް ލަފާކުރެވޭ ބަދަލުތަކާ ގުޅޭގޮތުން، އިގްތިސާދުގައި ހިމެނޭ މުހިންމު ހަތަރު ދާއިރާކަމުގައިވާ ފަތުރުވެރިކަން، އިމާރާތްކުރުން، ދަތުރުފަތުރާއި މުވާސަލާތީ ޚިދުމަތްތައް، އަދި ހޯލްސޭލް އަދި ރީޓެއިލް ވިޔަފާރީގެ ދާއިރާގައި ހަރަކާތްތެރިވާ ބޮޑެތި ވިޔަފާރިތަކުން ދެކޭގޮތް، ދެނެގަތުމުގެ ގޮތުން ހިންގޭ ސާވޭއެކެވެ. މި ސާވޭގެ މަގްސަދަކީ ކުރު މުއްދަތުގައި އިގްތިސާދަށް އަންނަމުންދާ އަދި އަތުވެދާނެކަމަށް ލަފާކުރެވޭ ބަދަލުތައް އަވަސް މުއްދަތެއްގެ ތެރޭގައި ދެނެގަނެ، ސިޔާސަތުތައް ކަޑައެޅުމުގައި އެހީތެރިވެދިނުމެވެ.