ނެސްލޭ ކުންފުނިން އެމެރިކާގައި ކުރާ ޗޮކްލެޓް ވިޔަފާރިތައް ފެރޭރޯއަށް ވިއްކާލަނީ

ޗޮކްލެޓާއި މެޓާ ފަދަ ބާވަތްތައް އުފައްދާ ދުނިޔޭގެ އެންމެ ބޮޑު އެއް ކުންފުނި ކަމަށްވާ ސްވިޓްޒަލޭންޑްގެ ނެސްލޭ ކުންފުނިން އިޓަލީގެ ފެރޭރޯ ކުންފުންޏަށް ނެސްލޭގެ އެމެރިކާގެ ބައެއް ވިޔަފާރިތައް ވިއްކާލުމަށް ނިންމާފައި ވަނީ 2.8 ބިލިއަން އެމެރިކާ ޑޮލަރަށެވެ. ނެސްލޭ އިން ފެރޭރޯއަށް ވިއްކާލާ ބްރޭންޑްތަކުގެ ތެރޭގައި ކްރަންޗް، ނާރޑްސް، ރަންޓްސް، އަދި ބަޓަރފިންގަރ ބްރޭންޑްތައް ހިމެނެއެވެ.

މިއަހަރުގެ މާޗް މަހު މި ޑީލް ނިންމުމާ އެކު ފެރޭރޯ ވެގެންދާނީ އެމެރިކާގެ ބާޒާރުގައި ޗޮކްލެޓާއި މެޓަލުގެ ބާވަތްތައް އުފައްދާ ތިންވަނައަށް އެންމެ ބޮޑު ކުންފުންޏަށެވެ. އެމެރިކާއަކީ ޗޮކްލެޓާއި މެޓާ އެންމެ ގިނަ އިން ކައިއުޅޭ ޤައުމެވެ. އެގޮތުން އެޤައުމުގައި އަހަރަކު އަށް ބިލިއަން ޑޮލަރުގެ ޗޮކްލެޓާއި މެޓާ ވިކޭ ކަމަށް ތަފާސް ހިސާބުތަކުން ދައްކައެވެ.

ފެރޭރޯ ކުންފުނީގެ އެންމެ މަޝްހޫރު ބްރޭންޑްތަކަކީ "ފެރޭރޯ ރޮޗަރ" ޗޮކްލެޓްގެ އިތުރުން "ނުޓެއްލާ" އަދި "ޓިކްޓެކް" އެވެ.

ފެރޭރޯއަކީ އެމެރިކާގެ ބާޒާރުގައި ޗޮކްލެޓްގެ އުފައްދާ އެންމެ ބޮޑު އެއް ކުންފުންޏަށްވާއިރު، ނެސްލޭ ކުންފުންޏަށް އެމެރިކާގެ ބާޒާރުގައި ފައިހަމަކުރުމަށް ވަނީ އުނދަގޫވެފައެވެ. އެގޮތުން މިހާރު ވެސް މާސް، ހާރޝީ އަދި ލިންޑްޓް ކުންފުނިން އުޅެނީ އެމެރިކާގެ ބާޒާރުގައި ނެސްލޭ އަށް ވުރެ ކުރީގައެވެ.

ނެސްލޭ އެކުންފުނީގެ އެމެރިކާގެ ބައެއް ވިޔަފާރިތައް ވިއްކާލަނީ އެޤައުމުގައި އެކުންފުނީގެ އެހެން ބައެއް ވިޔަފާރިތައް ފުޅާކުރުމަށް ކަމަށް ބުނެއެވެ. އެގޮތުން އޮޅުކޮށްގެން ގެންގުޅޭ ޖަނަވާރުގެ ކާނާގެ އިތުރުން، ފެނާއި ކޮފީ އަދި ކުޑަކުދިންގެ ކާނާ އާއި ގަނޑުކުރި ކާނާގެ ވިޔަފާރި އިތުރަށް ފުޅާކުރުމަށް އެކުންފުނިން ވަނީ ނިންމާފައެވެ.

ނެސްލޭގެ މިފިޔަވަޅަކީ ހަށިގަނޑަށް ފައިދާހުރި އުފެއްދުންތައް ކުރިއަރުވަން އެކުންފުނިން ކުރަމުންދާ މަސައްކަތުގެ ބައެއް ކަމަށް ދިރާސާކުރާ ބައެއް ފަރާތްތަކުން ދެކެއެވެ. އެކުންފުނީގެ މެނޭޖްމަންޓަށް އެންމެ ފަހުން ގެނެވުނު ބަދަލުތަކަށް ފަހު ވެޖިޓޭރިއަން މީލްސް އުފައްދާ ވިޔަފާރިއަކާއި، ވިޓަމިންސް އުފައްދާ ކުންފުންޏެއްގެ އިތުރުން މަތީފަންތީގެ ކޮފީ އުފައްދާ ކުންފުންޏެއް ވަނީ ގަނެފައެވެ.

އެމެރިކާގެ ބާޒާރުގައި ނެސްލޭ އިން ވިއްކާ ބައެއް އުފެއްދުންތައް ވިއްކާލި ނަމަވެސް، ނެސްލޭގެ ބައިނަލްއަޤްވާމީ މާކެޓްގައި އެންމެ މަޝްހޫރު އެއް ޗޮކްލެޓް ކަމަށްވާ ކިޓްކެޓް އުފެއްދުން ހުއްޓައެއް ނުލާނެއެވެ. އަދި ނިމިދިޔަ އަހަރު ވެސް ކިޓްކެޓްގެ އުފެއްދުންތަކަށް ޚާއްސަ ފެކްޓްރީއެއް ޖަޕާނުގައި ވަނީ ހުޅުވާފައެވެ.