ވެރިކަމަކީ ގަދަބާރުން ހޯދޭނެ އެއްޗެއް ނޫން: އިމްރާން
ރައީސްކަން ކުރައްވާ ކޮންމެ ބޭފުޅަކަށް ރައީސްކަން ލިބޭނަމަ މި ޤައުމުގައި މިހާރު ކިތައް ރައީސުން ތިއްބަވާނެބާއޭ ވިދާޅުވި
މިނިސްޓަރ އޮފް ހޯމް އެފެއާޒް އިމްރާން އަބްދުﷲ
ވެރިކަމަކީ ގަދަބާރުން ހޯދޭނެ އެއްޗެއް ނޫންކަމަށް ހޯމް މިނިސްޓަރު ޝެއިޙް އިމްރާން އަބްދުﷲ ވިދާޅުވެއްޖެއެވެ.
އިމްރާން ވަނީ ރައީސްކަން ކުރައްވާ ކޮންމެ ބޭފުޅަކަށް ރައީސްކަން ލިބޭނަމަ މި ޤައުމުގައި މިހާރު ކިތައް ރައީސުން ތިއްބަވާނެބާއޭ ވިދާޅުވެ ޓްވީޓެއް ކުރައްވާފައެވެ.
އެ ޓްވީޓުގައި އިމްރާން ވިދާޅުވީ، ވެރިކަމަކީ ގަދަކަމުން ހޯދޭ އެއްޗެއް ނޫން ކަމަށެވެ.
އިމްރާން އެ ޓްވީޓު ކުރައްވާފައިވަނީ އެމްޑީޕީ ރިޔާސީ އިންތިޚާބުގެ ޕްރައިމަރީގައި މިހާރުގެ ރައީސް އިބްރާހިމް މުޙައްމަދު ސާލިޙުއާއި ކުރީގެ ރައީސް މުޙައްމަދު ނަޝީދު ވާދަ ކުރައްވައި، ރައީސް ސާލިޙު ބޮޑުތަނުން އިންތިޚާބު ކާމިޔާބު ކުރައްވާފައިވާ ދަނޑިވަޅެއްގައެވެ.
ރައީސް ސާލިޙު އިންތިޚާބު ކާމިޔާބު ކުރެއްވުމުން އިމްރާން ވަނީ ތަފާތުު ފިކުރުގެ ގިނަ މީހުން ބައިވެރިކޮށް، މަޝްވަރާގެ އުސޫލުން ޤައުމު ހިންގުމަށް ރައީސް ގެންގުޅުއްވާ ސިޔާސަތަށް އެމްޑީޕީގެ އާންމު މެންބަރުންގެ ބޮޑު ތާއީދެއް އޮތްކަން ސާފުވެފައިވާ ކަމަށް ވިދާޅުވެފައެވެ.
މިފަހަރު ވާދަވެރި އިންތިޚާބުގައި 71 އިންސައްތަ މީހުން ވޯޓު ލާފައިވެއެވެ. އެއީ 40،887 މީހުންނެވެ. އޭގެ ތެރެއިން ރައީސް ސާލިޙަށް ލިބިވަޑައިގަތީ 24566 ވޯޓެވެ. ރައީސް ނަޝީދަށް ލިބިވަޑައިގަތީ 15641 ވޯޓެވެ.
