ކޮޅުފުށީ ގޮނޑުދޮށް ހިމާޔަތްކުރުމުގެ މަޝްރޫއު ނިމިއްޖެ
މިއީ 22.9 މިލިއަން ރުފިޔާގެ މަޝްރޫއެއް
ކޮޅުފުށި ގޮނޑުދޮށް ހިމާޔަތްކުރުން
މ. ކޮޅުފުށީ ގޮނޑުދޮށް ހިމާޔަތް ކުރުމުގެ މަޝްރޫޢުގެ މަސައްކަތް ނިމިފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ (އެމްޓީސީސީ) އިން ބުނެފިއެވެ.
މިއީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން، 22.9 މިލިއަން ރުފިޔާއަށް އެމްޓީސީސީއާ ހަވާލުކޮށްގެން ކުރިއަށްގެންދިޔަ މަޝްރޫއެކެވެ.
1،466 މީހުންގެ އާބާދީއެއް އޮންނަ ކޮޅުފުއްޓަށް ވަނީ ރަށްގިރުމުގެ ސަބަބުން އެތައް ގެއްލުމެއް ލިބިފައެވެ. އެތައް ރުއްގަހެއް ނެތިގޮސްފައިވާއިރު، ރަށުގެ ހުރިހާ ފަރާތަކުންހެން ގިރަމުން ދިޔުމަކީ ރައްޔިތުންގެ ވަރަށް ބޮޑު ކަންބޮޑުވުމެކެވެ.
އެމްޓީސީސީން ބުނީ މި މަޝްރޫއު ނިމިގެންދިޔައިރު އެރަށުން ގިރަމުންދާ 4 ސަރަހައްދެއް ވަނީ ހިމާޔަތްކުރެވިފައިކަމަށެވެ. މިއާއެކު އެރަށު ރައްޔިތުންގެ އުދާސްތަކާއި ތަކުލީފުތަކަށް ވަނީ ވަރަށް ބޮޑު ހައްލެއް ލިބިފައެވެ.
މި މަޝްރޫޢުގެ ދަށުން، 5،575 ކިއުބިކް މީޓަރުގެ މޫދަށް އެރޭ ސަރަހައްދު ފުންކުރުމާއި، 4،108 ކިއުބިކް މީޓަރުގެ ސެންޓްރަލް ވޭސްޓް ސަރަހައްދު ފުންކުރުމާއި، 518 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 202 މީޓަރުގެ ސަރަހައްދެއްގައި ބޭރުތޮށި ލުމުގެ މަސައްކަތް ވަނީ ކޮށްފައެވެ.
